قصه ولادتي

مرحبا يااخواتي
كيف حالكم جميعا انشاء الله بخير وش اخبار الحوامل انشاء الله ولدت
ابكتب قصه ولادتي
انا الحين لي تقريبا 17 يوم والده وادري اني تاخرت ماكتبت القصه للفائدة بس اعذروني كانت نفسيتي زفت ومريت بمشكله وغير التعب الجسماني بعد الولاده المهم
طبعا انا من اول التاسع وانا حيل اشرب قرفه كل يوم اشرب ترمس ولما مر اسبوعين وانا ماولدت ضاق صدري لاني كان ودي اولد بدري بديت اشرب ميرميه معاها وامشي الين اتعب وحطيت مع القرفه يانسون وزنجبيل ودهنت بطني بفكس ولا فيه امل اخر شي استسلمت للامر الواقع وقلت اكيد تبي تبدا الدراسه وانا ما ولدت تركت كل شي وقلت خليها على الله ونسيت الولادة ويوم صار يوم السبت الظهر بدا معي مغص وتكرمون اسهال وقلت ايه كالعاده الحين يسكت فعلا استمر ساعتين بعدين اسكت ساعتين وكذ ا طول اليوم ومع الضغط شوي على تحت ولما صار الفجر واذن واحس بوجع في ظهري كانه احد ضربني معه وعجزت اتحرك من مكاني وقومت زوجي ورحنا على المستشفى وبما اننا بيننا وبين الرياض ساعه قلت لزوجي نروح المستشفى القريب واشوف كم مفتوح الرحم وبعدين اقرر انزل الرياض ولما دخلت قالتالرحم مفتوح 4 سم قلت ابغاء اطلع اروح الرياض قالت لا ليش مارحتي من الاول قلت اخاف اولد بالسياره المهم دخلوني التنويم ولما صارت الساعه 10 الصبح جت الدكتوره كشفت ولقته 5 سم وضاق صدري قالت بنرجعك لغرفه الولاده ونبي نفتح الكيس علشان تولدين بسرعه ورحت تخيلو اني كنت اروح واجي على رجولي حسبي الله عليهم ماعندهم ولاعربيه يدفوني عليه
اعطتني الممرضه الكمام وقالت اذا حسيتي بالم اسحبي هواءوجابت معاها حاجه طويله لونها ابيض وفيها زي الخيط وقالت افتحي والله يعطيها الكسار بغت تذبحني واقولها خلاص يكفي وتهاوشني وتقول افتحي زيادة ولاتتكلمين ولما خلصت حسيت اني بموت دخت بالمره من الكمام والاوجاع واعطتني ابره قالت الحين نامي لين تجي الولادة واعطتني زياده اكسجين قالت اذا راحت الطلقه خوذي اكسجين ولاتكثرين من الكمام علشان ماتستفرغين ونمت وكل ماغفت عيني جت تصرخ انا اقول بس حطي الكمام اثناء الطلقه بعدين فكيه على طول طيب انا منومه ومن شده التعب مااقدر اوخره ماصدق ان الطلقه تروح الاانام على طول ومن الساعه 11 الى الساعه 4 وانا وياها على ذا الحال وبعدين قالت يالله قومي الحين ولادة وانا مااحس ان الجنين وصل وتقولي ادفعي بقوة ولاتوقفين ابد حسبي الله عليها بعدين جت الدكتوره لسه 9 سم وهذي مصره الا اني ادفع طبعا تهاوش وتقول لاتصرخين وانا ماصرخت والابطلع واخليكي ويدينك حطيها على فخوذك وشدي وبعدين وبعد كل الهواش شرف ولي العهد حتى من شين اخلاقها ماخلتني اشوفه تقولين مسويه لها شي ولما طلعوني من غرفه ورحت للملاحظه جلست اصيح من القهر ودخلت امي عندي وشافتني وقالت وش فيك تعبانه قلت ايه نادت نفس الممرضه الي ولدتني وقالت تعالي شوفي وش فيها جت قامت تهاوش وتصرخ على امي لكن امي فرجت المستشفى عليها وبردت خاطري
وهذي قصتي مع المستشفى الخايس القرف الي لاعنايه بمرضى ولا نظافه ونفس زينه اكيد تبغون تعرفون اسمه


مستشفى العسكري بالخرج الي يسموه المصانع الحربيه وانا اقترح لو يسموه حظيره حيوانات افضل