قصه ولادتي ببكري فصولي

اعلــــــن فرحتـــــــي باحلـــى خبــــــــر
واببشركــــم بقــــــدوم اغلـــــى البشـــــر
وصــــول مولــــــــــودي الجديـــــــد
الله يحفظــــــه لـــــي من كــــــل خطـــــر

كنت اقرا قصص الولاده واقول متى يجي اليوم اللي اكتب فيه قصتي
يارب احفضلي وليدي وخليه لي ولابوه
الحمد لله ربي رزقني بولد سميته فصولي يوم الاربعاء 16_8


قبل ولادتي بكم يوم كتبت موضوع اسال فيه عن الطلق الصناعي لاني بكريه وماادري وش السالفه
والدكتوره محدده لي يوم الثلاثاء الصباح طلق صناعي

جاء يوم الثلاثاء واخذت شنطتي ورحت المستشفى على الساعه 8 الصباح
وزوجي دخل اوراقي وودوني غرفتي وجابولي فطوري وافطرت واسولف مع زوجي وبعدها كلمت امي علشان تجي عندي وزوجي يروح دوامه

بعدها جتني الدكتوره تقيس قالت الرحم مقفل ويمكن تحتاجين اكثر من تحميله
وحطو فيني اول تحميله الساعه 9 ونص وقالو كذا ساعه وامشي
وركبو فيني تخطيط حق النبض الطفل ياشينه

المهم ورحت امشي انا وامي بالممرات وكلن يشوفني ويرحمني وبعدها جو يقيسون ااااه بس وقالو انفتح نص سم وحطو فيني وحده ثانيه على العصر
يوم جاء وقت المغرب جاء زوجي وجلسنا نتقهوى بالغرفه
ودخلت دكتورتي علي وضحكت قالت تتقهوين اجل ماحسيتي بشي

وعطنيها فنجال معانا

ورحت امشي مع زوجي تحت بالمستشفى

وبدت تجيني مغوص خفيفه
وجو يقيسون لي على الساعه 9 قالت صار 1 وشوي

وبعدها رحت غرفتي انام وبدت الالام تجيني كل شوي بس اتحملها

ونامت امي عندي هذي الليله
وطبعا اغلب الوقت مركبين فيني قياس التخطيط

ومافيه حركه
نمت لي ساعتين وكل ماحسيت بالالم صحيت

ويوم جت الساعه 8 حطو فيني تحميله 3

وقاست قالت 2 و****لله بيتوسع مع التحميله الثالثه
والساعه 12 بننزلك غرف الولاده


من الخوف طلعت امشي مع امي وامي ياحياتي تسال الحريم وش اللي يفتح الرحم
قالو مرمريه ووصت خواتي يرسلون لنا

وشربتني طبعا بعد التحميله الثالثه بدت الالام تزيد وبين الطلوق فتره بسيط

الساعه 12 جابو لي العربيه ويالله على غرف
الولاده

دخلت معي امي

وكلمني زوجي يقول ابي ادخل بس مايوافقون الا على شخص واحد معاك وصار هو وامي واحد يطلع وواحد يدخل

وجو حطولي طلق بالمغذي

وبدت الطلوق تزيد واقعد ادعي واقرا كل ماراحت عني

انا ماجربت الطلق الطبيعي بس اتوقع ارحم بكثير
بين كل طلقه 5 دقايق بعدين 3 ومايمديك تتنفسين الا الطلق احر من اللي قبله كله اجر ****لله
وتسمعين اصوات الحريم تخترعين زياده

اذن العصر وانا كل شوي اطالع الساعه متى اخلص ياربي
وكل ماجت طلقه مسكت الحديده اللي بجمبي وكتمت صوتي علشان مااتعب زياده

وعلى هالحال اللين جت دكتورتي وقاست قالت صار 2 ونص:09:
كل هذا وبس 2 ونص

قالتلي انتي بكريه وحطينا فيك 3 تحاميل وطلق بالوريد الافضل تاخذين ابره ظهر
وتوك 2 ونص
كنت متردده وخايفه منها

وقعدت تقنعني فيها قالت هالام اللي تحسين فيها كلها بتروح
قلت توكلت على الله وطلبت من زوجي يوقع ويدفعها

وجت الدكتوره وعطتني اياها

طبعا تجلسك وتحط المخده على رجلينك وانتي متربعه

وتنزلين راسك شوي


وتحط شي بارد مره وبعدين تعطيك الابره بالظهر وتكون متصله بلي
علشان يزودون الجرعه

وبعدها الحمد لله راح الام وماصرت احس برجليني من تحت

وجلست اسولف انا وزوجي وراح يصلي المغرب وامي كانت بالانتظار برا

ويتنابون علي

وكل شوي اسمع الحريم الي يصرخون واقعد ادعيلهم وادعيلي

وبعدها دخلت علي ممرضه وشافت التخطيط وتغير شكلها
وراحت وجت دكتورتي وكنت بروحي قالت نبض الطفل قاعد يقل لازم عمليه
وجلست اصيح وادق على زوجي يصلي
وادق على امي واقولها وضاق صدرها وجتني الغرفه

ويوم رجع زوجي طلبو منه يوقع على العمليه لمصلحه الطفل

:icon33:
المهم بسرعه غطو وجهي وسحبوني بالسرير ودوني غرفه العمليات الساعه 8 دخلت ودموعي اربع اربع

وامي وزوجي ينتظروني عن الباب

وطبعا لان معطيني ابره ظهر قالو ماتحتاجين تخدير قلت لا مابي اشوف شي مابي اكون صاحيه وقت العمليه

حطو الي لكمام

وشوي ماصرت احس بشي

وبعدها صحيت ويوروني وليدي ياقلبي هو الحمد لله طلع على الدنيا 8الساعه وربع

وجلسو يخيطون وانا صاحيه بس احس بتلميس ببطني اللين جت 8 ونص وطبعا هم طلعو ولدي لابوه وامي برا وشافوه
زوجي مو مصدق جلس يبكي يوم شافه

وانا بعده بربع ساعه ودوني الملاحظه

وجاني زوجي هناك دخل علي وانا ارجف من البرد

سلم علي وتحمدلي بالسلامه وقال شفت ولدي مومصدق

وطلبت منه ينادي امي
جت وباستني وتحمدتلي بالسلامه وكانت تصيح الله يخليها لنا

وخلوني بالملاحظه نص ساعه
بعدين ودوني غرفتي

طبعا اخوي وخواتي كلهم جو يوم درو اني ولدت وكلهم ينتظروني بالغرفه

وودوني لهم
وربي على الالام اللي كنت احسها وقتها بس الفرحه خلتني انسا الالم


الله لايخليكم تجربون القيصري والامه


اشكر كل وحده فادتني بهالقسم اللي عشت فيه 9 شهور واكيد بدخل وافيد واستفيد منكم
والله يهون على كل حامل
ويرزق كل محرومه يارب