قصه ولادتي بولدي الثاني بعد تاخر دام 5 ايام

خواتي صار لي والده من اسبوع واحد بعدما خلصت التاسع وخذت 5 ايام من العاشر. وعلى فكره هذي ثاني ولاده لي .. المهم من دخلت التاسع وانا حاسه اني راح اولد قبل ما اخلص التاسع. موعد ولادتي كان تاريخ 2\12 ... طاف الموعد وعطتني الدكتوره موعد للتخطيط كل يومين في قسم الطواري ... فاول مره رحت الساعه 10 صباحا ودوني قسم الولاده وما شاء الله من دخلت وانا قلبي يدق برعه من اللي شفته..... اقولكم شنو شفت ... شفت دكتورات ومقاصه وسسترات وصراخ .. المهم حطولي حزام التخطيط تقريبا ساعه وانا اسمع صراخ وادفعي ويالله وتوجع .. ولما خلصت قالوا لي لازم اتنوم لين المغرب عشان يعيدون التخطيط وبعدها طلعت ورحت موعدي في العياده وكشفت علي الدكتوره وشافت ا الرحم مفتوح 2سم وعطتني الدكتوره موعد للطلق الصناعي في حال لو تاخرت اكثر لان ماء حول الجنين زايد عن الحد الطبيعي وهم خايفين ان الحبل السري يلتف على الجنين .... المهم تفائلت وقلت جرب موعد ولادتي مع العلم اني ما كنت امشي باستمرار وقبل اليوم المنتظر طلبت من زوجي انه يمشيني على رمل البحر... وبالفعل مشيت نص ساعه وعلى الساعه 3 الفجر وانا نايمه نزل علي ماي قعدت زما كنت متاكده قلت يمكن احلم بس في رطوبه رجعت انام والساعه 4 الفجر نزل مره ثانيه وظل الماي ينزل علي 5 مرات على فترات متفاوته وعلى الساعه 10 الصبح رحت المستشفى بدون اي الم عشان منبهيني من قبل على سالفه الماي .... دخلت ولبست ثياب الولاده وحطولي جهاز التخطيط وبعدها قاست لي الدكتوره شافت ان الرحم مفتوح 5 سم حمد الله وحطولي ابره شرجيه وبعدها مشيت شوي ولا في الم المهم على الساعه 2 حطولي مغّذي مع ابره فيه من بعدها ما وعيت الا الدكتوره دخلت وتقولي يالله ادفعي ولا تصارخين وبعدها بنص ساعه ولدت ولله الحمد وارتحت وكان وزن ولدي 3700 غرام .. وهذي قصتي