قصه ولادتي.. بين ايكيا وحبيب الريان (بكرية)

السلام عليكم
لاني بكرية كنت دايم اقرا قصص الولادة و اتخيلها و شي مضحك و شي مبكي وعلى كثر ما قريت
اقول لكل البكريات مهما قريتي ولادتك بتكون غير بس حلو تقرين عشان تتوقعين كل شي..

ولله الحمد والمنه ولدت وجبت اجمل يارا قبل اسبوعين بمستشفى الحبيب الريان اللي كان في قمه الروعه خاصه مع دكتورتي,,

بعد ما خلصت التاسع ودخلت العاشر بيوم واحد بس.. وطبعا ما كان في اي بوادر ولادة.. رحت ايكيا افطر وبعدها قلت لاهلي وش رايكم نروح للرمال مول مشي اللي حنب ايكيا عشان يسرع الولادة و قبلها رحت حمامات ايكيا ودخلت حمام عربي..

ووصلت الرمال مول و تمشيت بهوم بلازا وتعبت و رحت ستار بكس وطلبت لي تشيز كيك و لاتيه ((شوفو الروقان)) و بسم الله ما امداني اكل لقمتين من التشيز كيك (ريزبيري) الا حسيت كاني سويت حمام صغير الله يكركم شي بسيط .. طنشت الاحساس وتركيزي مع التشيز كيك.. شوي نزل مرة ثانيه بسم الله!! واقول لامي .. احس شي ينزل مني .. ماشاءالله عليها على طول قالت ولادة يلا نروج مستشفى.. اقولها ما احس لا بطلق ولا مغص قالت هذا اوله .. يالله يمدينا نوصل المستشفى .. و اخوي معنا انهبل و يقولي اشيلك اوديك السيارة .. تقدرين تمشين؟ هههه حسيت انه دخل جو فيلم .. قلتله خذ اللاتيه حسافه ما ذقته و عيني على التشيز كيك ودي اخذه بعد بس حسافه حاطينه بصحن ههه

يوم ركبت السيارة امي و اخوي .. اخوي فلاشر وبواري و حالته حاله ويقول امسكي يدي ههه اقوله ركززز على السواقه و امي تقول اكلم على زوجك.. قلتلها ايه و عطيني اكلمه عشان ما ينهبل.. واكلمه و واسلم عادي واقوله بروح المستشفى احتمال ولادة تعال وانا مروقه وفجاه انفجرت المويه وانا قاعدة بالسيارة قعدت اصيح عليه بالتلفون ياااا ويلي بسرعه الحق علي بولد .. مسكين هبلت فيه..

و نوصل المستشفى وانا مخترعه لان فجاه بطني فشششش ونزلت كل المويه و خفت على البيبي.. واوصل طوارئ النساء والولادة بحبيب الريان و يستقبلنا الممرض معاه كرسي عجلات و انا نازله من السيارة و القى بقعه مويه كبيرررررة على كرسي السيارة.. و اعتذر من اخوي.. اسفة وصخت سيارتك .. امي واخوي والممرض كلهم نظرات غريبة و امي تعصب مو وقته..

وعلى طول اخذوا الطول والوزن و الجرارة و تخطيط نبض الجنين و الطلق .. و جت دكتورة اردنيه رائعه اظن اسمها وسام .. قلتلها انا متفقه مع دكتورتي تولدني و ابي ابرة الظهر وخياطة تجميليه.. قالت اوكي بس اشيك على الرحم

لقته فاتح ٣ سم .. قالت ولادة بس لازم اجراءات والاوراق وبطاقتي الاحوال وبطاقه التامين ,, وراح اخوي وهو مخترع يخلص الاوراق ويوم رجع يقول انتي على مسؤوليتي ووجهه اصفررر ههه ياحبيله ..اخذت الاوراق نص ساعه وبعدها طلعوني غرفه الولادة رووووعه.. حطوني غرفه ما قبل الولادة نفسها عرفه الولادة . ولي ممرضه خاصه و العرفه كبيرة حاطين فيها تي في وقنوات حلوة و كنبات..
اول ما وصلت كان معي امساك و ابي اسوي حمام.. قالتلي الممرضة اغير ملابسي.. لبست لبس المستشفى و حطتلي شي سائل من ورا عشان يمشي بطني.. ما امداها تحطه على طول نطيت من السرير على الحمام و فرررغت.. الحمدالله

بعدها طلبت منهم تجيني دكتورتي وفعلا جت وشيكت لقته ٤ سم.. و طلبت اخصائي التخدير لكن للاسف كان مشغول مرة و تاخر شوي فبدأ معي الطلق الطبيعي و صرت اصيح مع صراخ الم .. وتعبت مررررة واخيرا جا بعد ٣ او ٤ طلقات ..و عطاني الابرة وانا معي الطلق وقالي لو جا علميني ,, والحمدالله حط الابرة و طلع منها سلك مشبوك بكيسه زي المغذي.. و عملوا لي قسطرة للبول وحطولي طلق صناعي شوي .. وجلست اصيح بعدها نص ساعه من الطلق وجت الممرضه حطت لي مسكن فجاه الله الدنيا حلوة وما صرت احس بشي.. ابرة الظهر نعععععمة ورائعه..

فجاه صرت ارتعش وكل مالها رعشتي تزيد ..فجاه اثر على نبضات الجنين ,,كل هذا بسبب انخفاض بالضفط ..
جلست كذا يمكن ساعه والدكاترة يحاولون ينزلون ضغطي ويوقفون الرعشه.. والحمدالله ضغطي ضبط .. والرعشة خفت ..
والممرضة الرائعه كانت تساعدني تقول افتحي رجولك و تنفسي صح و اذا قلتلك بوش اعملي بوش.. قلت اوكي.. لان انا ما احس بالطلق ابد .. وهي تشوف بجهاز التخطيط اذا فيه طلق.. وصرت اعمل بوش وارتاح .. و تقولي اعملي بوش كانك بتسوي حمام كبير :)

بعد ساعه ونص من البوش مررررة تعبت قلت لزوجي انزل جيب موية .. اثر الرجال نايم على الكنبة وانا مدري ..
ومسكين نزل ولقى الكافتيريا مقفله.. راح يدور موية.. و بنفس اللحظة هذي .. جتني دكتورتي تشيك علي وقالتلي يلا سوي بوش اكثر .. يلا كمان و مدري وش صار و طلع البيبي والله ماااا توقعت هذا وقت الولادة مسكين زوجي مرتز من المغرب و بالاخير يوم جت حزتها نزل تحت..

واول ما طلعت بنتي حطوها على صدري وانا خايفه قلتلهم شيلوها لونها ازرق و تبي تصيح بس من دون صوت.. وعلى طول الممرضة مدري وش شفطت و صاحت و لفوها وقلتلهم ابي جوال بكلم زوجي تحت.. وادق عليه و اقوله يلا تعال ولدت.. وهو انهبببل ما امداني رحت ادورلك على موية

وجلست الدكتورة تخيطني والحمدالله ما كنت احس بشي.. واعطوني ابرة نمت شوي .. ودخل زوجي وانا نايمه ويشوف البيبي .. وبعد ما خلصوا الخياطة.. دق زوجي بشر الجميع وجت ماما و اخوي وكاني شوي صحصحت ,, ويسالني زوجي وش نسميها افوله ماما تسميها .. وانا طبعا مرة دايحة و اقول كلام ماله معنى وبعدها نمت.. وطلعوني غرفتي الخاصه بعدها بساعتين من الولادة ..

وتوتة توتة خلصت الحتوتة :)

ان شاءالله اعجبنكم ..
واي سؤال انا حاضرة
على فكرة انا بكرية و طولت ما حملت .. على قولتهم حملي هذا عزيز :) والله يخليلي بنتي يارب ويحفظها و يهديها