قصه ولادتي في مستشفى العسكري الرياض

السلام عليكم
كيفكم ان شاءالله انكم بخير
من حملت وانا ادخل هالقسم وقررت اذا ولدت ب السلامه سجلت وكتبت لكم قصتي
لي 21 يوم من ولدت ولله الحمد وجبت احلى بنوته ربي يخليها لي
ولدت في 3/2 كنت احس باالم من السبت بس مغص وبما اني بكريه مااعرف الطلق وكنت بس اسال امي وتقولي هذي بدايه الطلق بس اذا زاد وشد ع ظهرك وبنفس الوقت ع بطنك خلاص نروح المستشفى المهم يوم الاحد ماقدرت انام الم مثل الدوره والنفسيه خلاص باقي لي يوم واخلص التاسع مااكذب عليكم كنت خايفه مرررررره من الولاده بس اصبر نفسي واقول فيني فيني الولاده صحيت الظهر صليت واقول لزوجي شكلي بولد اليوم وطبعا ياكثر مااسمع هالكلمه مني قالي ان شاءالله عشان ترتاحين ورجعت احاول انام للعصر من المغص انام واقوم صليت العصر وقلت لزوجي ابي امشي في اي مجمع لان كان برررررد مره والمجمع ادفى قال خلاص صليت ولبست وحسيت اني مابرجع للبيت سبحان الله قلت اذا خلصت مشي ودني عند اهلي طلعنا ورحت مشيت من 4العصر لحد الساعه 7 العشاء ورحت عند اهلي وكنت مرررررره تعبانه وامي تقولي وجهك تعبان شكلك خلاص اليوم بتولدين واقول ان شاءالله يااااارب على اني خايفه بس ابي ارتاح والشهر الاخير مررره غثيث المهم رحت تروشت وتنظفت من والى بعدها زاد الالم واتصل علي زوجي قالي بجي وبجلس عند اهلك قلت خلاص هوعارف اني تعبانه قالي ننام عند اهلك اذا صارشي مااعرف اتصرف وانااصلن ناويه انام لاني حاسه بتعب مومثل دايم المهم صلحت امي حليب بزنجبيل وحطيت معه عسل وحبه سوداء مع اني خايفه بس توكلت ع الله وشربت كوبين قالت لي امي امشي وامشي واحس بتعب ع الساعه 3 صليت الوتر وجلست ادعي بعدها قريت قران وانا اقراء احس بالم يدف من تحت ووجهي مصفر وعطتني امي تمر واكلت وخلاص ودموعي ع خدي خوف مع قلق المهم صحيت زوجي وطلعت انا وامي ع الساعه 4 الفجر يوم الاثنين قالت لي امي نروح نكشف اذا مافيه شي نرجع وطول الطريق دموع فيني خوف موطبيعي واستغفر وصلت المستشفى ع طول دخلت الطواري طبعا امي الله يخليها لي يارب معاي ورفضو يدخلونها معي غرفه الكشف جالسه براع الكرسي وزوجي برا عند الاستقبال وانا جوى خلاص سلمت امري كشفت علي قالت الرحم مفتوح 3 سانتي قالت لي دكتوره سعوديه ماتطلعين الساعه 9 الصباح نكشف ثاني مره واذا مفتوح زياده ولاده اذا مانفتح تطلعين قلت طيب والدموع ف عيوني واطلع لامي واعلمها قالت لي امشي وامشي ف السيب مره قصير والالم اللي احس فيه اول راح من الخوف واشوف الحريم اللي تصرخ واللي مره واصله ومطلعينها لغرفه الولاده وانا بس اناظر والخوف فيني بس احس بالم خفيف مومتواصل المهم جاء ع الساعه 9 وكشفت قالت مفتوح 6 سانتي وحطت لي الحقنه الشرجيه وانتوا بكراااامه تعبت تعبت بعدها بس ابكي ودخلت امي وانتوا بكرامه الحمام
وامي الله يطول بعمرها ويرززقها الجننننه ياررررب الدموع ف عيونها بس تصبرني وبعدها خلوني لحد الساعه 11 الظهر وانا بموت من الالم قالو نطلعك اذا لقينا سرير طبعا هم يقولون كذا يشوفون اللي وصله مره يطلعونها واللي باقي يخلونها عندهم شوي قالولي انسدحي ع السرير لان الرحم مفتوح عندك وتجيك ولاده باي وقت انسدحت ع السرير ماعاد اقدر وابكي من الالم قالو خلاص نطلعك غرفه الولاده اذا معك مرافق عادي يدخل معك غرفه الولاده قلت امي معاي ع طول طلعت لقيت امي جالسه واقولها خلاص يالله بولد ويطلعوني وامي معاي واضم امي وابكي اناخايفه بنفس الوقت فرحانه اني بخلص وبشوف بنتي انتظرها 9 شهور غرفه الولاده بلحالي مامعي احد والحمدلله كنت خايفه يكون معي احد واسمع صراخ وكذا وجلست السستر تحط لي التخطيط والمغذي والالم فيني يروح ويرجع وانا بس ادعي واستغفر وامي تذكرني بالله كثير ولساني ماوقف من الذكر اللهم لك الحمد والشكر وكل مازاد الالم امسك يد امي جعلها ماتمسها النار يارب
وكان الرحم مفتوح 7 سانتي والساعه 2 ماعاد اقدر خلاص احس شي يدف من تحت بقوووووه واصرررخ اقول لسستر بيطلع شي مني وهي ماتعرف عربي وامي تقولها خلاص ولاده كشفت قالت راس قريب وبسرعه رفعت رجولي جات دكتوره سعوديه ودكتور تجمعو واناخلاص احس روحي بتطلع الم فضيع 3 دفعات وطلعت بنتي الحممممدلله خلاص يوم شفتها نسيت كل التعب سبحان الله وجلست نص ساعه وطلعت المشيمه وبعدها خيطوني وطلعوني لغرفه التنويم وبنتي معاي خذوها روشوها ورجعوها عندي بس ياخذونها وقت مايغيرون لها ويرضعونها ويجيبونها لي

وكنت طالبه ابره الظهر بس ربي ماكتبها لي وكنت استخير والسبب ان الدكاتره في غرفه العمليات والحمدلله كانت ولادتي سهله وميسره ولله الحمد بفضل الله ثم دعاء امي لي وكنت في فتره الحمل وخاصه الشهر الاخير اقراء قران في مويه زمزم سوره مريم بدايه سوره البقره الزلزله سوره الرعد وامسح ع بطني صلاة الوتر مااخليها ادعي ربي انه يسهل علي الولاده وويسرها ويسخرلي من يحوجني لهم بوقت الحاجه الاستغفار مااتركه بكل وقت وحتى وانا امشي وكنت امشي كثيرمن دخلت التاسع المستشفى مرررره حلو عنايتهم بس في الطواري قرررررررف ينافخون ع الوحده السسترات بس في الولاده ربي سخرلي افريقيه الله يوفقها وين ماراحت عسل مره الله يسهل على كل حامل يارب ويرزقها الولاده المسهله الميسره ويرزق كل محرومه بالذريه الصالحه
حبيت اكتب لكم تجربتي وخاصه للبكريات اللي خايفات الولاده ماتخوف مثل ماانا متوقعه بس الم الطلق هو اللي متعب

تعبت امي كانت معي لحظه بلحظه الله يخليها لي يارررب زوجي الله يحفظه تعب معي كان طول هالوقت تحت في الانتظار لحد ماولدت وابوي كل شوي يتطمن وخواتي ف البيت ينتظروني الله يخليهم لي ولايحرمني منهم يارب
دعواتكم لي وان الله يخليلي بنتي ويرزقني برها ويجعلها من الصالحين ومن حفظت كتابه

اي سؤال انا حاضره استودعتكم الله