السلام عليكم
كيفكم بنات خليني ابداء علا طول من غير اي مقدمات
اخيرا فضيت عشان اكتبلكم قصه ولادتي
زي منتو عارفين انا خلصت التاسع ودخل اسبوعين في العاشر وقالو لو ماولدتي حانحددليك موعد طلق صناعي وكنت مره خايفه من الطلق الصناعي مع اني ماجربتو بس خفت من كلام البنات عنو انو مووت مع اني مو بكر بس طولت مو زي بكري ماشاء الله خلصت التاسع وفنفس اليوم ولدت الحمد لله علا كل حال <<<<كأني طولت :D
ولدت يوم الاربعاء 11_6_1433 وكان عندي موعد يوم السبت علا اساس يحددولي طلق صناعي
اول مادخلت شهري سرت اشرب ورق التوت والحليب بالخلطه واتنقع بمويه حاره اللين خلصت الخزان ههههههه ومشيت اللين رجولي اتورمت بس للاسف ماولدت :icon810:
ولمن بقيلي اسبوع واخلص التاسع رحت كشفت قالت فاتح 1ونص انا فرحت رجعت امشييي واشرب واكل عصير اناناس طبيعي ومعلب بجميع الانواع ولاشكال بس للاسف برضو مافاد ودخل الشهر العاشر<<<<اسمو يخوف :unhappy:
وبرضو فاتح واحد ونص انا خلاص رجعت البيت ابكييي تعبت من التقل واحس اني طولت وخايفه من الطلق الصناعي والنفسيه سارت معدوووومه
المهم يوم الاحد رحت مشيت ساعتين وشربت عصير اناناس وتاني يوم مشيت ساعتين وفي الليل اتهورت وشربت قرفه مع زنجبيل مع اني كنت مره خاايفه من القرفه شربت نص كوب ونمت صحيت يوم الثلاثاء الصباح علا اللم بسيط في بطني وظهري بس غريب عن الالم اللي كان يجيني من اول مادخلت شهري ماهتميت قلت اكيد زي كل مره رحت البنك في الصباح وانا هناك الام يروح ويجي وانا اتعصر من الالم وماما شكت قالت اشبيك فيكي شي قلتلها في الم مره غريب بيجيني خلصت ورحنا فطرنا ورجعت البيت والوجع مستمر معايا ماما قالت يلا نحسب سار يجيني كل12 دقيقه قلت خليني اروح الطوارئ اطمن دخلت اخدت شور ولبست ونمت صحيت العصر الوجع راح انا هنا يأست حتى ماما قالت يلا نروح نمشي قلتلها مابغى امشي ولاشي خلاص استسلمت للطلق الصناعي علا المغرب نزل عليا شويه دم فرحت وبداء الوجع يرجع تاني وسرت احسب سار يجيني كل 10 دقايق شويه سار بين ال6 و9 دقايق قلت خلاص مشينا علا المستشفى رحت ودخلت الطوارئ اخدو مني بول وقاسو الضغط والسكر والحراره والوزن
وحطولي التخطيط والوجع يزيد بس برضو يجي كل 6دقايق كشفت عليا لقتو فاتح3سانتي قالت يلا تنويم انا فرحت بس فنفس الوقت خايفه طلعوني علا غرفه الرعب:06:
بس علاحظي دخلت في يمكن 5 في غرفه الانتظار ووحده كانت في غرفه الولاده يعني مافي صريخ وخوف ورعب
دخلت وحطولي التخطيط مره تانيه شويه جات السستر تقول انتي اكلتي قلتلها ايوه قلتلها ليش في شي تقول الجنين نايم طلع نايم الاخ:04:
جابولي ساندوتش وشاي اكلت وشربت شويه صحي كشفت برضو 3 سانتي طلعت مشيت سرت لمن امشي الطلق يروح ويجي كل3دقايق واذا جلست يسير 6 دقايق سار الوجع لايحتمل دخلت قاست برضو 4 قالت يلا غرفه الولاده ودخلت غرفه الولاده علا الساعه 1 الفجر فتحتلي مويه الراس اول مافتحتو قاست طلع ماشاء الله فاتح 7 سانتي علا طول المهم الطلق بداء يزيد اكتر ورجع نام مره تانيه كسووول سارت تحرك فبطني وتنزلو ومدري ايش تسوي وانا الالم يزيد اكتر واكتر اللين صحي ونزل راسو اعطتني كمام ياسلام مرره حلو يدوخ بس تحسي بالام كانو حلم بس غذاااب وانا ماصرخ ولا افتح فمي استحي
جات قاست علا الساعه 2 برضو سبعه انا خلاص وصلت حدي مني قادره اتحمل الالم كل مايجي الطلق اجلس افرفر واذا سمعت صوت وحده تصرخ الالم يزييد وعلا الساعه 3 وربع خلاص احس بدفع مني قادره السستر قاست برضو سبعه قلتلها مني قادره خلت رجلي مفتوحه وفكت الكشاف حقهم سارت تلبس الجونتيات وانا اقلها ابغى ادفع سارت تقول استني شويه قالت يلا دفي سرت ادف وادف وادف مو راضي يطلع والطلق ورا بعض السستر تقولي خدي نفس بين الطلق اقولها ماقدر اخد نفس اللين سرت احس براسو وادف خلاص تعب سرت اقول للسستر ساعديني طبعا وقتها كنت اصرخ الحيا راح هههههههههههههه وريتهم مواهبي ههههه بس وبعد كم دفه طلع سنفوري حبيبي والام راح وارتحت قاسو وزنو ونظفو شويه سرت احس بدفع تاني بس من غير الم قلت لايكون في واحد تاني وانا مادري هههههه قلت للستتر قالت لاتدفي اقولها ماقدر تقول لاتدفي بعدين الرحم يخرب ماعرف ايش قصدها المهم مسكت نفسي وطلعت المشيمه حطتلي بنج وخيطتني وقالت انته في كويس انا حاسوي ضيق الترجمه(انتي ماتعبتني وانا حاضبتيك واضيقيك) سوتلي تجميلي وخياطتها مره حلوه واعطوني سنفوري وبستو كان شعور مره حلو :32:
عشان في بنتي خفت ومارضيت اشيلها المهم اخدو مني وخلوني في غرفه الولاده يمكن ساعه واخدوني علا غرفتي
كانت معاملتهم مره روعه وكل شويه يجو ينظفو الغرفه اكلهم مو مره
الحمد لله ارتحت وعقبال الكروشات يارب
ايوا صح نسيت اقولكم علا اسم سنفوري بعد خمسه ايام من ولادتي قررنا علا اسم وسمينا (أحمد) الله يخلي لنا يارب هوا واختو
وطبعا مانسيت في وقت الولاده دعيت لكل الكروشات والمحرومات
سامحوني طولت عليكم
واي سؤال انا حاضره
aram @aram
عضوة نشيطة
يلزم عليك تسجيل الدخول أولًا لكتابة تعليق.
قلبي المؤمن
•
حمدا لله على سلامتك
الصفحة الأخيرة