السلام عليكم ورحمه الله وبركاته
كيفكم خواتي ان شاء الله طيبين :kiss:
انا سجلت بالمنتدى بس علشان اكتب هل الموضوع علشان يمكن اي وحده تستفيد منه لأني بفتره حملي كنت أقرا كثير مواضيع وابي استفيد من تجارب الغير بما يخص الولاده وعسى الله يكتب لي ولكم الأجر ..
أحب أبدا معكم الموضوع من الشهر 9 واللي حصل معي طبعا انا اول طفل لي علشان كذا كنت متخوفه كثير واسمع كلام كثير طول فتره حملي طبعا اكتشفت ان كل وحده لها تجربه خاصه وتختلف عن الثانيه علشان كذا لا توسوسون وحطو اذن من طين واذن عجين يعني مثلا يوم قربت ولادتي كنت أقرا كثيرعن الطلق وعوارضه طبعا لازم الوحده تعرف وش هيئه الطلق وشلون يجي بعضهم يهول الشيء ويحسسك انه مافي وقت وخلاص تولديين وهذا غلط لان في وقت كافي بين الطلق والولاده خصوصا للبكريه اللي حصل معي ان الطلق بدا معي من يومين يمسك 10 دقايق ويفك هيئته الم اسفل الظهر واخر البطن وكنت خايفه لدرجه رحت المستشفى قالوا لي توك الرحم فاتح 1 سم احتمال ولادتك بعد يومين الزبده اني شفت ملف متابعه الحمل عندي نسخه له بالبيت يوم قريت تاريخ الولاده المتوقع كان يوم 7محرم على حسبه اخر دوره لي مع اني كنت ملخبطه بالتاريخ وهذا شي مهم يابنات لازم تعرفون تاريخ اخر دوره لك علشان تعطيك الدكتوره التاريخ المتوقع لولادتك بمشيئه الله واللي حصل اني يوم 7 جاني طلق قوي ورحت المستشفى مستشفى دله بالرياض على الطوارىء طبعا كان الالم يجي كل 5 دقائق تقريبا منتظم طبعا بهل المرحله كنت خايفه من داخلي وفرحانه بنفس الوقت لان الفرج قرب وبشوف طفلي اللي انتظره من 9 شهور
دخلوني على الطوارىء وكشفت علي وحابه اشرح لكم يابنات كل شي بالتفصيل (لاحياء بالعلم )علشان يمكن افيد احد لان نفتقر لهل المواضيع اللي تفيد كثير بنات مقبلين على شيء جديد ومن واجب اي احد مر بالتجربه هذي يشرح لهم بالتفصيل
المهم الكشف كان ان الدكتور تكشف على الرحم من خلال القياس بيدها علشان تعرف الرحم كم فتح كشف عادي يمكن يختلف من دكتوره لاخرى بعضهم دفش شوي الم بسيط يعني موب شيء يذكر المهم كشفت علي قالت مفتوح 2 سم ماتغير شي المهم رحت لغرفه التنويم ..
بديت امشي وامشي بالاسياب نصحيه يابنات من الشهر 9 ابدي امشي بس طبعا بستشاره دكتوره على حالتك اذا تسمح او لا بس ان شاء الله ان المشي يسهل الولاده يخليك خفيفه
المهم بديت امشي بالاسياب ورجعت الغرفه وعطوني تحميله علشان تنزل كل اللي ببطنك قبل الولاده بعدين قالوا لي بنزلك غرفه الولاده التحضيريه وهي عباره عن غرفه بقسم الولاده بس قبل غرفه الولاده الاساسيه
هنا طبعا شعور لايوصف خوف توتر وفرحه بنفس الوقت بس ربي يحط راحه البال والطمأنينه بنفسك ان كل شيء بأيد الله وتوكلي على الله احب اذكركم يابنات لاتنسون اذكاركم وادعيه ماقبل الولاده ومويه تكون قاريه فيها وخلوا عنكم الخرابيط قرفه ومادري ايش ان كان مويه وتمر بس والتوكل على الله قبل كل شي ..
المهم نزلت لغرفه الولاده طبعا حطوا علي جهاز الضغط وجهاز قياس نبض قلب الطفل للأطمئنان عليه ومغذي
كانت الساعه 3 الفجر جت الدكتوره وكشفت علي كان باقي 2 سم اللي صار انها فقعت مويه الراس من خلال عود حسيت بمويه تنزل طبعا كل ساعتين كانت تجي الدكتوره وتكشف علي وتقيس كم فتح الرحم وقعدت بالغرفه كل 5 دقائق يجي الالم مانكر انه الم شديد بس انا طول معي مره فعلشان كذا قرروا يعطوني طلق صناعي بصراحه كان شي متعب جدا وعلشان كذا وقتها طلبت ابره الظهر وقتها مافكرت بشيء زوجي كان متخوف لاكن يوم شاف حالتي واني طولت بالولاده وافق وعطوني ابره الظهر طبعا احب اقولكم شي كل اللي ينقال عن ابره الظهر خطأ انهاتسبب شلل ومادري وشو جتني الدكتوره وقالت حطي مخده بحضنك وضميها وابضرب لك الابره بس ماقالت لاتتحركين وهل الكلام اللي نسمعه وضربت لي الابره مافيها اي الم بس وقت دخولها نغز بسيط طبعا فكرتها ان منطقه الحوض عندك تتبنج ولاتحسين بألم ورجلك تتبنج لكن يدك وبطنك لا
وهنا طبعا روووووووقت وقعدت اسولف ولاحاسه بشي لين جت الساعه 11 الصبح سوت لي الدكتوره كشف قالت مشاء الله فاتح 4 سم وفرحت مره قالت بنسوي لك كشف بعد ساعتين يوم جت الساعه 2 والا سوت كشف فاتح 10 سم قالت مشاء الله شوي نوديك غرفه الولاده
جت الدكتوره قالت بنشيل عنك ابره الظهر علشان تحسين بطلق بسيط وتدفعين نقدر نخليها لك ولاتحسين بشي ابد لكن وقت الولاده يمكن يطول لان ماراح تحسين بالطلق قلت لهم شيلوها وتوكلت على الله دخلت غرفه الولاده في طلق يجيني احس فيه بشكل بسيط وطلق لا كانت تقولي الدكتوره طبعا كل ماجاء طلق قالت لي خذي نفس وادفعي وقتها كان في ممرضتين عند بطني لاجاء طلق ودفعت هم يضغطون على بطني ويدفعون الطفل لتحت وعلى هل الحال يمكن 7 طلقات وادفع لين خرج الطفل طبعا وقتها كنت دايخه مررررررررره شعور غريب فرحه عظيمه صح اني ماقدرت اعبر لاني كنت داييييييييخه مره بس صدق لاهي فرحه زواج ولا شهاده فرحه كبيرررررره لاتوصف
بعد خروج الطفل طلبت مني الدكتوره ادفع علشان خروج المشيمه طولت الصراحه ولاطلعت كانوا بيقررون لي عمليه بس شاء الله والحمد الله بعد مادفعت ودفعت خرجت سوت لي تنظيف وبدت تخيط طبعا الخياط في بنج ماتحسين بشيء طبعا في عوارض مابعد الولاده اشياء بسيطه يمكن تحسين ببرد ورجفه لان حراره الجسم اختلفت ويمكن تحسين بدوخه بسيطه بعد المجهود بعد مايتأكدون ان كل شيء تمام يطلعونك غرفه التنويم ويجيبون لك طفلك ياحلوها من لحظه وانتي تحضنيه ربي يبلغكم كلكم يارب
اتمنى ان موضوعي افادكم واي اسأله انا جاهزه :a_smil08:
ملاحظه : لاتخافون يابنات ولاتضيعون اللحظات الحلوه بالبكاء طبيعي اخر شهر تتوترين وكأن النهايه قربت لكن صدقوني الامور اهون من كذا وتذكري انها الم يوم وفرحه عمر ان شاء الله وغيرك يتمنى هل النعمه ومحروم منها احمدي الله واشكريه على هل النعمه ..
ربي يسهلكم كلكم يارب ..
manal.1408 @manal1408_1
عضوة جديدة
يلزم عليك تسجيل الدخول أولًا لكتابة تعليق.
(حـنـيـن)
•
حمدا لله على سلامتك ومبروووووك ما جبتي ربي يجعله من الصالحين
ألف الحمد لله على سلامتك والله يعطيك العافيه على معلوماتك وشرحك وجزاك الله خير ..
ومبروك ماجاكي والله يجعله من عباده الصالحين يارب ...
ومبروك ماجاكي والله يجعله من عباده الصالحين يارب ...
جوتايم
•
الف مبروك ووالحمدالله ع سلامتك
ومشكوره ع ذكر تجربتك
وكيف مستشفي دله يقولون اخلاقهم مش ولابد
وقت الولاده
ومين كانت دكتورتك وقت الولاده
ومشكوره ع ذكر تجربتك
وكيف مستشفي دله يقولون اخلاقهم مش ولابد
وقت الولاده
ومين كانت دكتورتك وقت الولاده
الصفحة الأخيرة