قصه ولادتي لنور عيني رائد وابتلاء ربي لي

السلام عليكم ورحمه الله وبركاته كيفكم خواتي 
بسم نبداء 
كتب الله وحملت بعد خمس سنين من انجابي لبنتي وعندي قبل اثنين كبار 
يعني اولادي ثلاثه واخر واحد هو رائد الي بحكي لكم قصت ولادته الحزينه 
وابتلاء ربي لي 
في اخر شهوري من حملي بولدي كنت اتعب معي ربو حااد وضيق تنفس 
وداايم اخذ اكسجين 
واتأزم اذا نزل المطر واستمر 
والله اشوف المووت من ضيق التنفس والتعب 
لدرجه اخر مره جا الاسعاف وخذاني وعطوني ثلاث ابر ويالله رديت النفس
وجهي ازررق وطبعا هذا يأثر علی الجنين
ولدت قيصريه لان وضع الجنين جالس وخافوا علی الضغط وعلي
بعد ماولدت وفتحت سئلت وش جبت قالت الممرضه جبتي ولد مدام 
بس تعبان شوي 
قلت وش فيه ؟؟ قالت التنفس فيه مشكله 
ماخفت مره توقعت تعب بسيط وكذا وبيخف ودوني لغرفه خاصه بي
جا زوجي قبل زيارتي راح يزور ولدي 
دخل علي وجهه متغير ومظلم قلت وش فيك وجهك كذا ؟؟؟ بكی طاحت دموعه
بغيت انجلط قلت شفيك ؟؟
توقعت عيالي فيهم شي 
ماتوقعت رائد ابد فيه شي 
قال رائد 
قلت وش فيه ؟؟ قال تعباااان والدكتور مابشرني بخير 
وكله اجهزه 
انا انهبلت جلست ابكي ابكي بحرقه قلت خلاص اطلع تكفی 
خلني لحالي مابي احد عندي 
طلع زوجي من هنا .... الا وانهار من هنا ابكي بألم واتقطع من الحزن والبكا
مالي حيله مااقدر اصلي لاني نفاس ولا اقدر امسك قران وحالتي حاله 
وخواتي كل وحده في بيتها 
وامي حرمه كبيره ماتقدر ترافقني 
ماعندي الا جدار قبالي فيه ساعه حائط 
واطالع الساعه الا 3 من الليل يعني من راح زوجي وانا ابكي الين الساعه 3 من الليل 
وكل مادخلت ممرضه قالت شفيك مدام ؟
اقول تعبان انا مريضه 
اخر شي جا في بالي اروح ازور ولدي واشوف شكله 
بس ابي اشوف هو طبيعي والا زوجي مخبي علي شي 
طلبت من الممرضه كانت سعوديه يازينها الله يذكرها بالخير من الجنوب كانت صغيره في العشرين من عمرها 
وجهها بشوش وعلی طول ودتني 
حطتني في عربيه وقالت ابشري اوديك لولدك في الحضانه 
واروح وادخل بعد ماشافوا رقمي 
لان ممنوع احد يدخل الحضانه الا اهل المولود 
ودخلت وسئلت وشفت ولدي شفته شفته 
يهبل يابنات يهبل كامل وصحته حلوه ولونه حلو يجنن يشبه اخوانه
بس رجله ويده فيها مغذي 
ومسكرين عليه في زجاج 
ومعه مجموعه اطفال 
سئلت الدكتور 
قلت دكتور رائد فهد وشفيه ؟؟ وش حالته وش يشكي
قال اااه رائد تعبان اوي اوي شكله جاي في الشهر الثامن يعني نموه ناقص 
كان الدكتور مصري ماصدقته ابدد
لاني حاسبه زين وقت حملي وغسولي من الدوره يعني كامله ولادتي 
واروح للدكتور هندي واسئله عن ولدي 
قال شكله ماكل براز واثر عليه وتعب 
استغربت كلامه وعرفت ان ماعنده ماعند جدتي 
واطلع واروح لغرفتي وانا ابكي اتقطع من البكاء ماغمضت عيني من الحزن والالم
يوم جا بكره واروح للحضانه واشوف دكتور سوداني واسئله عن ولدي 
قال ناقصه اكسجين واحتمال حياته ضعيف ولو عاش 
بيصير مختل عقلي 
جا كلامه مثل الصاقه علی قلبي 
كل دكتور يقول شي 
اخر شي قلت خلااص ماعاد اسئلكم اسئل رب العالمين هو الي اعلم بحالتي 
واروح لغرفتي وابكي وابكي 
وكل ماجا احد يزورني اسوي نفسي قويه 
واقول ***** الله طيب 
واخذت من زوجي فلوس صرف 
كل مادخلت علي عامله اعطيها 5 ريال 
هذا والله الي قدرت عليه 
وحالتي النفسيه تعبانه
الم جرح القيصريه ... وبعدي عن عيالي وعن بنتي الي عمرها 5 سنوات 
والا ولدي الي ولدته وماحضنته وبعيد عني 
طلعت من المستشفی طلعت وقلبي ماطلع معي 
لحاله في الحضانه 
لحاله في رعايه الله 
واجي بيتي واشوف ملابسه واغراضه شامبو وليفه جسمه ورضاعته وطشت الي اسبحه فيه
واتقطع من البكاء وامووت حزن حزن 
ابغی احضنه لو نص ساعه 
ابغی ارضعه صدري ابغی ابوسه لو دقيقه 
وعيالي يسئلون عنه متی يجي متی يجي 
وانا بس ابكي واقول الله كريم 
واطلب من زوجي يتصدق بخروف للفقراء 
وانا يدي مانزلت واتحرا مواضع الدعاء 
عند المطر لاني والده في الشتاء 
وعند الاذان ... وبين الاقامه واخر الليل 
راح زوجي يزور ولدي وحاله كل ماله وينقص وينحف صار مثل المجاعه مافيه الا راسه لانه مايرضع بس مغذي في رجله وعند شفته 
وصوره وراني صورته صار اسمر بعد ماكان ابيض 
وصار يروع بعد ماكان يهبل ماعاد فيه الا راسه 
يخوف قسم بالله 
وريت امي الصوره قالت الحمدلله اشباهه زينه وكامل والصحه وانا امك ترجع اذا طلع 
كانت امي حرمه مؤمنه راعيه دين الله يخليها لي 
طمنتني يابنات 
ماخوفتني ولا بكت ارتحت بعدها 
راح زوجي مره ثانيه يزوره توهم معطينه دم انفجع زوجي طلع لونه اسوووود 
ولدي واستغرب زوجي حسبه بيموت 
سئلت الدكتور وشفيه كذا 
قال طبيعي الين الدم يتقبله الجسم بعدين يرجع طبيعي 
سبحان الي يصرف الانسان دمه وكل حياته سبحان الله الذي خلق الانسان فأحسن خلقه 
وخلا كل شي ينظم نفسه مايختلط الدم مع البول ولا البول مع المويه 
المهم جاني زوجي وعلمني وانا بس اهدي فيه 
واروح وهو مايدري ابكي واتقوطع في غرفتي 
وادعي ادعي المهم طهرت وفرحت 
وصرت يوميا اختم البقره 
وادعي في سجودي ان ربي يطلعه لي ويجعله وسيم واحلا خوانه ويجعله طبيعي 
والح في الدعاء 
واقوم اخر الليل ادعي ادعي واللح في الدعاء 
وابكي واتضرع لربي واسئله وانا متوكله عليه 
واقول يارب لاتشمت بي عدوا ولا حاسد 
مثل ماخلقته اشفه ورجعه لي طيب ومتعافي 
ياربي ارحم ضعفه يارب هو لحاله رده لي مثل مارديت يوسف ليعقوب 
وفتح ربي علي من الدعاء العظيم 
وانا ابكي واتضرع 
واقول لزوجي لاتخاف بيطلع رائد وبيملا علينا البيت 
وبيشفيه ربي 
بس لاتنسی الصدقه لاتنسی 
وجلس رائد شهر في المستشفی وانا من بكاء ودعاء ونحيب والم 
حتی نحفت  وذبلت بس مايئست لاني متوكله علی ربي 
ابيه يطلع بس يطلع متعافي مايشكي شي 
وربي قادر علی كل شي 
مايعجزه شي في الارض ولا في السماء 
اذا اراد شي قال له كن فيكون 
حبيبي ياالله 
مالي احد ادعوه الا هو كاشف الهم والكرب 
محيي الظام وهي رميم 
سبحان مااعظمه 
كنا ايا الحج وفي ليله عيد الاضحی رن تلفون البيت 
خلاص يابنات اكمل القصه بعدين والله تعبت بروح انام لان عند عيالي مدرسه 
تصبحون علی جنه ورضی من الله وعافيه 
احبكم 💞💝💘😙😙😙