السلام عليكم
كلّ البشر فـي الاتصـالات يخطـون
يخطون واخطي.. عذرنا هاتف فلان؟؟
ومن عادتـي ماهتـمّ باللـي يقولـون
من غلط في رقمي .لقى الردّ غلطـان
الين جااء فـي يـوم ..دق ّ التلفـون
شفت الرقم.. لقيتـه اشكـال والـوان
فتحت جوّالـي ابعـرف مـن يكـون
سمعـت صـوتٍ فيـه بحّـه وفتّـان
قالت لي: انت سعود؟ قلت: ايه بالعون.
لعيونك.. اسمي سعود لو كان ضيـدان
قالت :اتظنّي مخطئه. قلت :وشلـون؟؟
قلبي توقّـف مانبـض فيـه شريـان
بالهـون يابنـت الاجاويـد بالهـون
من عادة الانسـان يرتـاح لانسـان
تسمّعـي يابنـت وابليـس ملـعـون
اخذي كلام ٍ مصدره صـدق وجـدان
ماني بقايل لك: انـا انسـان مزيـون
اطرق ولاله شبه في الانـس والجـان
انا محمّد.. وافـي الهـرج مـوزون
اوزن كلامي.. قبـل اقولـه بميـزان
وانا الّذي لاحـبّ ..لايمكـن يخـون
مخلص مدامه حيّ .ويمـوت ماخـان
وانـا اذا حبّيـت.. حبّيـت بجنـون
حبّـي يفجـر داخلـي الـف بركـان
وانا الّذي ماطـرد ورى مـن يقفّـون
من صدّ عنّي عمد.. بجزيـه حقـران
هذي وصوفي .واكثرالنّ اس يشـرون
وانتي عليـك اليـوم تقديـر الاثمـان
قالت :اشوفك قمـت يامحمـد تمـون
تضحـك وضحكتهـا تقاسيـم فنّـان
قلت :الميانه.. ماهي بضحكة سنـون
احيـان ماتلقينهـا ا بيـن الاخــوان
ترى الميانه شيّ واضـح ومضمـون
اذا اجتمع شخصين.. في قلب ولسـان
قالت :كلامك وافـي ٍ يابـن خلـدون
احيان احسّ ان جلستك بيـن شيبـان
يامحمد .اسمع كلمـة البنـت ميسـون
اسلوبك ووقتك.. مضت دونها ازمـان
هـذا زمـن قدواتـه افـلام كرتـون
وهذا زمان ارجالـه اجسـاد وابـدان
قالت.. وغنّت لي على وقتـي لحـون
قلت: اسكتي من بعد ماخاطري شـان
انا ادري ان الوقت.. من دون في دون
لكن فمـان الله وانـس ِ اللـذي كـان
قلته وانا صامل.. وهي عندهـا آذون
لكنّهـا ماصـدّقـت سـمـع الاذاان
ضاقت ...وخلق الله دايـم يضيقـون
وانا قفلت الخطّ..ضـايـق وزعـلان
ونسيت.. والاجواد في الوقت ينسـون
ماسـمّـي الانـسـان الاّ بنسـيـان
المشكله..بـنـات حـوّا مايسـلـون
دقّت علـي وانـا لهـا شبـه شفقـان
قبل آآتكلّم.. قالت: اسمـع ولاتهـون
اسمي مهو ميسون.. حان الصدق حان
الاسم عمشاء وآخـر الجـدّ مصيـون
مهـره ولا طوّعـت بلجـام وعنـان
قلت: ارحبي مليون تضـرب بمليـون
اقولهـا مليـون مـن قلـب ولسـان
قلت: ارحبي في العين ..ولحافك جفون
وظلالك من الشمس باهداب الاعيـان
ياعيـن حـر ٍ بالمطالـيـع مفتـون
حر ٍ شـراه مولّـع الصيـد طربـان
منقول نقلاُ مبرحاً
الاوائل @alaoayl
عضوة
يلزم عليك تسجيل الدخول أولًا لكتابة تعليق.
الصفحة الأخيرة
القصيدة مرررررررره رايقه
بس ياليتها كانت بواحة الأدب الشعبي
لأن بإعتقادي هو المختص بالقصائد اللي مثل كذا
عموما
تسلم أناملك على النقل
تحياتي
أختك
قصيمية