قصيده على الله >>للشاعر عبد الله بن عمير

احب اشارك بقصيده للشاعر المبدع عبد الله بن عمير

على الله يازمن بشكي جروحي والليالي طـوال 00عسى راعي العنا ينسى عناه وينشرح صـدره

على الله يازمن بشكي همومي والهموم جبال 00تعدّت عاصمة حزنـي حـدود العالـم بأسـره

خساره يالسنين اللـي كتبتـي سيـرة الرحـال00 فرحت أمس وحزنت اليوم بس الخوف من بكره

لساني كم شكى صمته والى منّه حكى ماقـال 00طغى طبع السكوت بسيرة المحروم من صغره

سقى الله يوم كنت اضحك وبالي مستريح البـال 00ضحوكٍ ماعرفت الحزن وش معناه وش قـدره

وكبرت وكبرت أحلامي وصارت قصة الترحـال 00أماني في مهب الريح وحلـمٍ ماكتمـل بـدره

بعذر اللي مع أيامه جلس يبكي على الاطـلال 00تذكر ماضي أفراحـه اليـن خنقتـه العبـره

.عزيزه يالعيون اللي حضنتي دمعـة الرجّـال 00حبستي دمعته بين المحاجر يوم ضاع امـره

عزيزه يالحروف اللي سكتي والكـلام يقـال 00حكيتي.. ماشكيتي الهمّ وهمّ القلب ياكبـره

وعزيز النفس لو يصبر على صبرالليالي نال 00ابصبر والرجل يصبر ومقياس الرجـل صبـره

وانا منهو فقد صوته وبعض الصوت به مـازال00 دعيـت الله يفرّجهـا علـيّ وبحَّـت النبـره

انا منهو حمل همّه على راسه تقـول عقـال00 مجاديف الزمن دارت عليه ونَسّـف الغتـره

أشيل الحمل عن غيري وحملي صار ما ينشال 00كما الشيخ الهزيل اللي مشيبه منقضٍ ظهـره.

جروحي مزنةٍ منها هطل فيض الشعر همّال 00سقت جدب العروق اللي تبلـل ريقهـا قطـره

وعن حر الزمن صارت حروفي للجروح ظلال 00تذرّت عن هبوب الياس حلمٍ قد بنـى قصـره

عساها للمطر روحٍ بها وادي الظما ماسـال 00عروق سنينها جفّت وورّاها الزمـن غـدره

عساها للمطر روحٍ قضـى مرباعهـا ماطـال 00كساها ثوبها الاصفر .. وكانت تلبس الخضره
.
على الله ينجلي وقتٍ قضيته همٍ و غربـال 00ويشعّ النور في قلبٍ غشى (ليل الظَلَم) فجـره

(على الله) والولي الله وبامر الله يزيـن الحـال 00ويضحك للزمن قلبٍ مع (همومه) قضى عمره

وسلامتكم