قصيده لبدوي ابكتني.. واضحكتني

يالله عفوك لا معي بيجر ولا جوال

............. ولا عندي وضيفـه والتجـاره فاشـلٍ فيهـا

ولاعندي شهاداتٍ ولاحرفه تسد الحال

................ ولا حـظٍ كبيـر لا اخطـت الجـره يقديهـا

مخابي الثوب تومي مادخلها من زمان ريال

............... بها فاتورة الكهرب ولا يمديني اقضيهـا

علىذيك العراوي تتعب الحادي مع الجمّال

............ ثلاث اشهور فالورشه وشهرينٍ مغطيهـا

ابيها لو تجمّل يوم واجلبها على الدلاّل

............... يجيها واحـدٍ حظـه مثـل حظـي ويشريهـا

نصيت العسكريّه يوم قالوا للنظام رجال

............... وقدّمت الملـف وصـورةٍ متشخـصٍ فيهـا

خذا الاوراق مني واحدٍ ما عند ابوه دلال

........... سلوم الناس واهل المعرفه والطيب مخطيها

قراها في دقيقه والتفت عجلٍ علي وقال

........... شهادتك العظيمه يا ولد وين انـت مخفيهـا

هزّيت الراس ماعندي تقول اني من البنقال

............. وقمت احب خشمه واطلبـه بالله تمشّيهـا

حذفها من يده شين الطبيعه والنبا والفال

................وقال ازين تعـوّد صـوب نوقاتـك تعشّيهـا

تناوشته من الكرسي وعفت الحل والترحال

...............وضربته بالبياله عقب ما بيّحت شاهيهـا

خذوني للسجن لا نيب لا ظالم ولا محتال

..................مجرّد واحدٍ جـا يكحـل عيونـه فيعميهـا

ويوم اني خرجت اقفيت لارض الله وسيع الجال

..................... على برٍ هواه يداوي العلّه ويبريهـا

ادوّر قصعة الجربوع والظب الفتي يختال

.............والارنب يا شفاة الروح ما احلاها وطاريها

بلا كهرب ولا بيجر ولا غازٍ ولا نقّال

.............. قوانين الحضاره لا تبـي شوفـي ولا ابيهـا