قصيده مؤثره

عتاب بين أب وابنه

يا ابوي أنا جيت لك والنفس ندمانــــــه = وفي القلب نار تشب وتشعل أشعـــالي
ولدك تاه الطريق وكثرت أحزانــــــــــه = وشرب المراره وغيره يشرب الحــالي

رح خل ينفعك من طاوعت شيطانــــــه = صاحبك راعي الوفاء اللي ماله أمثالي
صديقك اللي يعدك ثالث أخوانــــــــــــه = وشلون خلاك وقت الضيق للصـــــالي

يا ابوي عطفك رميت الروح باحضانـه = ونثرت دمعه تجي لنشاب الأهـــــوالي
لا عاد تذكر لي الماضي وخلانـــــــــــه = راحوا وشفني وحيد جالس لحــــــالي

غرتك دنياك والأيام خوانـــــــــــــــــــه = رضيت بالصحبه الحسنه بالأنــــــذالي
وأغضبت أبوك وفضحته بين جيرانـــه = ونزلت راسه وهو فيما مضى عــــالي

أنت السبب في الخطأ وأنا أدفع أثمانـه = أهملتني وانشغلت بجمع الأمــــــــوالي
خليتني للهوى وابليس وأعوانـــــــــــه = يلعبي الجهل من جال الى جــــــــــالي

أنا أجمع المال وأتعب حيلي من شانـــه = قرش على قرش وريال على ريـــــالي
واشري لك اللي تبي من وسط دكانـــــه = وتختار سيارتك لوسعرها غــــــــــالي

يا ابوي أنا جيت والعينين غرقانــــــــه = تائب عن الذنب وارجي رحمة الــوالي
السجن قطع فؤادي صمت جدرانـــــــــه = وظلمة زواياه عنها موتي أشــــــوالي

تعال ياروح أبوك ونبض وجدانـــــــــــه = لا عاد تشكي وتبكي يابعد حــــــــــالي
الذنب ذنبي وصار وشفت برهانــــــــــه = وقررت أخلي الطمع وأهتم بعيـــــالي

أستغفر الواحد المعبود سبحانـــــــــــــه = ومن رفقة السوء أحذر كل الأجـيـالي
وانا اوصي الأب من فضله واحسانـــــه = لا تشغله عن عياله كثر الأعمــــــالي