صباح الخير يا بنات

مادو

انا عملت الهمبرجر بتاعى

1/2 كيلو لحمة مفرومة ونص كوب برغل منقوع وكل البهارات اللى عندى وبودرة توم وماحطتش بصل وبياض بيضة لانى قريت انه دة اللى بيخليه ما يكشش

وطلع حلو وقوامه نفس الهمبرجر بس الطعم مش همبرجر اوى بس كان حلو يعني بس حسيت انه عايز بهارات اكتر مع انى حطيت كتير:hahaha:


والبطاطس الكروكيت حلوة كمان

انا بسلق بطاطس واهرسها واحط عليها زبدة وحليب وملح وفلفل وتقلبي وسيبيها شوية في التلاجة نص ساعة كدة

وبعدين طلعيها اعمليها صوابع وقلبيها في بيض وبقسماط وشيليها في الفريزر تنفع جنب الاكل او في العشا وخفيفة جدا ولما تتقلي بتلاقيها مقرمشة من برة وطرية من جوه جربيها بالطريقة دى هتعجبك

انا مرة عملتها في عزومة يعني طبق جانبي كدة لقيتها عجبت الناس اوى وخلصت كلها ما شاء الله

نرمين

يومياتك مشجعة وباين عليكي شاطرة في الاكل ما شاء الله

حكاية القصدير سمعتها في برنامج اسمه صحي وسريع و بتقدمه واحدة اخصائية تغذية قالت انه مفيش ضرر من القصدير مع الاكل الا اذا كان الاكل في مادة حمضية يعني في ليمون او طماطم لانه بيتفاعل معاها

ولكن انا رايي انه الاحتياط واجب برضه وبلاش انه يلمس الاكل


يومياتى بقى

امبارح

غرت من البت مادو ومسحت الصالة بس بديتول ما قدرتش اكمل

ونظفت الحمام

وعملت محشي عشان النهاردة

و عملت اغدا سريع جدا بيتزا على الصاج حلوة اوى وخفيفة يا بنات

وطعمها مختلف

وطريقتها تعملى عجينتك اللى انتى عايزاها بس بدون زيت وتسيبيها تخمر و بعد ساعة تحطى عليها معلقتين زيت وتكوريها كور صغيرة وتسيبيها ترتاح شوية وتجهزى حشوتك

تفردي كل كورة و تسخنى طاسة تيفال عندك او حاجة ما يلزقش الاكل فيها وتحطى العجينة ولما تبقى دهبي من تحت تقلبيها على الوش التانى وتحطى الحشوة وخلاص تشيليها لما الوش التانى يحمر

انا بقى دخلتها الفرن كمان شوية عشان تسيح الجبنة

جربوها

وااااااااااااو ايه كل الشطاره دي ماشاء الله ؟؟

يلا مش بقولكوا ان زي ما الكسل بيعدي النشاط كمان بيعدي

انا كمان اتعديت و عندي حمله نظافه النهارده

حمامات و بلكونه و كله

بس للاسف مش عرفه اقرب للدولاب مع انه شبه عش قطيط ههههههه

بجد مش بطيق موضوع تطبيق الهدوم و توضيبها

قولولي بقى طريقه سهله عشان اتشجع على الدواليب


المهم طبعا مش قادره اقلدكم في شطاره الاكل لان الموضوع عندي بقى بظرميط

اصلنا خرجنا امبارح و كنا بنتصور مع ابني و كدا

و فوجئت بصوري الجميله

طخنت جداااااااااااااااااااااا

اصلي بعرف نفسي من صوري

فبجد مش هينفع اطنش اكتر من كدا و انتوا كلكوا شكلكوا نسيتوا الريجيم و مديينها عيش و بيتزا


هو فعلا على راي مادو و عروس العيش في البيت بيدي احساس بالبركه كدا و الفرحه


و جوزي بيقوللي لما باجي من بره و اشم مخبوزات بفرح كدا و بنتعش

بس هعمل ايه مجبر اخاك لا بطل

يلا بقى حد يتجدعن كدا و يبدا ريجيم

بقولكوا ايه يا بنات

عيد ميلاد يويو قرب و عايزه اعمله بس مش عارفه اعمل ايه بالظبط

ياريت اقتراحات

لان حتى التقديم و الديكور مش بعرف اعمله خالص

فبجد عايزه افكار و تقولولي مثلا احط اطباق ايه و المشروبات تتحط فين و ازاي


يعني كله

السلام عليكم ورحمة الله وبركاته
فعلا يا مادو بيصعب عليا جدا الاقى موضوعنا فى الصفحه التانيه
فين البنات وفين النشاط يارب يكون المانع خير
عطر كلنا محتاجين ريجيم مش عارفه ما عنديش عزيمه ليه تعالى نشجع بعض
نبدأ بتقليل النشويات لانها هى سبب السمنه وبلاش معجنات وفطاير لاننا بنضعف
خلينا نكتر من السلطه والخضار وبلاش رز وخبز لانه سبب المشاكل كلها
وعقبال مية سنه ليويو
مادو سيبانى لوحدى ليه وحشتينى
يومياتى تنظيف وترتيب وكنس البيت وغسلت الحمام يوميا بغسل الحوض والتواليت
والبانيو يوم ويوم ومره فى الاسبوع تنظيف شامل جدران وارضيه وتنظيف الشفاط
وعملت غدا مقلوبه وكيكة جزر الولاد طلبوها تانى لانها عجبتهم
بنات انا من امس جربت طريقه حلوه ان شاء الله فيها فائدتين
انى يوميا احفظ خمس آيات من المصحف واصلى بيهم منها تثبيت الحفظ
ومنها ان شاء الله تساعد على الخشوع فى الصلاه لانها بتكون صوره جديده
والقراءه بتكون بتركيز ربنا يعنا جميعا على حفظ كتابه الكريم ويرزقنا لذة الخشوع فى الصلاه
شوفو الرابط هو كلامه مش جديد علينا كلنا لكن القلب محتاج دايما للتذكره
http://forum.hawaaworld.com/showthread.php?t=1453763