السلام عليكم ورحمة الله وبركاته
ملاحظين مواضيعي كثرت بهالقسم خخخخخخخخ
هذي الله يسلمكم طريقة القرصان المعتمدة عندي وعند اهلي ودايم نسويها وزوجي يطلب اسويها له احيانا مرتين في الاسبوع من لذتها :p وان شاءاالله انكم تسوونها وتعجبكم ...
وانا نزلت هالموضوع للعضووة ( أحب الخير1) لانها طلبت اسم محل قرصااان
وبصراحة مافي زي قرصان البيت اذا ضبطتيه زييييين:cook: مابتحتاجين تشرين من برى
والطريقة سهلة جدااا ان شاءاالله :cook:
اول شي اعذروووني ماصورت بالتفصيل كل الخطوااات بس خطواتها سهلة مابتلاقون صعوبة باذن الله
المقادير :
زيت .. بصل.. كمون .. فلفل اسود .. كركم ..بهارات اسنااااد ===>>>روووعة هالبهاار
بهارات عدلة: هيل -قرنفل-قرفة-ورق غار
ملح
حبة طماطم مطحونة مضاف لها شوية موية
صلصة طماطم تقريبا ملعقتين كبار
خضاار مشكلة (جزر-بازيللا-فاصوليا خضرا-ذرة-بطاطس -باذنجان) وطبعا هذا حسب الرغبة
خبز قرصان وانا استخدم الخبز اللي من هرفي اذا انتم في الرياض في مخابز هرفي عندهم خبز رقاق ابيض روووعة وحلو انك تخلطين ابيض واسمر
او كمان عند بنده خبز ابيض رقاق مررره حلو بتلاقونه في قسم المخابز
واكيد اللحمه مقطعة صغااار عشان تستوي بسرعة
الطريقة:
أول شي تحمسن البصل عالزيت وتحطين معاه البهارات المطحونة والعدلة
وتخلينه لين تطلع ريحة البهارات بعد كذا تضيفين اللحمة وتكونين غاسلتها قبل بموية وملح
ونحركها مع البهار لين تتسبك ثم نضيف الطماطم المطحونة مع الصلصة
ونخليها تتسبك حوالي 5 دقايق
نضيف عليهم موية حاارة ونضيف ملعقة اكل ملح ونغطي القدر وكل فترة والثانية تشيكين عالقدر اذا يحتاج موية
هالخطوة بتاخذ منك ساعة ونصف طبعا عشان يستوي اللحم زين وحلاته اللحم يكون ذااايب ولييييين
بعد ماخلاص تستوي اللحمة نضيف هنا الخضار في القدر وطبعا مابتاخذ اكثر من عشر دقايق الى 15 دقيقة بالكثير
ولما يستوي كل شي ضيفي آخر حاجة الخبز وكسريه قبل طبعا مو ترمينه بكبره
وخليه شووي الخبز يلين حوالي 5 دقايق ع نار هااااادية:time:
وخلااااااص
بس آخر شي .. عشان تكمل طبختك تمام تمام وماعليها اي كلام
سوووي كشنة بصل مبهر بالبهار اللي تبين مع عودين قرفة ورشيه على الوجه وقت التقديم
وهذي صوورة للقرصان بالخضار
وهنا صورة ثانية للقرصان مع البطاطس واللحمة فقط
وبالعافية عليكمــ
واللي تستفيد تدعي ان الله يسخر لي زوجي ويخليه لي وولدي ويحفظ اهلي من كل شر
والف شكر يالغلا