قلبي فارغ أحتاج شخص يشاركني حياتي

السلام عليكم


بنات بفضفض وبقول كل اللي بخاطري واتمنى تقرأون كل شي للنهاية
انا كم شهر وادخل 22 سنة
مشكلتي هي قلبي فارغ .. من كل شي احس روحي منطفية
مو إكتئاب لا
عندي مشاعر وعاطفة جياشة مدري وين أوديها
ماعمري إنخطبت تخيلوا بس ماعمري انخطبت
اللي يقهر ويحز بالخاطر اني دايم اكون وسيط بين إثنين يعني انا دايما الناس تسألني عن صديقاتي اذا بيخطبونهم
يسألوني عن اخلاقهم وكذا .. شي يحز بالخاطر يحسسك ان فيك بلا
ومرة رحنا زواج وكانت جنبي عجوز تسولف معي وتاخذ وتعطي
واخر شي اشرت ع بنت خالي اللي جنبي قالتلي هذي مخطوبة؟ قلتلها لا وسكتت
هذي الأشياء تحسسني ان فيني بلا
مع ان مافيني شي
انا جدا جميلة بتقولون اكيد تبالغ ماابالغ بشي ع الأقل انا اشوفني جميلة
ملامحي ملفتة من الناس اللي تجذب من المرة الاولى
اول سنة بالكلية كنت أعاني من البنات اللي بيقيمون معي علاقات غير شرعية
ونزلت موضوع هنا ونصحتوني ابعد عنهم
اذا رحت مكان يمدحوني
بس محد خطبني
مشكلتي سمرا بديت أحس السمار مصيبة وعيبة والمشكلة الأكبر اشوف بنات اسمر مني يتزوجون ويخلفون
وبنات عاديين يتزوجون
بنات الله حط فيني عاطفة اذا مافرغتها بزوج راح تدمرني اعرف نفسي والله خايفة على نفسي
مو قادرة أشغل نفسي بشي الموضوع مسيطر علي من كل النواحي
احيانا افكر استغفر الله ليش الله يحط فيني هالشعور ويحرمني من الشخص اللي افرغه فيه بالحلال
انشأت علاقتين مع شخصين وكلها فاشلة متفشلة من نفسي اصلا
كانت بريئة مجرد سوالف وانهيتها بنفسي وتعبت اصلا عشان اتجاوزهم وانساهم
وبكيت كثير قلت ربي بيعوضني ربي بيعوضني
كل صلاة اقول اللهم اغنني بحلالك عن حرامك وبفضلك عمن سواك
محتاجة أحب بالحلال بالحلاااال
حب ربي راضي عليه
وأهلي راضيين عليه
واكلم قدامهم
واعيش حياة سعيدة محتاجة هالشي
ماابي شي مايرضي ربي ومايرضيني عن نفسي
جتني فترة جلدت ذاتي بما فيه الكفاية وندمت ولمت نفسي
وبدأت صفحة جديدة
الحياة مغرية جداً وقبي ضعيف
الحين انا باخر سنة بالجامعة شايلة هم السنة الجاية بعاني من الفراغ
الفراغ يدمرني ينزلني تحت مايرفعني فوق
مدري ايش جالسة اقولكم انا فعليا متشتتة
بس ابي احس اني مقبولة ومرغوبة وابي أحط مشاعري بالشخص اللي يسوى
وربي شاهد اني تركت كل شي مع ان كل شي متاح أمامي لوجهه
بس الموضوع صعب... صعب جدا
بنات اكتبولي اي شي يهون علي ويقويني ماابي انجرف واحطم حياتي بنفسي..