قلبي محروووووووووق مره

السلام عليكم لوسمحتو يامشرفات خلو موضوعي لو بس يومين ثلاث وبعدها بكيفكم لو حتى تحذفونه
عندي اخت زوج حارقه قلبي وقبل لا ادخل بالتفاصيل بقولكم نبذه عنها هي جميله مره كل اللي يشوفها يقول عنها جمال ماتحضر زواج الا وتنخطب من جمالها وانا شخصيا سألوني عنها كثير اخت زوجك كم عمرها ووش طلباتها لو خطبناها ومن هالكلام نجي لطبعها عندها عنصريه شديده من ناحية الجمال لو انتي مزيونه تحبك وتموت فيك اما لو انتي عاديه او مافيك جمال تكرهك ولاتفكر تقرب منك بتقولون معقوله بهالزمن احد يفكر كذا ؟ وربي تفكيرها كذا وادهى من كذا كارثه اخت زوجي ذي لدرجه كل اللي تصادقهم من جماعتنا بس المزايين ماعندها ولا صديقه من داخل جماعتنا عاديه او شينه كلهم ملكات جمال ومو بس كذا تصير لهم سجاد

تموت بالحلوين صحيح كلنا نحب الجمال لكن مانكره اللي ماعندهم جمال حرام هذه اسمها عنصريه واخت زوجي عنصريتها فاقت كل الوصف تخيلو عندي 7 اخوات ثنتين منهم جميلات مره والله لاصقه لهم دايخه عليهم بتنجن بكل مناسبه ماتجلس الا جمبهم كنها تتفاخر انها جالسه جمبهم ولاتقولون يمكن بتخطبهم اخوان زوجي كلهم متزوجين

ومن جماعتنا في وحده ملكة جمال اكبر من اخت زوجي ب15سنه واخت زوجي لاصقه لها لصقه ومصادقتها مررره حتى زوجي يقول اختي مسعبله على فلانه بتنهبل عشانها جمال وعندها صديقات من بره جماعتنا دايم توريني صورهم كلهم صواريخ صواريخ مستوى عالي من الجمال وحبها للجمال يمس حتى كرامتها انا متزوجه من 6 سنوات وياما اشوفها ترد عاللي يحارشها وانا ياماصار بيني وبينها رمي كلام بس من تحت لتحت لو عطيتها نص كلمه ترد علي رد وش كبره بكل ثقه وقوه فخذيت عنها فكره انها قويه وماينقدر عليها لين مره صار بينها وبين بنت عمي هوشه بنت عمي رمت عليها كلمه بسييييييطه واخت زوجي صارت انواع الرجفه والتلعثم وصارت تبلع الحروف ووجها الوان وانا عيوني طايره هذه اخت زوجي وين قوتها ؟ المهم بنت عمي ذي جمييييله مره عشان كذا اخت زوجي ضاعت

هذه نبذه عنها وهي حره بذوقها وعلاقاتها بس لما تجي لشي يخصني هنا انقهرت وكتبت الموضوع ابي حل انا عندي ولدين الكبير عمره سنه والصغير كم شهر ولدي الكبير حياتي ملامحه عاديه اما الصغير مزيون طلع لاخواتي كل من شافه قال ماشاءالله مزيون طالع لاخواتك اخذ جمالهم المهم اخت زوجي طول عمرها حاقره ولدي الكبير مطنشته مايوم عطته وجه ولاحتى تبتسم له كنت ماازعل ولااخذ بخاطري على بالي ماتحب الاطفال حتى ام زوجي ترقع لبنتها تقول بنتي ماتحب الاطفال لين جبت ولدي الصغير انقلبت وحده ثانيه ولدي الصغير ماينزل من يدها طول ما حنا مع بعض تاخذه مني تقول هاتيه شايلته على طول وتلعب منه ومنجنه عليه تلعبه وتضحك له قدام ولدي الكبير
والله ياما شفت منها تفرقه وعنصريه بين اولادي حرقت قلبي والله اني من القهر احيان ماانام بالليل

كلمتها اول مره قلتلها اشوفك ماتلمسين ولدي الكبير ولاتلعبينه تقول الحين بلمسه وتطنشني وتكمل لعب مع الصغير قووويه معي تعاندني ولاتخاف
وكلمتها للمره الثانيه بابتسامه عشان كذا تستهتر فيني قلتلها انا مااحب التفرقه ياتحبين عيالي كلهم يابلاش تطنشني وكأن محد يتكلم

لما نزورهم على طول تاخذ مني ولدي الصغير والكبير طناش تام حتى يوم كان صغير نفس اخوه عمرها ماشربته حليب ولاحطته بحضنها يوم لكن عشان الصغير جميل ميته عليه مو حاسه بنفسها هي نقطة ضعفها الجمال

مره زرناهم على طول وانا لسه بعبايتي قالت هاتيه قلتلها وليه ماتاخذين فلان قالت الحين وطنشتني وكملت لعب مع الصغير
ولدي الكبير من صغره للان ماتقرب منه ابد وكأنه نجاسه

وكلمت اهلي واستغربو لان يدرون ماعمرها لمست ولدي الكبير وانقهرو قالو ماتستحي تفرق بين الاطفال واللي غبني وموتني الف موته ان ام زوجي تدري اني مقهوره من تفرقتها قامت يوم قابلت امي تقولها ان ولدي الصغير مايعرف له ولايفهم له الا فلانه (تقصد اخت زوجي) تبي تدافع عن بنتها شايفه بنتها متعلقه بولدي ف تبي تفرح بنتها وتنولها مرادها

ومره ولدي الصغير بكى جاتني ام زوجي قالت عطيه فلانه مايعرف يسكته الا هي تقصد اخت زوجي ! انا عيوني طارت قلتلها لاانا ادرى بولدي

معليش انا ماعندي استعداد ولدي الصغير يكبر ويتعلق فيها اكثر مني عشان حضرتها ماحبته الا عشان جماله والله احيان يجي من عندها يبكي يبيها انا امه اموت فيه لانه ولدي مو احبه عشان سبب سخيف زي سببها هي
وبنفس الوقت ماعندي استعداد ولدي الكبير نفسيته تتأثر تلعب مع الصغير قدام عيونه وهو ياعمري يناظر والله اني ارجع بيتي اصيح يمين بالله اتذكر شكله عمره سنه ياناس تتعنصر عليه عشان ماعنده جمال اخوه حسبي الله ونعم الوكيل عليها مغبونه منها بموت من القهر تعامل الناس بأشكالهم قلنا معليش لكن توصل للاطفال ؟ والله من وهو صغير ماكانت تلمسه ولاتحط يدها عليه اما ولدي الصغير مجننها نفس مايجننوها بنات جماعتنا الحلوين وصديقاتها اللي تختارهم على حسب جمالهم مو عارفه كيف اتصرف معها ماعندي استعداد اخسر ولدي الصغير يحبها اكثر مني عشان سبب سخيف ولا تنجرح مشاعر ولدي الكبير ويحس انه منبوذ اللي عندها حل تعطيني اياه