السلام عليكم ورحمة الله
في البداية احب اذكر اني ماكنت ناوية اقول لكم السالفة لاسباب كثيرة احتفظ بذكرها
لكن بعد ماحصلت التطورات في الموضوع تأثرت جدا حبيت اذكر لكم القصة لعل هذي رسالة تصل لكل مطلق ومطلقة وزوجة اب
السالفة ان فيه ولد يدرس مع ولدي بالمدرسة ولاحظ ولدي عليه انه كان منزوي لوحده ولا يلعب مع بقية الاولاد بالمدرسة
وفي يوم جاء ولدي عنده وحب يتعرف عليه
فالولد استغرب وقال انت متأكد اانك تبغى تتعرف علي..؟؟؟ انا محد يحبني
قاله ولدي ايه انا اشوفك لحالك وحبيت تجي مع مجموعتنا ونكون اصدقاء واي شي تبيه لا يردك شي...الولد ياعمري فرح وتنهد وشوي الا ويقول قصته لولدي
يقول انا امي مطلقة ولي سنين ماشفتها حتى اني بديت انسى شكلها...وابوي حارمني من شوفتها ورافض يوديني لها
ويقول ان امه مريضة ولا تقدر تجي تشوفه وابوه مانعه انه يكلمها... حتى انه ما يعرف ارقام اقاربه...ولا عنده اصدقاء... من البيت للمدرسة ومن المدرسة للبيت ..
وهو الان عايش مع ابوه زوجته ولا عنده اخوان..
لما سأله ولدي عن علاقته بأبوه قال ابوي يحبني لكن زوجته قاسية
فأنا ممنوع من الطلعة بسبب زوجة ابوي وطوووول اليوم لوحدي بالبيت...وابوي يأيدها بكل شي تقوله ضدي
قال له ولدي طيب تقدر تجي تزورني نلعب مع بعض قال ما اقدر هم يرفضون
المهم بعد ايام حصلت للولد مشكلة سلوكية في المدرسة وكتبوه تعهد وقالو بنبلغ ابوك
الولد قعد يصارخ بقوة وينزل يبغى يبوس رجلين الوكيل يقول تكفى ابوي لايدري لانه يشك فيني...ويصارخ بقوة حتى ان كل اللي بالمدرسة سمعوه
انا عقبها اعصابي فلتت...واتصلت على المرشد ابغى اتطمن على وضعه
قال المرشد:هذا الولد مسكين وواضح انه يعاني من الحرمان وعزله وحنا كلمنا ابوه لكن مافيه فايدة والسلوك اللي سواه اول مرة يحصل منه لانه ولد خلوق
قلت له طيب عطني رقم امه او اي احد من اقاربه لازم يدرون بوضعه اخاف لو الوضع استمر الولد ينحرف قالي هذي امور عائلية وحنا مانقدر نتدخل..قلت الله يجزاك خير المسلم للمسلم كالبنيان..ومن لايرحم لايرحم اذا ماحسينا بهالصغير من يحس فيه قال انتي جزاك الله خير ماقصرتي لكن مابيدنا حيلة والولد هذا ضحية ابوه
قلت له استحلفك بالله اذا احتاج اي شي او احتجتوا اي مساعدة بلغوني
وسكرت الخط وقلبي يحترق
والله اني من يومها وانا بس افكر فيه والدم يغلي بعروقي..
وحاسه بغصه وكل ذكرته تخنقتني العبرة وجلست ابكي..حتى نومي صار كوابيس
تمنيت اني اجيبه عندي واعوضه عن كل حرمان
صرت اذا اكلت قلت ياترى هو قاعد ياكل
واذا نمت قلت ياترى هو نايم..؟؟؟
واذا لعبو عيالي وانبسطوا قلت ياترى هو مبسوط..؟؟
جلست اوسوس وافكر بحلول جنونية...ثم تراجعت ودريت اني بغابه الكبير ياكل الصغير
كرهت نفسي وكل شي..كرهت الناس كيف قلوبهم تحجرت وماعد احد يحس بأحد
جالسين نلهث ورا ملذات الدنيا نحسب انها تجلب السعادة والسعادة الحقيقة ابسط من كذا بكثير...السعادة بالمحبة وانك تشوف اللي حولك مبسوطين ومرتاحين
اباء قلوبهم كالجارة حكم على بيته بالانهيار لاجل نفسه ومصلحته
وبكل قوة فرض على عياله حياة وام جديدة يحسب ان فيه احد يقدر يعوض حنان الام
فرق بين الام وبين ضناها واستقوى ونسى من هو اقوى منه واللي قادر يسلط عليه
نصيحتي لكل ام سلب منها طفلها دون وجه حق اقولها لاتنازلين ناضلي بكل ما اوتيتي من قوة لاجل ابنك فليس لاحد حق به منك
والله الذي رفع السماء بلا عمد لو قدر الله لي ان احرم من اطفالي اني لاقاتل لو كلفني ذلك حياتي او حتى آخر قطرة بدمي
ولا انسى قصة اختنا في هذا المنتدى اللي حاربت الكون كله حتى استردت بناتها لحضنها ولله لو حس الرجل منك كل هذه القوة لخاف وتراجع ...مادمتي على حق فالله بيكون معك...لاتقولين ما اقدر...هذي حجة الضعيف...مادامك قوية بالله فالله بينصرك غصب عليه
واقول لكل زوجة اب ظالمة...اعلمي ان الدنيا دوائر ومافعلتيه بذلك القلب الصغير والله سيكتب صغيره وكبيره فتراجعي قبل ان تقول نفسك يا حسرتها..قبل ان تري صنيع فعلك بدنياك قبل آخرتك
واقول لكل زوجة اب كانت القلب الرؤوم لذلك الصغير اقول طبت وطاب ممشاك..اسأل الله ان لايحرمك الاجر وان تجدي بركة عملك في ابناءك وان تلاقي ربك وصحيفتك باليمين
بالنهاية اقول لذلك القلب البريء الذي حرم من امه
اسأل الله ان يردك اليها عاجلا غير آجل وان تقر بها عينيك وان تقر عينيها بك
واسأله تعالى ان يحنن قلب والدك عليك وان يصرف عنك اذى زوجة ابيك وان تخاف الله فيك
اللهم اني استودعتك اياه فاحفظه يامن لا تضيع ودائعه
احب السفر بس مطفرة @ahb_alsfr_bs_mtfr
عضوة نشيطة
يلزم عليك تسجيل الدخول أولًا لكتابة تعليق.
ام تك تك
•
اه قلبي تقطع تذكرت ولدي الله يكون بعون هالولد بس تكفين لا تنسينه من مصروف مع ولدك والله يجزاك خير والله قطعتي قلبي الله يحنن قلب ابوه يارب
بالنهاية اقول لذلك القلب البريء الذي حرم من امه
اسأل الله ان يردك اليها عاجلا غير آجل وان تقر بها عينيك وان تقر عينيها بك
واسأله تعالى ان يحنن قلب والدك عليك وان يصرف عنك اذى زوجة ابيك وان تخاف الله فيك
اللهم اني استودعتك اياه فاحفظه يامن لا تضيع ودائعه
امييييين يارب العالمين
اسأل الله ان يردك اليها عاجلا غير آجل وان تقر بها عينيك وان تقر عينيها بك
واسأله تعالى ان يحنن قلب والدك عليك وان يصرف عنك اذى زوجة ابيك وان تخاف الله فيك
اللهم اني استودعتك اياه فاحفظه يامن لا تضيع ودائعه
امييييين يارب العالمين
الصفحة الأخيرة
فعلا الدنيا لسى بخير مدام فيها ناس مثلك