قلت كلام لسلفتي مدري كيف فلت لساني ونددددمت

صباح الخير بنات حواء



قبل كم يوم نزلت موضوع

إن زوجي ما يدلعني ولا هو رومانسي ولا يحتويني

وهالموضوع هالأيام شاغلني بزوده

ما ادري وش فيني نفسيتي تعبااانة وحاسة بنقص فضيع في الحنان والعاطفة وكل الأشياء المعنوية

إلي صار أمس كنا جالسين في بيت حمولتي

وجلست مع سلفتي لوحدنا وفتحنا الانستغرام

فتحت لها حساب وحدة من صديقاتي زوجها رومانسيته تبع مسلسلات

يسوي لها مفاجآت بفنادق ومنتجعات ويفاجئها كل مرة بسفرات وحفلات رومانسية

وهي دائما تحط كل شي بالانستغرام

وقلت لسلفتي شوفي بس الرومانسية كيف

مالت علي زوجي ما يعرف يجيب حتى وردة

قالت لي علميه انتي قلت لها علمته والله وعجزت مافيه فايدة أبو طبيع ما يجوز من طبعه

وهذا شي بالدم مو انتي تعلمينه الواحد بالغصب وحتى لو علمته أحسه مجبور ويمثل

قالت لي تراه زوجي مو احسن اثنينهم اخوان ونفس التربية وزوجي بالضبط نفسه

بس أنا جديدة وكان عندي أمل إني أغير زوجي وأعلمه على الشي إلي أحبه

قلت لها جربي أنا جربت تسع سنين وما نفع وكنت ماخذة السالفة ضحك ومزح

قالت لي المسلسلات اذا ضم حبيبته تحسين في الضمة احساس قلت لها انا اذا ضمني بدون احساس اختنق وابغى بس يتركني واتنفس وكنت اضحك معه

رجعت البيت وندمت كثير إني فتحت لها قلبي مع اني ما شفت منها الا كل خير

استخرت واتصلت لها وقلت لها إلي دار بيننا لا يطلع لأحد قالت لي ولو احنا خوات ومستحيل تطلع مني كلمة

وسلمت عليها وسكرت الخط

اتصلت في اختي واختي هاوشتني وهزأتني قالت لي والله لو زوجك يدري وش قلتي عنه ليذبحك

والموضوع أكبر من هرجك ومزحك البايخ وانتي طلعتي أسرار بيتك وفضحتي الرجال والناس مو لازم يعرفون انك مو سعيدة وياريتك انطميتي

والله لو يسمعون حمولتك ليزعلون منك ويحرضون ولدهم عليك انك ملسونة ومو عاجبك ولدهم وتتكلمين عليه بالمجالس

قلت لها مو قصدي ما رحمتني وقالت لي انتي غبية علمتيها اسرارك وكشختك وبرستيجك ضاعوا تحت هالكلام البايخ إلي ماله معنى




من البارح ما نمت وافكر في كلام اختي ونفسيتي تعبااااانة

وحاسة بجبل جاثم على صدري .. ومو شاكة في سلفتي متأكدة انها ما بتقول لأحد بس انا مضاااايقة