قلت كلام ماله داعي أمام زوجي وأهل زوجي .. وما نمت طول الليل ..

مرحبا بنات ..

البارح كانوا جايين خطاب لأخت زوجي ..
لما طلعوا ..
كانت مرت أخو زوجي قاعدة .. وزوجي وأمه واخته ..

أنا لما كنت بنت جاني 20 عريس تقريبا ..
وقمت أحكي عن المقابلات إلي دخلتها ..
وعن المواقف الطريفة ..
وعن كل شي صار مع الرجال إلي دخلت معهم مقابلة ..

والحكي إلي ندمني أكثر ..
إن واحد من العرسان أخته هي إلي رفضت يتزوجني ..
طبعا ما عرفنا احنا وش السبب ..
بعدين سمعنا من ناس يقولون ..
انها شافتني حلوة .. وقالت ما نبغى وحدة تسلب لب الولد ..
وبعدين ما نشوفه .. نبغى وحدة عادية ..
وهذا فعلا إلي حصل ..

لكن هالسالفة التافهة قلتها قدامهم ..

والله فشلة .. ما أدري اشلون طلعت من فمي هالأمور التافهة ..

وبالليل زوجي شافني مو قادرة أتنفس ..
سألني وش فيك؟؟
قلت له أنا قلت حكي ما لازم أقوله ..
قال لي لا تقولين لي شو الحكي .. عرفته ..
أنا تضايقت وانتي تتكلمين عن رجال قبلي خطبوكي ..
وبيت فلان تقدموا لي .. وبيت علان تقدموا لي ..
بس تركتك تهرجين وتمرجين على كيفك .. يمكن تلتفتين لحالك ..
ومو أول مرة تقولينها .. ممكن ما تتكلمين عن أي رجال قبلي؟؟

عيلتنا هالحكي عندهم عااادي ..
بس هنا عند أهل زوجي مو عادي ..
خصوصا لو قلت هالكلام لصديقاتي مو مشكلة ..
لكن قلته قدام زوجي وأهله ..

ماني عارفة اشلون أرمم الموضوع ..
ولا أحط عيني بعيون زوجي ..
من نظراته لي .. أحسني طحت من عيونه ..
بسبب كلام المفروض ما أتفوه به ..
خصوصا مرت أخوه كانت قاعدة .. وأمه .. وأخته ..

وش اسوي عشان أرجع كل شي مثل قبل ..
كنت قبل جدا محترمة أمامه ..
ويستشيرني في أموره ..
قال لي ما توقعت هالهرج والمرج كله يطلع منك ..

كيف تفوهت بهالكلام واسترسلت ماااا أدري!!! ..

حلولكم الله لا يهينكم ..

..دانة الدنيا..