قلت لزوجي خبر حملي وصدمني بردت فعله

بنات اليوم زوجي جاء من السفر الساعه 5 الفجر ماكنت ادري انه بيجي في هذا الوقت البارح كلمني وقال بجي الصباح توي مشيت وانا حسبت المسافه والوقت على كلامه كنت متوقعه جيته الساعه 9 الصباح المهم انه جاء بالسلامه .
خليته يسلم على عياله وهم نايمين يرتاح وبعدها قال ايوه وش عندك وش موضوعك اللي كنتي بتكلميني فيه البارح .
قلتله طيب مابتصبر لحد ماتنام شوي والظهر اسولف لك قال قولي ضروري تقولين الحين قلتله اصبر لحد ماتنام وبعدين اذا صحيت وتغديت اقولك قال اخلصي قولي عصب *
قلتله طيب دقيقه بس اقوم اجيب شيء وارجع بس قبلها ابغى منك وعد ..
قلتله اوعدني ماتزعل ولا تحط اللوم علي ولا تتضايق قال طيب بس وش عندك
قمت جبت جهاز التحليل وريته وانا مبتسمه احاول الطف الجو
هو انصدم وسكت سكت سكت اكلمه ماعد يرد احاول فيه يكلمني وساكت يده على وجهه
قلتله هذا رزق من الله احمد ربي عليه والا وش بغيتني اسوي احط يدي على خدي واجلس ابكي ..
قلتله التعب كله في ظهري حمل ولاده تربيه وانت مايجيك شيء من التعب .
وبعدين حرام اللي انت تسويه تعترض على حكم الله وانت رافض اني استخدم موانع
قلتله تتذكر كم مره قلتله خلني اروح اركب لولب والا افطم ولدي واستخدم مانع وانت رفضت
وهو بس ساكت
قلتله وش فيك ساكت كذا قول شيء
لاتحسب انك زعلان اكثر مني حتى انا من شفت النتيجه انقهرت وزعلت لاكن شوي ورضيت بقدري
قال مافيني شيء خليني انام بس
وكل ماقربت منه يبعد وانا اقوله ترى مالي ذنب هذا الشيء مكتوب لي ولك من قبل مانولد
وهو ساكت يفكر
قلتله في ايش تفكر قال ولا شيء
قلتله طيب لاتسكت كذا قول شيء تكلم لاتعاملني بالطريقه هذي وانا مالي ذنب المفروض انا اللي ازعل لانك رافض اي مانع
وقلتله اصلا انا ماكنت متوقعه كذا ابدا
لاني متعوده على تأخر الدوره والاعراض المصاحبه لها قال كم لها متأخره قلت اسبوع وهي اصلا متاخره اكثر لاكن مع الرضاعه الشهرين الاخيره جتني في اليوم 34 من بداية اخر دوره وانا بالعاده دورتي كل 30 يوم كحد اقصى ..
اخر شيء قلتله ترى الحمل صار له شهر وهو مارد
وهو ساكت ذبحني سكوته توقعت انه ياخذ ويعطي معي في الكلام بس ابد ساكت وزعلان ومتضايق .
قلتله لاتزعل ولاشيء هذا رزقنا من الله ومانقدر نعترض عليه قال خليني انام بس ......😔
بنات الله يسعدكم ويحقق امانيكم قولولي كيف اتصرف معاه
اقفل على السالفه نهائيا والا انتظر وقت مناسب وارجع افتحها معاه ..
احترت كيف اتصرف معاه اقسم بالله ندمت اني قلتله ماتوقعت ردت فعله هذي وهو السبب اللي مانعني من موانع الحمل لاوبعد زعلان مني لاني حملت وكأنه شيء بيدي وانا اللي اقدر اتحكم فيه ..