قناع روعه للبشره خلى بشرتي مورده بعد ما كانت شاحبه

مرحبا بنات حواء كيف الحال حبيت اليوم اوصف لكم قناع رهيب للبشرة يخليها مورده ويغلق المسام الي يشوه البشره حتى البثور السوداء يشيلها بس اهم شيء تستخدميه يوميا عشان تشوفي النتيجه
انا صراحه كانت بشرتي شاحبه وفيها بثور وبقع كلف طلعتلي لاني حامل وتعرفو كيف تكون بشرة الحامل بس المفروض الوحده تهتم ببشرتها وماتهملها خاصه وقت الحمل وانا لما شفت بشرتي انعدمت من الحمل والكل يقلي انو شكلي مريض والله اني حزنت على حالي وقررت اعتني بيها احس اني طولت عليكم وهذه الوصفه :

لبن زبادي
بياض بيضه
ملعقة عسل
ملعقه نشا
قليل ماء ورد
وملعقه صغيرة كركم( للجسم ترى مايطلع اي صبغه )
وملعقه حليب نيدو ناشف
قلبيها وحطيها شوي في الثلاجه بعدين غسلي وجهك وصنفريه بقليل سكر نشفيه وحطي عليه الخلطه وانسدحي على ظهرك واياكي تتكلمي او تضحكي وانتي حاطه القناع ترى تطلع لك تجاعيد وابتعدي عن منطقه ماتحت العين بس حطي عليها شرايح خيار وغمضي عينك واستريحي وياريت لو تستغفري وانتي مستلقيه على ظهرك لان الاستغفار سبحان الله له عجايب راح تحسي انو كل جسمك ارتخى و ارتاح من الشد وراح يبان هذا على وجهك المهم اذا حسيتي انو القناع خلاص نشف روحي للمغسله وابداي بفرك وجهك بشكل دائري لين ينظف وجهك من القناع وركزي على المناطق الي فيها كلف او بقع حبوب بعدين اغسلي وجهك بماء بارد وامسحيه بماء الورد والي تحس انو بشرتها مره نشفت
تجيب نقطه نقطه مو كل العلبه زيت زيتون وتررو بسرعه على المناطق الي مره نشفت وزي ماقلت نقطه موتخلي وجهك يلمع ولاتنسي عيونك حطي عليه كمادات ماء الورد البارد
وشوفي كيف راح يسير وجهك اذا استمريتي عليه كل يوم والله انا حسيت بالفرق حتى بقع الكلف فتح لونها والحبوب الي تطلع مع الحمل معد شفتها ماشاء الله والمسام المفتوح اغلق وسار وجهي ناعم ويلمع والكل لا حظ التغير في وجهي سرت اكثر حيويه وجما ل بعد ما كنت شاحبه وكاني مريضه
يالله جربوه وادعولي دعوه حلوه