هالصينية الله يسلمكم سويتها من فترة ومن يومها متعيجزة اصغر الصور واحملهم
المهم اني يومها طلعت لحمة مفرومة من الفريزير على اساس ابسوي داوود باشا
ويوم جيت اسوي الغدا قلت بلاش داوود باشا << كنا ماكلينها قبلها باسبوع :42:
قلت طيب ياربي وش اسوي بالمفرومة
وتذكرت اني دايم اقرأ في المنتدى قوارب البطاطس .. قوارب الكوسا .. قوارب الباذنجان ... الخ من اسطول القوارب :hahaha:
وقلت ليه هم يسوون قوارب بكل شي وانا لا ؟؟ وش زودهم عني ؟!! :42:
وعاد سويت هالصينية وطلعت لزيزة ومميزة وعيالي اعجبتهم مرررة
وكالعادة بقولكم المقادير والطريقة مع بعض
والصور باذن الله راح توضح لكم اكثر
يلا بسم
اول شي طبعاً البطاطس
تجيبين بطاطس والكمية على حسب عدد الاسرة طبعاً
وتقسمينها نصين بالطول وتفرغينها على شكل قوارب
وتحتفظين بالبطاطس اللي تفرغينها من الداخل
بس اهم شي انك تفرغينها مضبوط
يعني مطلوب تكون قوارب البطاطس رفيعة نوعاً ما
انا صارت عندي حبتين بس سميكة شوي و تحسينها كنها مو مستوية
بس الباقيات كانو تمامممم
بعد كذا تقلين قوارب البطاطس وكمان لب البطاطس اللي فرغناه
بعد كذا تحمرين بصل جوانح في شوي زيت + ثوم + مكعب ماجي
بعد كذا تحطين لب البطاطس اللي فرغناه من قوارب البطاطس على البصل وتقلبينهم
وتضيفين لها ملح وبهارات مطحونة مشكلة ( كمون .. فلفل اسود .. كزبرة ناشفة ..شووووي كركم )
بعد كذا تحطين طماطم ( مكعبات صغيرة ) على البطاطس وتقلبينهم
واذا حبيتي ممكن تضيفين ملعقة معجون طماطم ( انا ماحطيت )
يـ ـ ـتـ ـ ـبـ ـ ـعـ ــ ــــ
بعد ماتذبل الطاطم تطفين عليها النار وتصبينهم في الصينية
بعد كذا تصفين قوارب البطاطس فوقهم
بعدين تكونين مجهزة لحمة مفرومة ..
( لحمة مفرومة + بصل مفروم ناعم + بهارات + ملح + ماجي )
ممكن تضيفين شوي كزبرة وبقدونس اذا حبيتي تطلع احلى بس ماكان عندي يومها
بعد كذا تحطين اللحمة المفرومة على البطاطس بحيث انها تكون في كل حبة شوي مفرومة
بهالطريقة
وتدخلينها الفرن لمدة 15 دقيقة تقريباً
بعدين تطلعينها وترشين عليها جبنة مبشورة موزاريلا او تشدر
انا استخدمت كرافت ( افضلها على اي نوع )
وترجعينها الفرن شوي بس تذوب الجبنة وطلعيها
( وعلى فكرة انا تندمت اني ماحطيت طماطم مع المفرومة اتوقع راح تطلع اطعم
وكمان شكلها بيكون احلى والجبن ذايب عليها ) :09:
وصحتين والف عافية