بدخل بالموضوع على طول
تعرفون قوارير الموية الكبيرة اللي تنحط للبراد
عادة تجي زرقاء وفية برضو البيضاء
شوفو
انا اتكلم الان عن البيضاء ( مثل اللي بالصورة ...الثانية يسار)
كان زوجي يجيب لنا موية من هالنوعية من القوارير واصبها بالزرقاء واحطها على البراد
لان البيضاء تنطعج اذا حطتيها على البراد
المهم وعلى هالحال الى ان تجمع عندي فوق الـ 100 قارورة
عطيت الوالد اغلبيتهم يستفيد منهم بالمزرعه
والباقي فكرت وشو اسوي به
طلعت افكار كثيرة لكن هالفكرة بس طبقتها
تجيبي القاورة
وتجيبي مقص ...وتقصي القارورة من فوق فقط اللي على شكل مثلث تخلصي منه مانحتاجة
راح تعطيكي اسطوانه مثل السطل تقريبا فية مسكة على جنب
تعملي في قاعده الاسطوانه ( صار مثل السطل )ثقب بحجم اقل من فوة فنجان القهوة ( بقول لكم مع الخطوات ليش ) حاولي تكون الفتحات في جميع الاسطوانات في مستواى واحد.
وتحطي القاورة على جنب
وتجيبي قارورة ثانية وثالثة ورابعه وسوي فيها مثل الاولى بالضبط
بعد كذا جيبي مسدس السليكون وثبتي وحده على الثانية بحيث تعطيك مثل العامود
ثبتيها صح
وحطي عليهم الثالثة وارابعه وراح يعطيك عامود
بعد كذا جيبي صحيفة بيضاء ( ايام المدرسة واللوحات البيضاء والملونه اللي تجي بريالين ثلاثة ) وتلفيها على العامود وتثبتيها بالسليككون
وتجيبي وحده ثانية برضو تثبتيها وممكن تحتاجين ثالثة لان بعض المحلات يقصون اللوحه ثنتين وتكون صغيرة
الى ان تعطيكي اسطوانه بيضاء
بعدين تجيبي القماش اللي يعجبك وتلفية على العامود وتثبتية بالسليكون
تجيبي قماش لو ثاني او شاريط الساتان القماشية وتلفينها على قاعده العامود وفوق بالقمة للعامود
بعض شارئط الساتان ماتجي عريضة ... لذلك حاولي تشترين اعرض شي وحطي وحده جنب الثانية وثبتيها وبتكون عريضة
خلصنا من العامود
الان نجيب فلين على شكل مربع او دائرة ونرتب فية ورود لونها تناسب العامود والكنبة والخلفية ونخليها على جنب
الان تذكرون الفتحه اللي في قاعده الاسطوانات اللي تقريبا بحجم اقل من فنجان القهوة !!.....اختاري مكان مناسب بالبيت بتحطين فية العامود ....
وجيبي سطل فية رمل .... وحطي العامود بالمكان المناسب لك وعبي الفتحات بالرمل مشان يثبت العامود مايطيح
الان ثبتي فلين الورود اللي عملتية على القمة بغراء او مسدس السليكون
وصلوا على محمد صلي الله علية وعلى الة وصحبة وسلم وشوفو الشغل اللي سويته
التصوير من جوال لذلك مو واضحه الصورة
وبرضو اخوي لما جا يصور ماوضح الورود اللي فوق عند القماش البنفسج اللي بالخلفية طالعه روعه، لكن ماوضحها
طبعا شغلنا سويناه انا واختي واخوي هو عبارة عن كوشة لاخوي توة متزوج
كوشة بسيطة جدا لكن طلعت حلوة
استاجرنا حوش وسوينا فية الكوشة،( منصة احنا مسوينها/ كنبة خذنا حقت اختي ولعبنا فية بالاقمشة والسليكون / والخلفية سوينها برضو باقمشة ولمبات صغيرة وووووو)
كنا بنسوي ممر مشان العروسة تتمخطر علية بس الحوش مو كبير ذاك الزود ويسوي زحمة لذلك كنسلناه
واي سؤال حاضرة .