قولوا لي زوجي طبيعي والا فيه شي الله يحمينا واياكم

السلام عليكم
خواتي ماعرف للمقدمات بدخل ع طول
انا متزوجه من 6سنين والحمد لله عشت سنه ونص بكل سعاده وراحه نفسيه وجسديه والله رزقنا طفل حلو ووسيم والكل يسأل عن احوالنا لكن فجأه ومن دون سابق انذار تغيرت حياتنا اصبحت كل ابوها مشاكل وحقد وكراهيه في البدايه قلت يمكن عشان مرض ولدي اهملت بيتي وزوجي ومن ناحية 2 جامعتي وصبرت وجازفت وتحملت انواع العذاب النفسي لكن في نفس الوقت احس زوجي يحبني ومتمسك فيني عشان كذا قلت باصبر وكتب الله لي وتخرجت من الجامعه وقلت الحين ماعاد لك عذر ياحرمه دراسه وخلصتي ماعندك الا هالبيت والولد والزوج وجلست اهتم فيهم والحمد لله ماازكي نفسي ماخليت عليهم قصور والله ان ولدي يمرض واتنوم بالمستشفى شهريا واخرج وارتب وانظف واطبخ واغسل واكوي يعني اقوم بشغل البيت كله ولاعندي خدامه مع ان ناس كثير يلوموني يقولوا انتي محتاجه خدامه اكثر من اي وحده ثانيه ليه ماتاخذي (طبعا يقولوا كذا عشان ولدي مريض)فانا رافضه الخدامه مادام ماوراي شغله
المهم احس اني ماني مقصره بشي ومع كذا زوجي ماتغير رغم انه كان يقولي تخرجي وشوفي كيف ارجع زي اول واحسن ولا شفت من كلامه شي حالته في التعامل معي من اسواء لاسواء ضرب معايره اهانات تطنيش فوق هذا كله احس اني خدامه عنده وساكته لانه مو طول الوقت على هالحال من فتره لفتره وانا والله اني احترمه واقدره
وبعدين بدأت اشك انو مو طبيعي قلت يمكن بيننا حسد والتزمت بالرقيه الشرعيه والاذكار حتى اني اعطيه موية زمزم مقري عليها لكن زوجي مثل ماهو وفي الفتره الاخيره صار تجيه كتمه على صدره مايقدر يتكلم ولا يتنفس ويصير مايطيقني وقالي اذا جاتني هالحاله احس انك شيطان قدامي اكرهك مابغى اشوفك
لكني صبرت وقلت لا يمكن بس اذا زعلت علي يتغلب عليك الشيطان انت بس تعوذ من ابليس ومازالت حياتنا على هالموال
وصدمني اول امس قلي كلام ماقدرت اتحمله قلبي بغى ينفجر يابنات
تخيلوا يقولي انا احبك واعزك ويعلم الله اني ادعيلك وانتي ماتدرين لكن احيانا وانا جالس معاك اضحك واسولف اكرهك وادعي عليك من قلبي وودي اتخلص منك وفجأءه ارجع طبيعي سألته تتغير حالتك وانتي زعلان مني قالي لاوالله احيانا ما اكون زعلان ولا فيه شي يزعلني

المهم ياخواتي انا الحين بدأ ابليس يوسوس لي ان زوجي مسحور هل هذا سحر والا شي طبيعي في الرجاجيل يكرهون زوجاتهم من غير سبب
علما انه هو صارحني بحاله من غير ما اسأله واضغط عليه وهو قبل هالمره قالي احس فيني شي قلت وش هو قال مدري بس احس اني متغير وقلت له خلنا نروح للشيخ بس هو رافض هالفكره تماما
ومره قلت له انت مسحور قعد يضحك يقول من يسحرني وليش
صادق زوجي ماله اعداء ولا اصدقاء اصلا هو انطوائي من البيت للدوام ومن الدوام للبيت ومايروح الا لاهله علما انه قبل ماتبداء المشاكل كان مايروح لاهله الا نادرا والحين يوميا واحيانا مرتين ثلاث باليوم صاير يتهرب من البيت
ورغم هذا كله والله ماهو مقصر معي بشي الله يحفظه ماعمري طلبته شي للبيت او لنفسي وقالي لا يجيب كل شي بس مره مايسمع كلامي ولا نصايحي
احسه مو طبيعي انصحوني وش اسوي او كيف اتعامل معه هو دايما يشوفني غلطانك بكل تصرفاتي
سامحوني طولت عليكم
اللهم من اراد بي وبولدي وبزوجي وببيتي سوءا فاشغله في نفسه ورد كيده في نحره