قولولي وش أسوي قبل لأتسرع وبعدين أندم....

السلام عليكم ورحمة الله وبركاته .. أخواتي الغاليات في منتدانا الغالي.. حبيت أعرض لكم مشكلتي وياليت اللي عندها رأي أو حل تقولي عليه..

أنا متزوجه وعندي ولد عمره خمس سنوات وساكنه في شقه بالدور العلوي عند أهل زوجي.. وشقتي كلها ثلاث غرف وصاله ومطبخ .. غرفه للشغاله وغرفه جلستنا وغرفه لنومنا.. وطبعا ولدي ينام معنا في الغرفه وشوفوا المآسى آخر الليل ..(تحرك .. قام..أخاف يصير قايم ويشوفنا) ومن هالسوالف..

وشقتي للأسف قديمه جدا وأثاثها قديم ولا أحاول أني أروح لزميلاتي علشان ماأضطر أني أعزمهم عندي..
أما الدور الأرضي والغرف اللي فوق لخالتي ماشاء الله رمموهن وصارن جديدات..
وحماتي كانت بالبيت بشقه مثلي وماشاء الله عليها زوجها طلعها بشقه برا وسيعه وتشرح الصدر..

وأنا زوجي وعدني أنه يطلعني ببيت لحالي قبل سنه ونص ورحنا ودورنا بيوت وفرحت فرحه ماتتخيلونها ولما أشوف بيت ويعجبني يطلع فيه عيوب لين نتركه .. وبالأخير هون عن الطله نهائيا وقال إذا طلعنا نطلع لبيت ملك.. مت ياحمار..
والحين ماأبي غير أنه يرمم لي البيت ويصير مثل بيت خالتي يشرح الخاطر.. وعلى فكره أنا مدرسه وقلتله أنا اللي أبي أزين أغلب الشي..وتراي ماعمري منيت عليه أوذكرته بشي أنا جبته بالعكس ...وهذاه يواعدني له أكثر من سنه وكل أجازه يقولي الأجازه الجايه .. والأجازه هذي واعدني طبعا أنه يزين الشقه لي ويرممها مع أنها أساسا ضيقه علينا بس وش أسوي شي أهون من لاشئ..
وهالحين أشوفه كل ماقلتله يالله نروح نختار سيراميك للشقه قام يتأفف ويقول والله يأنتي غثيثه ..
وأنا خلاص أحس أني كرهت حياتي من هالشقه اللي أنا فيها ومن الأوعاد اللي أنتظرها ولا تجي ..

وهالحين ماأدري وش أسوي أحيانا أقول أروح لأهلي وأقوله ماأرجع إلا بشقه جديده أو ترمم لي شقتي..
وأحيانا أقول أعقلي يامره وأركدي بلا هبال..
قلت أشاوركم وأشوف رايكم.. ولا تقولون أني سخيفه ومشكلتي مالها داعي.. والله لو تجربون شقه شينه وضيقه وكل اللي حولي غيروا حياتهم إلا أنا من سبع سنين مافيه أي تغيير.. وأنا مدرسه وأقدر أعيش بأحسن شقه... كان تحسون بالقهر....
أتمنى منكم الأهتمام والرد علي بسرعه لأني حاسه أني منكتمه ولا ني متحمله...