كابتشينو منزلي وعل أصول لراعيات إهادء لرحالة الزمن

حبيباتي بنات المنتدى

بكتبلكم اليوم سر من أسرار الكوفي شوب المنزلي مالي هههه

والله طعمة جنان...

المقادير لكوبين ... يعني إنتي وأبو العيال... وإنتي زيدي المقدار حسب الحاجة
2 كوب حليب سائل fresh
3 ملعقة قشطة نستله
2 ملعقة سكر... حسب الرغبة
2 ملعقه طعام نسكافيه ... ويفضل نوعية Golden لأنه مب مر

الطريقة
أول شي سخني الحليب شوي وبعدين حطيه في الخلاط blender وضيفيلة السكر والقشطة وخليه يخلط 10 دقايق لين ما يتكونلج رغوة فوق...
بعدين صبي الحليب في الغلاية مالتج وخليه يفور على النار ... بيطلع رغوة بيضة شليه بالملعقة وحطيها في كوب بروحها (للتزيين)

وبعدين رجعيه الخلاط وضيفيله النسكافيه وخليه يخلط بعد 5 دقايق لين ما يطلع رغوة بنية... ورجعيه على النار لين ما يسخن
وصبيه في الأكواب وزينيه بالخلطة البنية والبيضة إللي أول شي سويناها
ورشي علة شوية نسكافية أو كاكاو

لذييييييييييذ أحلى من أرقى كوفي شوب

على فكرة للأمانه أنا مرات أسوي الكابتشينو الجاهز إللي في الأكياس ويطلع خبال
بس أنا ما أشتري كابتشينو... أشتري موكا ... طعمه ألذ...
وأسويه بالحليب الطازج (حليب أبقار العين) أو أي شي ثاني عادي
ونفس الطريقة السابقة لعمل الرغوة اللذيذة

وإذا كنت تحبين الكريمة...
لا تحطين الرغوة كلها ... وسوي كريمة عادية مثل الدريم ويب... أو الكريمة المضغوطة إللي تنباع في السوبرماركتات ورشيها فوق الكابتشينو

ملاحظة أنا استعمل كريمة ستار بكس
وهي ألذ كريمة كلتها بحياتي... اسمها كريمة شاني Shani .... عبارة عن كريمة سائله في علبة كرتون مثل العصير لون الكرتون أبيض، زيدها حليب واخلطيها بالخلاط وتكون الكريمة جاهزة...
على فكرة طعمها أحلى من الدريم ويب وأحلى من أحلى كريمة جاهزة

ما أعتقد تلقينها كل مكان لأني دخت عليها لين ما حصلتها آخر شي في شويترام.

وأتمنى إنه يعجبكم وسمحولي على القصور
وإنشالله أكون نفعتكم

أنتظر ردودكم على أحر من الجمر
جربوه وما بتندمون...