يسعد مساكم
قبل كم يوم سويت الكابلي على طريقة الغاليه لولاتو وغيرت فيه شويه وحبيت أنزل لكم الطريقه عسى تجربونها وتعجبكم
نبداء بسم الله
أولاً: أحمسي بصل وثوم في شوية زيت على النار حتى يصير لونه ذهبي
بعدين حطي عليه قطع اللحم وقشر نصف برتقاله وملعقتين طعام ماء الكادي
بعدين حطي في الوصره البهارات التاليه (قرفه ـ ليمون ناشف ـ شيبه ـ هيل ـ مسمار ـ فلفل أسود ـ كمون ـ كزبره ناشفه ) وحطيها مع اللحم وملعقتين طعام من معجون الطماطم وحركيه زين
بعدين حطي عليه كوب من عصير الطماطم وخليه يتسبك شويه
إذا تسبك حطي عليه كوب مويه وغطي عليه أناعني أستخدم قدر الضغط
وقبل ينضج اللحم بربع ساعه طفي عليه وحطي معاه الخضار اللي تحبينها أنا حطيت قرع وبطاطس وجزر (قطعته مكعبات كبيره )ورجعيه على النار عشان تنضج الخضار
في هذي الأثناء سوي رز أبيض بالطريقه اللي تعتمدينها
وحطي في بياله ماء كادي وملح الليمون وزعفران أنا ما كان عندي زعفران فحطيت صبغه وخليه لين تحضرين
لما تجين تحضرين حطي طبقه من الرز
بعدين خلطة اللحم
بعدين طبقه ثانيه من الرز ورشي على الوجه ماء الزعفران بشكل عشوائي وحركي الوجه تحريك خفيف عشان يتلون الرز
وهذي صورة الطبق الآخيره
أتمنى تجربونه وتدعون لي
والف صحه على قلوبكم
شهيتيني وانا جوعانة
يعطيك العافية