السلام عليكم
والله ياخواتي بموت من القهر من كارفور وسرقتهه واستغفاله لنا ..من يومين رحت لفرعهم الجديد في طريق الملك فهد ومليت العربيه من المقاضي ..المهم لما جيت احاسب وكنت شاريه مربى حلواني عليه عرض ب3,45ريال واخذت 3علب الا يطلع 5.50ريال للعلبه ساعتها قلت للكاشير :لحظه لحظه ايش 5.50 هذا سعره 3.45 ,رد علي ان هذا السعر المسجل على الجهاز..قلت لكن انتم حاطين لافته على الرف يشوفها العمي 3.45..المهم واسترجع موقفين سابقين لي في فرعين لكارفور مره في فرع خريص ومره في لي مول وكلها نفس الطريقه السعر الموجود على البضاعه اقل من السعر على الجهاز وبفرق لايقل عن ريالين على كل القطعه...نكمل سالفتنا..قلت للمحاسب نادلي مديركم ,قال المدير فوق روحي له انت,قلت الا ينزل هو المسؤول عن هالسرقات وان مانزل ترى بيلقى جريدة الوطن عنده بعد شوي ..قال :وشوله جرايد وفضايح هاذي غلطه وماصار الا خير والمدير الحين يجي ..وانا انتظر دقيت على بلدية العليا وكلمني الموظف ولما قلتله على القضيه رد علي :والله ياختي انا دايم تصير لي بالعثيم "جيت اشكيلك تبكيلي" بس ترى موضوعك بحماية المستهلك وماقصر عطاني الرقم الله يجزه خير...ودق عليهم وسجلت بلاغ ....المهم اخيرا نزل المدير وانا كنت طالبه المدير العام الفرنسي لان في السرقه والنصبه اللي صارت لنا في فرعهم في خريص جأنا وتناقش معه زوجي في فرق السعر اللي كان مجموعه 133 ريال يعني سرقوا منا 133ريال واحنا ماندري وكان يحاول يدخل زوجي المكتب عشان المحل كان مليان زباين وخاف ينفضحون قدامهم بس والله زوجي ماقصر فضحهم..
جأني المدير السعودي يتأسف ويقول هاذي غلطه غير مقصوده..قلت :اي غلطه هاذي سياسة الشركه سرقة المواطن السعودي انا لما يصير لي في ثلاث فروع من فروعكم نفس الحركه ماتصير غلطه وبعدين ليش تعتذر لي بس وباقي زباينكم اللي نصبتوا عليهم من يعتذر لهم ويرجع لهم فلوسهم اللي سرقتوها منهم..انت ماتخافون الله في ارزاق الناس ..وبعدين بتسرقون اسرقوا ربع نص ريال موريالين وثلاثه في القطعه والا متبعين المثل اذا سرقت اسرق جمل..ويقعد يتأسف ويتعذر وانه غلط في السيستم ومادري ايش...قلت خلاص انا مابي الاغراض كنسلها ..قال: بس اللي تبينه ويكنسلها وبعدين قلت لا خلاص ابيها لاني الشكوى لله عندي ضيوف ومافيه وقت ..ابشري نعيدها ..قاموا طلعوها وعادوا حسابها من جديد وانا اخذت الوصل للعمليه الملغاة ورحت اشيك عليها واكتشف قطع ثانيه مانتبهت لها واقل وحده فرق ريالين واقوم اسحب الاستيكر حق السعر على الرف اللي عليه القطع المغير في سعرها...وارجع للمحاسب والمدير عنده واخذ الوصل الجديد والمحاسب يقولي احمدي ربك حصلتي خصم ..قلت اي خصم قل رجعنا لك اللي سرقناه منك..لان طلع فرق 47ريال وبعض القطع حاطينه بسعرها من دون الخصم المزعوم..وقلت للمدير :انا وخواتي عضوات في اكثر من عشرين منتدى وان شاء الله ربي يعيني واكشف لعبكم ونصبكم علينا وعروضكم اللي ماهي الا طعم لنا ..وانشر قصتي معكم عشان الزباين ينتبهون لتلاعبكم وسرقتكم لهم..
فيا خواتي والله ماكتبت اللي صارلي مع كارفور الا عشان ننتبه ونحذر من اللي يسرقونا في وضح النهار وان نعمل على محاربتهم بتعريتهم للمجتمع عشان يحاسبون الف مره قبل مايقدمون على استغفالنا وسرقتنا....واتمنى من كل اخت حصل لها موقف مماثل مع اي تاجر اومحل ان تتطرحه لنا لاخذ الحذ والحيطه...
اجتماعيه @agtmaaayh
محررة
يلزم عليك تسجيل الدخول أولًا لكتابة تعليق.
نانوشه
•
لا حول ولا قوة الا بالله جزاكي الله اختي كل خير وجعلها في ميزان حسناتك وعوضك الله خيرا من ما خسرتيه ورضي عنك وارضاكي
اجتماعيه
•
معليش ياخواتي هالموضوع طرحته من اسبوع في المجلس العام لكن المشرفات الله يهديهم دمجوه مع موضوع ثاني وضاع ..ولاهمية الموضوع حبيت اطرحه هنا وارجو من الاخوات المشرفات على الحياة الاسريه عدم نقله لاننا مقبلين على الشهر الفضيل ومقاضيه ويجب نوعي المواطنين حتى لا يتم استغفالهم والنصب عليهم..
اجتماعيه
•
نانوشه :
لا حول ولا قوة الا بالله جزاكي الله اختي كل خير وجعلها في ميزان حسناتك وعوضك الله خيرا من ما خسرتيه ورضي عنك وارضاكيلا حول ولا قوة الا بالله جزاكي الله اختي كل خير وجعلها في ميزان حسناتك وعوضك الله خيرا من ما...
نانوشه ..الله يجزاك خير ويقبل دعائك ويعينا على هاللي يسرقونا ليل ونهارحسبنا الله ونعم الوكيل فيهم..
اجتماعيه :
نانوشه ..الله يجزاك خير ويقبل دعائك ويعينا على هاللي يسرقونا ليل ونهارحسبنا الله ونعم الوكيل فيهم..نانوشه ..الله يجزاك خير ويقبل دعائك ويعينا على هاللي يسرقونا ليل ونهارحسبنا الله ونعم الوكيل...
أنا اليوم متفقه مع زوجي نشتري مقاضي رمضان
من كارفور كويس نبهتيني الله يجزاك خير
من كارفور كويس نبهتيني الله يجزاك خير
الصفحة الأخيرة