المقادير
كباية ونص طحين
١/٣ كوب سكر ناعم
كباية سمنة او نص لوح سمنة مقطع مربعات
صفار بيضة
ملعقة فانيلا
للحشوة
كبايتين ونص حليب
٣ بيضات
١/٣ كوب سكر
ملعقة كبيرة فانيلا
الطريقة
حطي الطحين والسكر بجاط وحطي فوقون السمنة وبلشي فركي باصابعك لحتا يصيرو فتات
اضيفي صفار البيضة والفانيلا وخلطي حتا يصير عندك عجينة متماسكة.
كوريها علا شكل دائرة صغيرة وغلفيها بالبلاستيك وعالبراد نص ساعة.
بعد ما تطلعي العجينة من البراد فرديها بالشوبك علا روق المطبخ الغير قابل للالتصاق ورقة من تحت وورقة من فوق.
فردي العجينة لحتا توصلي للسماكة اللي انتي بتحبيها بس لازم تكون اكبر من الصينية اللي بدك تخبزيا فيها متل الصورة.
فردي العجينة بالصينة وما تشدي عليا كتير خليا تنزل عرياحتا وقصي الزوايد وبالشوكة غزي العجينة بكم محل.
هلق بتحطي فوق العجينة ورق المطبخ المخصص للفرن وحطي فوقا رز فرديون عالجوانب منيح هيدي الطريقة معروفة منشان ما تنفخ العجينة وحطيا بالفرن ٢٠ دقيقة.
بعد ٢٠ دقيقة شيلي الرز عنا ورديها عالفرن شي ١٠ دقايق.
بالوقت اللي العجينة فيه بالفرن عملي الحشوة
للحشوة اخلطي كل المقادير مع بعض منيح لحتا بتجانسو
وبس تطلع العجينة من الفرن حطي الحشوة فوقا متل الصورة ورشي فوقا جوزة الطيب الناعم انا حطيتا علا صينية حتا اقدر احملا بعد ما حط الحشوة .
عالفرن حوالي نص ساعة او لحتا تجمد الحشوة
طلعيها وفيكي تحطيها شوي بالبراد او تتركيها برة لتبرد
وقصيها علا شكل مثلثات وقدميها.
