إذا أنت " مدرس " تابع لوزارة التربية والتعليم كل اللي أقوله لك : كان الله في عونك يا عزيزي المدرس .. تدري ليش ؟ نصابك الأسبوعي في الحصص الدراسية ( أربع وعشرين ) حصة دراسية وعدد الطلاب عندك في الفصل خمسين أو ستين طالب ، والمطلوب منك أن تؤدي رسالتك التربوية كما ينبغي !!
قبل فترة شفت قرار صادر من وزارتك الموقرة يضع قيود شديدة في مسألة الغياب أو التأخير أو المرض أو الإجازة الاضطرارية ( كأن التقرير يقول : عزيزي المدرس لا تمرض إلا في الإجازات أو نهاية الأسبوع !! حتى إجازتكم المرضية صار فيها " شيل وحط " .. الله يعينك دق على المرض وقله لا يجيك حسب ما جاء في القرار الجديد !! هذا اللي فهمته ..
إذا أنت مدرس " مبدع أو غير مبدع " لا فرق .. المهم تنتهي السنة الدراسية بخير وتوزع الشهادات على الطلاب .. ناجحين أو راسبين .. مستفيدين أو غير مستفيدين .. مو مشكلة ..
إذا ضرب المعلم طالب قالوا : مخالف لنظام الوزارة الجديد .. وإذا ضرب الطالب المعلم .. قالوا : أخطأ المعلم ويستحق ما جاااااه !! .. انتبه لنفسك ...
مدرس مادة " الفقه " يقوله المشرف التربوي وين التجديد في التحضير ؟ رد عليه المدرس وقاله المنهج هو المنهج المعروف من سنوات ، إلا إذا كنت تبيني أقول إن رائحة البصل والثوم غير مكروهة في الصلاة !!
أنا ما أدري كيف يؤدي المعلم أو المعلمة رسالتهم التعليمية وقد حُسم من مرتباتهم الشهرية المبالغ المستحقة لهم ، يعني نص الراتب محسوم عند الكثيرين .. المشكلة في تعديل المستويات ياناس اللي كل يوم نقرى أخبار من مسئولي الوزارة إنها تعدلت .. لكن أكثر ما كثر الله " الحبر والورق " .. والقرار الأخير يفيد برفض دعواكم القضائية !!
للعلم : النظام الرسمي الخاص بتعيين المعلمين والمعلمات وتحديد مستوياتهم الوظيفية غير معمول به في الوزارة رغم أن النظام صادر من نفس الوزارة .. هذا الوضع صاير على المعلمين والمعلمات فقط .. وبقية الوزارات الأخرى ماشية على نظامها في التعيين .. بالله عليكم قد شفتو جامعي معه بكالوريوس تعين على المرتبة الثانية أو الثالثة .. عمرها ما صارت .. لك الله يا معلم ويا معلمه !!
مدرسة حكومية إلى الآن في مبنى مستأجر ، وأخرى الجدار متشقق ، والثالثة ما فيها كهرب وماء ، والرابعة المكيفات عطلانة والخامسة ما عليها لوحة والسادسة أسلاك الكهرب مجروحة عند الطلاب ، يوووووه خلاص يكفي !! على فكرة : اللي يقول يكفي جهازي المحمول ( اللاب توب ) !!
مشاكل المدارس الحكومية وأوضاع المدرسين يا كثرها بس تعالوا نشوف وضع المدارس الأهلية بلمحة سريعة !!
وش رايكم في مدرسة أهلية اسمها " مدرسة النجاح الأهلية " .. آخر السنة نقرأ في الجرايد أخبار النتائج بالعبارة : " مدرسة النجاح لم ينجح أحد " ؟ ..!!
مدرسة أهلية .. يقول مالكها في الحفل الكبير : كل ما يهمني العملية التربوية لأبنائنا الطلاب ، طبعاً هذا الكلام أول السنة !! طيب وش صار مع نفس المالك آخر السنة ؟! .. اللي صار : مشكلة بينه وبين ولي أمر أحد الطلاب بسبب عدم قدرة الأب حالياً ، أقول حالياً على سداد المبلغ والمالك رافض يعطيه ملف ولده عشان يسجله في مدرسة ثانية !! المالك عايش دور الوزير !! أقول لولي الأمر : ما حولك أحد ..
مالك مدرسة أهلية لا يرغب إطلاقاً بالسعودي أو السعودية في التوظيف ويرغب بالجنسيات الأخرى بدعوى عدم التزام السعوديين في العمل .. إذا تبون الصراحة : المسألة ما هي التزام أو إنتاجية ، المسألة في الفروق المادية وفي الرواتب يا جماعة الخير !! يعني حضرة المالك يبغى يوفر قريشات ودراهم !! من حقه ..
اللي يجهله كثير من الناس إن ملاك المدارس الأهلية يجيهم دعم مادي مو سهل من الوزارة وحسب تصنيف المدرسة وعدد الطلاب ، يعني الربح والمكسب السنوي مضموووون ( ربح مثل المنشار ) !! ليش ما تدرون إن أكثر مسئولي التعليم عندنا فاتحين مدارس أهلية وحاطين عيالهم فيها !! والله مشروع ناجح ؟!! ..
تبون الصراحة ؟ .. ما هنا رقابه لا ذاتية ولا رسمية !! ..
للإعلامي السعودي: عادل بوحيمد