كان رد صار موضوع حياكم ..

السلام عليكم ورحمة الله وبركاته
اول شي انا متابعه جيدة للقسم وهذي اول مشاركة لي
موضوعي بصراحة كان رد لأحدى الاخوات ربي يسعدها
وبقدرة قادر صار موضوع لاني طولت وتحمست
و حبيت افيد ان شاء الله بعض
البنات مثل ما قاعدة استفيد انا منكم 
...
بقولكم شي بنات لا تعاملون الزوج على انه زوج بس
يعني لا تنظرون له نظرة الزوج البحته شنو له وشنو عليه
ونفس الشي انتي كزوجة شنو لك وشنو عليك يعني حلو تعرفين 
حقوقك و واجباتك في الحياة الزوجية بس السالفة مو نسخ ولزق
وتعاملونه على هالاساس كلش غلط وشي متعب وممل وبارد ..
اقول هالكلام وانا اعرف وحدة من يطلع زوجها تستلمه طلبات
طيب ادعي له ان ربي يسعده ويحفظه وخليه يسمعك
الزوج يحب هالشي حتى لو ما يقول ..
يحس انه شي غالي وبعدين اطلبي اللي تبين ..
ولا غيرها تطلع مشاوير مع زوجها من غير كلام !! 
اهم شي يوديها وغصبا عليهه ..
لا واعرف غيرها ماتعرف تمزح مع زوجها بس وقت الهواش سمعوها
واعرف اللي زوجها ما شاء الله بيتوتي لكن صار يهج من البيت منها
اذا طلع صارت تحرق الجوال وين انت كلهه برا واذا رجع البيت صارت 
 على الصامت مشغولة ع الجوال وهو ما غير يقلب في التي في !!
يبي اهتمام .. يبي كلام يبي روح والروح تحب الارواح مو الاصنام
هذي سالفة بالله .. تقربي منه سوي له عصير يحبه قلبه وقابليه
سولفي له احلمي وياه بسوي وبافعل كلهه كلام مشي الوقت اشغليه
همزي رويلاته سوي له مساج وخليه يسوي لك .. قصي اظافره
حفي وجهه  اذا شاطرة ولا احلقيه .. الازواج يحبون الاهتمام
 اجلسي بحظنه لا تقولون بو سروال ما يسويها بالعكس 
يسويها انتي عوديه راح يعشقك جربي.. خليه يطبخ معاك 
يصلي معك او تقرون قرآن سوى  .. اسهروا ع فلم  ارقصي
له اكسري الروتين
اكشخي ودزي له صور عشان يعرف وش اللي عنده
 سجلي له اغاني بصوتك وارسلي له ع الواتس 
صبحيه مسيه وربي لو تنقطعين يفقدكك يدورك دواره .. اكفيه اشبعيه
لاتخلين ناقصك شي ويدوره عند غيرك .. 
شفتي ورده حلوة بالشارع اخذيها وعلقيها بسيارته .. 
يسولف وقال خاطري بشي معين وتقدرين عليه سويه قبل لا يطلبه منك 
تكبرين بعينه .. ناقصه فلوس وانتي عندك اعطيه وين المشكله
الحياة تعاون اخذ وعطا .. بتجي اللي تقول المفروض يصرف علي
حلوة المشاركة في كل شي
لا تخلون الاجساد قريبة والقلوب بعيدة .. خلي لك برامج في البيت
يحبها الزوج ويدمنها .. جيبو لكم العاب .. مارسو رياضة مع بعض
وقبل كل هذا خلي لسانك ذرب  من عيوني  .. تامر امر ..
وكلمة ان شاء الله دايم ع لسانك ..
حتى لو لج راي ثاني انطري الوقت المناسب وتكلمي وابشري بالسعد
اعرفي متى تتكلمين ومتى تسكتين لا تاخذك العجلة لانها من الشيطان
وقتها تقولين وتندمين .. دايم تفائلي خليك مبتهجة وتوكلي على الله 
يعني مو خلاص ليش ان هالانسان زوجك لازم  يصير نفس ابوك 
نفس فلان لازم يسوي ويجيب ويعطيني  الخ !!
لا حببيبتي لا تكونين الزوجة فقط !!
عامليه كحبيبة واخت وام وقت يحتاج ام  وصديقة كل الوقت 
وآخر شي قولي زوجي لانها احسها رسمية او بعض 
البنات فاهمات الزواح انه بهالطريقة !!
الزوج عندهم بس يسوي الزوج يفعل الزواج كذا وكذا
  اذا كنتي كذا ستوب وراجعي حساباتك !!
الزو ج اذا عاملتيه كحبيبة راح تدلعينه وما تقصرين معاه
واذا كأخت راح تعطفين عليه وتتقربين منه
واذا كأم راح تحنين عليه وترحمينه ولا تتحملين تشوفينه زعلان
واذا كصديقة راح تعذرينه وتشاركينه كل حياته وكذا ..
لاتحصرين نفسك ولا زوجك في اطار معين ألا وهو اطار "الزوجية"
خلي للمرح والضحك والشقاوة نصيب .. راح تكون الحياة احلى 
حياة مرنة واقل قلق ومسؤلية وتفكير ..
طولت في الموضوع يارب ماتشتت كلامي لان في نقاط حبيت اوصلها
كل هذا مو من باب تقديس الزوج ( مو متزوجة دعواتكم )
بس الزوج السنع يستاهل وهذا مفهوم الزواج "مودة ورحمة "
وكل هذا راد لك انتي يالزوجة وعلى حياتك واطفالك
وتمنياتي لكم بالسعادة الدائمة ..