كبة الشبنت+كبة البرغل بالخلطة+كبة التوست لعيون طفولية وبنات المنتدى المحترمات

مساء الخير

شلونكم وشخباركم؟

اليوم حبيت احط لكم طريقة كبة الشبنت+كبة البرغل بالخلطة+كبة التوست .. بناءا على طلب الاخت المحترمة ( طفولية ) .. اتمنى تعجبكم . وانا اسفة اني طولت عليج اخت طفولية . اتمنى تقبلين اسفي.

كبة البرغل بالخلطة :

مقادير عجينة الكبة :

كيلو برغل اسمر
نص كيلو لحم مفروم ناعم
1- بصلة صغيرة مفرومة ناعم
ملح + فلفل اسود + نص ملعقة صغيرة كركم
1 فص ثوم مدقوق

الطريقة :
تنظفين البرغل وتغسلينه وتنقعينه لمدة ساعة بالماء . طبعا كمية الماء راح تكون فقط لتغطية سطح البرغل.
بعدين تعصرين البرغل بيدج وتحطينه بالمشخال وتحطين معاه البصل المفروم + البهارات وتطحنينه بالمكينة
بعدين تظيفين له اللحم ثم تخلطينه مرة ثانية بالمكينة حتى تتكون العجينة.
تقومين بعدها بتكبيب الكبة : سوي الكبة بالطريقة المعتادة .. تقومين بتجوفيها وانتي تتحكمين بالشكل .. المطلوب انج تسوينها على شكل سلة بحيث تقدرين تحشينها وتكون مفتوحة من فوق.
بعد ما شكلتيها على شكل سلة .. اقليها بزيت غزير حتى تتحمر واتركيها على جنب.

الحين مقادير الخلطة :
1 كيلو لحم مفروم
3 بصلات مفرومة فرم وسط او ناعم ( حسب الرغبة )
3 فص ثوم مهروس
صنوبر
1 شدة بقدونس
نص شدة اشبنت
ملح + فلفل اسود + 1 ملعقة صغيرة دارسين ( قرفة ) + نص ملعقة صغيرة كمون
3 ملاعق كبيرة دبس الرمان

الطريقة :
بعد ماتنظفين اللحم المفروم وتصفينه من الماء .. تقومين بوضعه بالقدر او المقلاة بدون الزيت .. وتقلبينه حتى يخرج منه الماء .
بعد ذلك تضيفينه في مقلاة اخرى مع الزيت وتقلبينه قليلا ثم تضيفين البصل والثوم وتتركينه حتى يستوي.
بعدين حطي البهارات واتركي اللحم حتى يستوي .
اضيفي الصنوبر وقلبي قليلا ثم اضيفي الشبنت والبقدونس واخر شي اضيفي دبس الرمان واتركيه دقيقة ثم اطفئي النار.

الان تستطيعين حشو الكبة المقلية بالخلطة .. وطبعا تزينين فتحة الكبة من فوق سواء بالبقدونس المفروم او الصنوبر.

وبالعافية


كبة الشبنت
مقادير العجينة :

2 قلاص عيش ( رز ) تسوينه مشخول مع ملح ونص ملعقة صغيرة كركم .. لين تستوي حبة الرز على النص .. يعني تكون نص مستوية .
3 حبات بطاطا مسلوقة
1 شدة اشبنت
ملح ( حسب الرغبة ) + قليل من الكركم

الطريقة :
تشخلين الارز وتضيفين له البطاطا المسلوقة بعد تقطيعها وتخطينه بالمكينة ثم تحشينه بالحشوة اللي انتي تبينها . سواء كانت جبن كرافت ( انا عن نفسي احشيها اما بالجبن او بحشوة اللحم مع الصنوبر)

وبالعافية

كبة التوست

المقادير :

1 كيس توست
1 دجاجة مسلوقة ومقطعة قطع صغيرة
1 كاس جبن كرافت
1 شدة اشبنت
1 علبة مشروم مقطع قطع صغيرة جدا
مايونيز
ملح + فلفل اسود + نص ملعقة صغيرة كركم
بيض
بقسماط

الطريقة :

تقومين بتقطيع التوست على شكل دائرة ( باستخدام قطاعة خاصة او بواسطة القلاص العادي )

تحضرين الحشوة كالتالي :
تضعين قليل من الزيت بالمقلاة وتضيفين له المشروم والدجاج والجبن .. اتركيه قليلا ثم اضيفي البهارات .. واخر شي حطي الاشبنت

الحين اخذي دائرتين من الدوائر اللي سويتيهم بالتوست .. اول دائرة ادهنيها بقليل من المايونيز وضعي فوقها بعض من الخلطة .. بعدين حطي دائرة التوست الثانية فوقها واضغطي من الاطراف علشان تلزق . بعدين تغطينها بالبيض والبقسماط وبعدين اقليها .

وبالعافية

يمكن اسلوب الكتابة مايكون ذاك الزود ... بس حاولت اني اوصل الطريقة على كثر ما اقدر .

اتمنى تعجبكم هالطرق المتواضعة

اختكم .. بنت الكويت :cook::cook: