سلام حنونا يغشاكم ... وروحا ندية تعطركم
السااالفة يا طويلات العمر...
أننا تغيرنا ...
أدري أن الناس تطوروا
أدري أن الناس درسوا
أدري لا متأكدة أن الناس كبروا
مافيه شيء يظل على حاله أياً كان .. ذا الحال وياخسارة لو كان التغير من الأحسن إلى الأسوء ...
أدري إن الغالبية دخلوا مدارس وصاروا يعرفون يكتبون أسمائهم ويحفظون للفرزدق وجرير >>> ويعرفون يحلون معادلات جتا وظتا
والأكيد إن النونو كبر، وحبى ، ومشى ، لا وصار أم أو أب وصار عند النونو>>> نونو
بس ليه !!
تغيرنا سلبي أكثر
وين التطور بلبس العاري المقزز
البس أنا وأكشخ لكن أعرف الفرق بين العورة المغلظة والعورة الصغرى والحياء والمستحى
كلنا نعرف أن البنطلون مميز وكشخة لكن سبحان الله ها اللحوم والشحوووم إلي تبين منه كأنه سيخ شاورما بأرخص كافيتيريا
>>> تشعرين بالشحووم تنادي تقوول اغيثوني وسعوا لي هل من مجيب
ليه ؟؟؟ مير اللي الأجسام تساعد نقوول ممكن وبلوزه طويلة
لكن الأجسام اللي ماتفرقين بين فخذ وساق وظهر وكرش ووو
ليه تعذبنا ليه تغصبنا نشوف ها الأشياء المقززه ليه ؟؟؟
وين التطور؟؟
وين التطور بوحدة ماكملت دراستها ومتشعبطه باللاب توب
واللي يشوفها يقول وخروا عن بيل قيتس والدعوة تراها ماسن وطبخ ونفخ وميك آب >>
ونقش من ها الموقع وسدح بها المنتدى .. ولقط من ها العضوة وتلزيق عند ها العضوة
وتركت كل بحور النت وثقافته وقامت تاخذ الأسوء وتقتبس الأردى
وراح الأجر وكسبت إثم وضااع الوقت ..
وين التطور؟؟
وين التطور بوحده راتب زوجها على قده وهي كل شوي من مركز لصالون تطامر شي
تشقير ... وشي حف ... شي تنظيف ... وشي تشاينيز ... وشي بلياج وشي وشي وشي
ليه لأنها واااو بزعم نفسها وعلى الموضه
سؤال على هامش الموضوع
بنات تستغربون مثلي اللي رواتبهم رايحة أو دراهم أهلهم أو رجالهم رايحة على الميك أب وإن جاء عرس وإلا أبسطها حفلة قالت بروح للصالون
ياهملالي أجل الصالون اللي بالبيت ليه ؟؟؟
لمنو إذا حدكم وعلى كلامكم بالبيت قلوس خفيف للهوزبند >>> الله يذكرك بكل خير يا رندوول
وكحل خفيف ولا تتزينون ببيوت أهاليكم
أجل وشهوله ذا التشري وذا الشناط اللي كأنها لكوافير تقدم خدماتها منزليا
وين التطور؟؟
وين الدراسة اذا الوحدة ماتعرف مكتشف الجاذبية بس تعرف فيرساتشي ...
وماتعرف كيف تربي عيالها بس تعرف شانيل وعايلتهم ومن يعز عليهم ...
وين الدراسة إذا ماتعرف وين العيص ؟؟ بس تعرف ميلانو
وين الدراسة إذا ماتعرف تتكلم فصحى وإلا تكتب جملتين صحيحة من غير تكسير كأنها سيلانيه عايشة بالقصيم
بس تعرف تقوول نوي وااي ... وكيووت ... و أولا لااا
بس ترى هذا اللي تعرفه وإلا شوفوها بالمستشفى
وو وييير ويــ...ر أأأممم از ذا دكــــ ...ت..ور
وهم غلط
وين الكبر
والكبر كبر العقل والله مو العمر
وهي تلاقينها تردد كلمات أقل ماتقال أنها سخيفة ... مقيتة ... مقززة
مهايط >>> ياربي لك الحمد والشكر
شباب متقاطين وقاعدين على رصيف بالدايري وإلا وشو
خمبقه >>> وشذا
أتخيلهم مراهقين منفشين شوشتهم ودببه
بلاش الألفاظ!!
خلونا نروح للي رايح وقتها وماتعرف تنظمه
مقابله ها القنوات أربع وعشرين ساعة لو يحطونها مذيعة ربط فضل
حافظة القنوات .. الإعادات أكثر من أصحاب القناة
وكل شي يعجبها ابتداء من الطبخ ... إلى الميك اب ... إلى المسلسلات الهندية بلهجة خليجيه ... والأجنبية بلهجة عربية ... إلى الحفلات ... إلى ... إلى
بس ولا عندها وقت للبرامج الدينية ... والثقافية .. والحوارية ... ماعليه تعبت الخانم ووقت نومها حل وإلا بتنعدم بشرتها
وين العقل والكبر???
وهي تسلم أطفالها وبناتها بسن المراهقة المبكرة _ 11- 14 _ جوال بكاميرا .. وبلوتوث
وعادي الزمن تغير وهي واثقة ببناتها وعيالها
أوثقي بعيالك براحتك ولك يوم تتحاسبين فيه على تضييعك للأمانة ...
بس حنا نخاف على عيالنا وبناتنا اللي انجبروا يكونون بنفس الفصل أو المدرسة أو المكان اللي عيالك فيه
وين الكبر والعقل ؟؟؟
وهي إلى الآن تخلي ولدها اللي عمره 14 ينام مع أخته اللي عمرها 7 سنوات لا والأدهى والأمر ممكن تقول لخادمة بكل وسااااعة وجه خذي فلان يتسند عليك وغطية أو عطي زعطان روبه وهو بالحمام !!!
وين العقل والكبر ؟؟
وهي تولع أشد من بزر لو انكسر روجها وممكن تغير ملامح الطفل أو المتسبب
وين الدين أولا ؟؟؟
الدين مو تعصيب .. وهواش .. وتشديد
الدين أرقى .. وأيسر ... وأروع ... لكن بالتطبيق ... والصبر... والرضا
الدين هو اللي بيخلي الصغير كبير... والمهبول عاقل ... والجاهل مثقف ... واللي مو متطور قمة الحضارة والرقي
وين تطورنا يا أمة محمد وحنا كل مالنا نرجع وراء بين مميع ومتشدد ...
وين تطورنا يا أمة محمد وحنا مانعرف الفرق بين النصرانية والمسيحية ...
وين تطورنا يا أمة محمد وحنا مانعرف الفرق بين الإعجاب والحب في لله والأخوة ...
وين تطورنا يا أمة محمد وحنا مانعرف حقوقنا واجباتنا ...
وين تطورنا يا أمة محمد وحنا نسمع كل يوم عن جرايم للخادمات وبرضه فاتحين صدورنا قبل بيوتنا لا ونقول مجبورين ...
وين التطور يا أمة محمد وحنا ننام ونصحى على نفس الموال ...
وين التطور يا أمة محمد وحنا نحب الناس وقت حاجتنا ونرميهم بأبشع الألفاظ إن انتهينا منهم
يا أمة محمد ...
إحنا أمة حبيب الله وخير البشر
في مجلس للرسول صلى الله عليه وسلم مع الصحابة قال (أين أحبابي ؟)فتعجب الحاضرون من الصحابة وقالوا ألسنا أحبابك يارسول الله فقال (أنتم أصحابي ...أحبابي هم الذين آمنوا بي ولم يروني )...ألا يسرك أن تكون حبيب رسول الله ..؟؟؟
احنا أمة الوسطية .. احنا أمة الخير ... احنا أمة العلم والعمل ... احنا أمة التطور والوجود ...
نبي نكون فعل وليس مفعول فيه ...
نبي نكون فعل مضارع مو فعل ماضي
نبي نكون فاعل مو مبني للمجهول
نبي نكون نقطة الألف في أي بداية مو المجهول س
نبي نكون الأصل مو النسخ
نبي نكون كفو... ونكون أحبابه يا أمة محمد تغيروا لأن مجتمعنا واحد ولازم نهب ونتغير بأنفسنا أولا قبل غيرنا
وربكم مايضيع أجر أحد
وسلامتكم
دمتم بود
صراحة ما تركتي شي
رائعة
رائعة
:)
موضوع متميز وبقوة