كثري علاقاتك تعالي اقول لك كيف ؟؟

السلام عليكم ورحمة الله وبركاته


بسم الله الرحمن الرحيم


خــــــــــــــــــواتي ...


من منا لا يحب التميز ....


تميزي عزيزتي ليس فقط مع زوجك و في بيتك ...


تميزي إجتماعيا وثقافيا وتعلمي الحوار والنقاش الهادئ المتزن ...


تجرأي وأكسري الروتين دائما....

موضوعي اليوم عن التميز بعلاقاتك ...

وسوف أطرح أفكاري المجربه التي لا استغني عنها

الحمدلله رب العالمين الذي أحبني للناس وحببهم فيني ...

علاقاتي غير محدوده عندي صديقه واحده فقط

ولكن عندي الكم الهائل من العلاقات مع الجيران

أحيانا يخالجنا الشعور بالخجل لزيارة جارتنا القريبه منا

والنبي عليه الصلاة والسلام وصانا بسابع جار

يللااااااااااااااااااا خلصنا المقدمه

نتكلم الآن بالعاميه والله يعينكم علي

كنت بالبدايه خجوله لما سكنت ببيتي الجديد وما كان عندي علاقات بالجيران

لكن كنت احس بأنواع الملل

خصتا إن الأطفال يروحون المدارس

وبعد ما ننتهي من البيت وشغله

ونطبخ يكون عندنا وقت فراااااااااااااااغ كبير

التلفزيون يا الله من التلفزيون ما في برامج او أشياء مفيده الا القليل

والتلفون ما استخدمه الا لوقت الحاجه أو الأطمئنان على والدتي العزيزه الله لا يحرمني منها

فقلت اروح اشوف الجيران

ما شاء الله تبارك الله طلعو أخلاق وسنع

طبعا بالبدايه راح تنحرجين انك تدخلين بيت ما تعرفينهم عدل

لكن انتي حاولي انك بالبدايه كلما تشوفينهم برااااا سلمي عليهم باليد مره مرتين ثلاث

الين ما توصل العلاقه للمواصله

واكيد انهم راح يعزمونك ويقولون لك على الاقل تفضلي تقهوي عندنا

وإياني وإياكي تقولين لاااااااااااااااااااااااع

لأنهم بيفكرون ان ما تحبين التواصل

لو كنتي مشغوله معلش ادخلي لعشر دقايق ما تفرق ان شاء الله

على الاقل وقتها عطيهم رقمك واخذي رقمهم بطريقه حلوه

ولا تنسين تقولين لهم ياريتني جيتكم من زمان انتو خوووووش ناس والله

واول ما تدخلين بيتهم قولي ما شاء الله تبارك الله حتى لو كان بيتهم بسيط وعادي

فهذي الكلمات ان شاء الله تكون فال خير على علاقتكم ببعض

اليوم الثاني ارسلي لهم كيكه

وهكذا ان شاء الله راح تتواصلين معهم وتشغلين نفسك بشي كويس

يا خواتي من منا مرض ولا احد سئل عنه تدرون ليش

لان علاقاتنا محدوده

ما تحبين التواصل الدائم معلش تواصلي وقت ما تحبين

تحبين الخصوصيه ما يمنع انك تكونين رسميه معهم

الي خلاني افكر بالعلاقات الاجتماعيه موت جدتي الله يرحمها

والكم الهائل من الناس الي جو يعزونا بوفاتها لمدة شهرين والناس تتواصل معنا بالتعزيه للفقيده

الله يرحمها ويرحم جميع اموات المسلمين

سئلت الوالده ما شاء الله جدتي تعرف كل هالناس

قالت ما شاء الله أمي الله يرحمها ما كانت تخلي احد الا تتواصل معه الضراء قبل السراء

بالتأكيد بيجي اليوم الي نحتاج أحد يترحم علينا ويذكرنا بالخير

مر على موت جدتي سنين ولا انسى الناس وحزنهم عليها

وتمنيت هالشي لنفسي

الحين نجي للأفكار الحلوه الي اسويها لجيراني ...

أممممممممممم مثلا ليلة رمضان كانت فكرتي

إني أرسل لجيراني ســـــــــــله




وممكن ترسلونها على حسب امكانياتكم

اذا ما تبون سله عادي ممكن بكيس حلو من الكارتون

محتويات السله :

حطيت فيها بخور
وقهوه
وحلوى
واكياس من صنع يدي للقرقاعون للاطفال
وكيس من البهارات سويتها خاص لهم بالبيت وكانت ريحتها تجنن
وزعفران


وكتبت كلمات حلوه على البطاقه مثل الى أم ...............
كل عام وانتم أقرب الى الله
من أم ........

وعلى الجهه الاخرى من البطاقه لصقت قرآن صغير

وكانت النتيجه روعه لما تقابلنا كل الجيران بعد ما عزمتنا وحده منهم

الكل قام يمدحني ويتشكرني وانا فرحت لفرحهم والحمدلله على كل حال


ممكن تسوين فكره السله مو بس بمناسبه رمضان لاااااااااااا ممكن تحطين فيها اشياء ثانيه

او نفس الاشياء ...


حاولي قدر المستطاع انك تسئلين عنهم وقت مرضهم وبعده يعني لما تعرفين ان فلانه مريضه روحي لها زياره وبعد كم يوم روحي مره ثانيه وشوفيها ان كانت محتاجه شي ...

ويازين من زار وخفف مثل ما يقولون

حاولي انك ما تجلسين عند الجيران اكثر من نص ساعه

لأن بيتك وزوجك واطفالك لهم حق عليك وايضا ممكن الجيران يكون عندهم شي يشغلهم


أما اذا كانت الدعوه عامه لجميع الجيران ببيت وحده منهم حاولي انك تجلسين ولما تشوفين ان المعازيم بدو يروحون شيلي قشج معهم وروحي بيتك ...

اذا كانت وحده مسويه عزيمه وما عندها شغاله كلمي شغالتك وقولي لها بعطيك مبلغ مثلا خمسين ريال وابيك تساعدين جارتي ان وافقت كان بها وان ما وافقت لا تغصبينها لانها مو عبده تحت يدك ... واذا وافقت نجي للخطوه الثانيه انك تكلمين جارتك وتقولين لها انك راح ترسلين الشغاله لها علشان تساعدها .... وحاولي انك ما تتعبين الشغاله ببيتك هذاك اليوم يعني لو كان في غسيل ممكن يتأجل أجليه او سويه بنفسك ما فيها اشكال ان شاء الله واحتسبي الأجر من رب العالمين ...



علاقتي بعمتي الي هي ام زوجي ....


الكلمه الطيبه ما في احسن منها يعني دائما كثري من كلام الطيب

انا عن نفسي بصراحه عندي استراتيجيه معينه

مو حرام المجامله لو ما كان نفاق جاملي عزيزتي

استراتيجيتي اني اعرف وحده من صديقات عمتي الي هي ام زوجي ومعرفتي ببنتها بالتحديد

احاول قدر الامكان اني امدح عمتي قدامهم مثلا ما شاء الله عمتي خلوقه طيبه تعاملني مثل بنتها .. والخ


طبعا لما وصل الكلام لعمتي حسيت بفرق بمعاملتها لي

أما نصيحتي وقت الزياره لبيت أهلك

لا تدخلين عليها وايدك فاضيه ابدا على الاقل لو شي بسيط مثل طبخه او كيكه منزليه


أنا دائما اودي لها سله فيها أنواع الفواكه

لأننا نتغدى هناك كل اسبوع مره

فأنا اودي معي فواكه بالسله بشكل حلو ومرتب وبعد ما نخلص من الزياره



أخذ معي السله للأسبوع الي بعده وهكذا ...

أو إني اسوي حلى وبعد اسوي القهوه واخذه معي

أم زوجك مهما تكون معك طيبه لازم تبهرينها بين فتره والثانيه

وان كان إمكانياتك تسمح حاولي تاخذين لها هديه كل شهر او شهرين

مثلا خذي جلابيه لها من النوع الحلو



وقولي لها رحت شريت لأمي هديه للعيد وانتي بمقام امي الله لا يحرمني منك

وعطيها الهديه وادعي لها بطول العمر

وان كنتي تعرفين ام زوجك انها من النوع الغيور لا تقولين لها شي عن هديتك لأمك ولا تقولين العباره الي كتبتها فوق

قولي لها الله لا يحرمنا منك ويطول بعمرك وعطيها الهديه

واذا جت تزورك بالبيت

جيبي احلى الاطباق ترااااا حريم الكبار يشوفون الاطباق الحلوه يعني الصحون والملاعق قبل الأكل


يعني جيبي احلى طقم وخلي فيه الاكل واهم شي الفناجيل والكاسات تكون حلوه ومو لون ولون

حاولي انك تسوين لها اشياء بناتها ما يسون لها

مثلا انا اجيها في كل شهر مره وحده اجيب معاي عدتي كلها

يعني اقعد اصبغ شعرها من الشيب او احنيها

واذا شفتها طلبت شي من بناتها أفز قبلهم واقول انا بسوي

والحمدلله صارت راضيه عني وتمدحني قدام الاهل كلهم وصديقاتها


ان شاء الله الموضوع يعجبكم عزيزاتي

واتمنى تواصلكم أحبتي

وشكرا



( اعجبني الموضوع ونقلته عشان تستفيدون منه مثل مااستفدت )

الموضوع لصاحبته ( ترانيم منتديات عروس )