كرهت الآيفون من قلب انصحوني افضل بديل

صباح الورد
اخباركم ياصبايا
انا من جد مالي حظ في الآيفون
اول جهاز جابه لي زوجي هديه من الخارج كان وقتها باقي مانزل بالسعوديه
تفاجئت فيه وطاح وانكسرت شاشته وهو توه جديد غيرنا شاشته
وبدأت اتعلم عليه وياما ايام وليالي
راحت وانا سهرانه واواصل ليل بنهار على الابتوب عشان افتح الغاز هالجهاز
وبديت شوي شوي افهمه
رحت زياره عند ناس وشافته قريبتي وشهقت قالت ايفوون من وين جبتيه
رجعت البيت طلعته من الشنطه لقيت الشاشه متكسره وكأن احد قطعها بموس
غيرتها للمره الثانيه
رجعت من جديد
انزل برامج وارجع صور وهكذا
فتره بسيطه وعلق الجهاز بسبب السيديا
وديته لمحل ووقتها انتشر الآيفون وكثرت مشاكله
سوو له تحديث ورجعوا لي الجهاز وكأنه جديد :confused:
يعني كل شي طار
شبكت بالآيتونز عشان ارجع عفشي فيه
علق مره ثانيه طلعته واكتفيت بالموجود
اخر شي طاح بالمويه :unhappy:
اخذناه وصلحناه ووقتها حلفت معاد اشيله عفته
اخذه زوجي وحطه بدرج سيارته عشان يبيعه
ورجعت لجوالي النوكيا :biggrin2:
زوجي ودى سيارته للصيانه وجا اليوم الثاني ولقى الجوال مسروووق
وبكذا اسدلنا الستار ع جوال ماشفت منه الا النكد :smile:

اشتريت ايفون 4s >> ماتبت
وقررت مانزل السيديا عشان اقعد انا وياه حبايب
نسيت الأيتونز والحين بيكمل سنتين
فجأه بعد التحديث اختفى الواي فاي
وديته يرجعون الواي فاي بعد ما حذفت كل شي منه وانا تعبانه نفسيا
لأن حصاد السنتين حاطتها بالجوال
ضبطوه ورجعوه والحين لا انستقرام رضي يفتح ولا تويتر

كلمت زوجي يبيعه معاد ابيه
حنيت للنوكيا وايام الذاكره الصغيرونه اللي تحفظ لنا كل شي
حنيت للبلوتوث يوم كنا نبي ننقل صوره او شي نجلس جنب بعض عشان توصل بسرعه :smile:

الحين بعد ماهدرت عليكم
اعطوني بديل يكون وفي معاي لأني بجد تعبت نفسيا مع الآيفون