كرهت ام زوجي بعد ماكنت اعزها

بنات في موضوع مضايقني وبفتح لكم قلبي.. ام زوجي كنت اعزها كثير واحبها ومعتبرتها زي امي طول السنين الماضيه ومن وقت لوقت اهديها والا ارسل لها طبخة حلوه واعزمها ببيتي بكل مناسبه.. وهي متعلقه بزوجي وهو متعلق بامه مرررره يعني على قولتهم "ابن امه" بكل شي.. هي اللي تسمي عيالنا وهي اللي تقترح تجديد بيتنا وحتى اجازاتنا تتربت على مزاج عمتي.. وانا عاااادي مكبره راسي.. واقول صح عمتي ملقوفه بس قلبها طيب ووحده كبيره لازم نجاريها..
طبعا زوجي يشوف العالم من نظاره امه.. ان قالت له هالناس اشرار يقتنع انهم اشرار وان قالت انهم اخيار يقتنع انهم اخيار.. اللي صار انها نقلت كلام من لسان امي لزوجي بطريقة غلط (وانا داريه هي تغار من امي بس ما ابي اوضح اكثر).. فزوجي حقد على امي وصار يتطاول عليها بكل مشكله تحصل بيني وبينه.. وانا ما اسمح له يغلط بامي فصرت ازعل وانفر وانقهر واكل تبن..
المشكله مو هنا.. المشكله ان حتى مشاكلنا الاخيره يروح زوجي ياخذ فيها راي امه وينشر غسيلنا عندها.. واخر مشكله كتبتها لكم هنا قبل اسبوعين لما أمرت العمه اني اروح استقبال بنت خالتها اللي والده وانا كنت تعبانه يومها وصرخ علي زوجي وشتمني انا وامي واهلي وقال اذا امي امرت بشي تنفذين مباشرة (يحسب هالشي بر والدين).. انهرت وكسرت صحون المطبخ وراح نادى امه وجابها بيتي وقال شوفي حياتي يمه مع هالمجنونه.. نصحتني عمتي اترك البيت واروح لاهلي كم يوم ورفضت وقلت اعذريني بجلس ببيتي.. لاني ادري طلعتي من البيت بتركبني كل الغلط وبتزيد حجم المشكله..
من يومها زوجي مايكلمني ولا اكلمه ومتجاهلني ويسهر كل يوم برا لوجه الفجر.. طبعا هالمشكله وغيرها بدت من زن عمتي "زوجتك ماتقدرنا مدري ليه ماتحب تزور جماعتنا رغم اننا ماعملنا لها شي وتمنيت زوجتك تجي بدل لا تحرجنا الخ".. تقول هالكلام بمسكنه ودمعتين وتحرضه من تحت لتحت وتأكد له اني مقصره وان الحرمه السنعه تفز وتوجب حتى لو كانت متكسره.. وطبعا زوجي لانه دلوع امه ويحب سواليف الحريم فيتأثر اكيد:)
بعد عشر سنين زواج اعلنت استسلامي والله يعوضني خير.. بس من قهري جيتكم افضفص.. كانوا المستشارين يقولون لي مفتاح زوجك امه.. لكن بعد ماوصلت هالمواصيل صرت اكرهها كره فضيع لانها تخبب زوجي علي.. كرهته فيني وباهلي ودايم تحذره مايعطني مجال بشي وتقول له الدنيا تخوف والبنات فلتوا الخ.. انا مفكره امتنع عن زياراتها لانه زياراتها واجب زوجي وعيالي يروحون لها هم اما انا فمو ملزومه شرعا فيها ولا اقدر اتغصب نفسي عليها.. زمان كنت اروح لها حب ومعزة واقول لنفسي جده عيالي وام زوجي تقديرها من تقديرهم.. لكن دام وصلت الامور لهالمواصيل فمالي علاقه بها الله يستر عليها.. وادري زوجي احتمال كبير يطلقني بسبب هالشي لانه قبل امس كاتب بتويتر "الزوجة بدالها الف وكلهم تحت رجول الام".. المشكلة اقسم بالله ماغلطت فيها بحرف كل ذا عشان اعتذرت اروح مناسبه كنت فيها تعبانه..