كسكسي بالحوت واللي يحب يفوت

يم يم يم يم
زي اللي شميت صنة كسكسي يبوخ في المنتدى اليوم
ام نوفل هو انتي صاحبة العملة امممممممممم
حتى انا قلت ماتديريها كان انتي انا وام محمد كل واحدة اكسل من التانية :23: هادي مش ليك هادي لام محمد انتي مازلتي جديدة مانبوش نزعلوك
ياستي يعطيك الصحة على هالكسيكسو توا كان منه صوينية ماتخيبش غير ماتنسيش الفلفل الاخضر مقلي من فوق انا نحبه حار ومنظر الفلفل المقلي والحوت ياسلام حاجة ماصارتش
مانوصيكش خففي العيار شوية
اختك نتوحم وفي غربة مش قد الحاجات الخطيرة ديه
مرة ضولمة ومرة كسكسي ياواقي من اللي باقي عما تطلعيلي بعد شوية حاطة بازين ولا رشدة برمة
هيا امالا بالسلامة وتسلم ايديك عالكسكسي ولو اننا ما دقناشي
مع الاعتدار لباقي القراء لاستعمال لهجة غير مفهومة في كلامي
اللي فهم حاجة يرفع ايده:41:
كخخخخخخخخخخخخخخخخ

مراحب
تسلم الايادى يا ام نوفل وكثرى من الاطباق الحلوه وياريت تكتبى المبطن لانى ما عرفتش نوصف فتح البطاطا(وحده مرخيه)
نجمة طرابلس انا نشطت والحمد لله الدور والباقى عليك,الله يكون فى عون راجلك والبيتسا هوت

نعم نعم نعم
look who is talking now
يكون في علمك يا فالحة لا بيتزا ولا همبورغر عمرها ما خشت حوشنا عفوا قصدي شقتنا
صدقيني والله مادقتها ااهوا قداش ليا في امريكا ولا تسمت عليا حتى نتشة منها
بعد خطرها ما قلتيليش شن كليتوا انتي وابومحمد يومها لما عزمك عالغداء بعد الشوبينغ :23:
انا العبدة الفقيرة نسخف راجلي مداير مقاطعة وحصار للامريكان من الداخل زي ما هما محاصرين بلادنا من الخارج كخخخخخخخخخخخ
شن رايك في موجة الوطنية اللي نزلت عليا
عموما توا في الصيف وكان حصلت كيف نزرق لكندا بنجيك خلينا نشوفوا الفلاحة اللي تدعي فيها اما انا خلي بنمشي ندير عصيدة تعرفي اليوم سبت والاخ قاعد في الحوش ويبي فطور مقوم
عموماً بري ديري بحت في مواضيعي (يعني من كترتهم) باش تعرفي انا فالحة ولا لا ولو انه الافضل انك تعايني عالطبيعة وتدوقي بالمرة:39:

ترا وكانك فالحة اكتبيلنا طريقة الرشدة متاع طرابلس مش متاع بنغازي بري كلمي عزوزتك خليها تعطيك الطريقةوكان ماتعرفيهاش
:42:
سامحينا يا ام نوفل دوشنالك في صفحتك

:21: :27: :21:

صبح يا فتاح
خيرك طالقه لسانك على صبح ربى,انا ما نشكرلكش روحى.لكن الحمد لله الكوجينا انخشلها فى دوره اتكون الصفره امشكله(ما تنشديش على الحوسه)
واحنا طايحين فى مطعم عربى اسمه الشرق الاوسط واسعاره على قيس جهدنا هذا هو امكانا ناكلوا فى التبوله وبابا غنوج والمتبل والمشاوى,والبيتسا والهامبورجا حتى احنا زيك ياسر غير زفرتها وانهم مش طاهرين وهم يمرطزوا فيها
وبعدين اصغارى ما ياكلوش الا عمل ايدى وحياة عينيا
وكنا الرشده فالحه فيها شرقاوى(مكرونه امبوخه)وغرباوى واليوم نبى انديرها اصلنا ذابحين باش تتفضلى انتى والبى
سلام

اولا: صحيتوا علي الرد
ثانيا:خيركم علي بعضكم شنو بينكم ثار ولا شنو
وبعدين الباين الصفحة ماخشلهاش حد غير حني الثلايتة وقعدنا نهدرزو علي حالناواحوالنا الباين اخواتنا الخليجيات ما حبوش اكلنا
والباين عليا بنبطل اكتيبة

توا نجو للجد اختي ts شورك ماقريتيش كويس الفلفل الاخضر المقلي قلت عليه
اما البازين غر يفلحوا فيه بنات البلاد انى الاولة مالياش هلبة كيف بديت ندير فيه لكن يجي بازين علي كيف كيفك فالحة ماشاء الله عليا(شكار ة العروسة........)
ونبي نطلب منك طلب شفتلك في المنتدي مرة قلتي اللي يبي يعرف طريقة الخبز الفرنسي اني نبيها اسعفينى بها فورا
وصحيتي مقدما
توا نرد علي اختي ام محمد
مرحبتين بيك اني وts تعرفنا من قبل في اول مشاركة ليا وطارت في تلخبيطة المنتدي شوفي الحظ اني كتبت منىهنى وهى طارت من هنى الله غالب


في بالي نكتب المبطن لكن علي قولتك في حكاية البطاطا
تو نلقالها دبارة
بالسلامة توا

انشاء نتلاقوا في مشاركة تانية

تحيااااااتي