النهاردة انا عملت كعب الغزال و ده نوع من اونواع البسكويت بالتمر او العجوة (للشيف محمد فوزى)
و ميزته انه سهل جدا و مقاديره متوفرة فى كل بيت
و يارب ينول اعجابكم
بسم الله نبتدى
المقادير
2 كوب دقيق
نص كوب سمن سائح
نص كوب ماء دافئ
رشة ملح
معلقة كبيرة سكر( انا حطيت 3 )
خميرة (لو جافة حوالى نص معلقة كبيرة)*او قطعة خميرة فى حجم الليمونة الصغيرة
بيضة مخفوقة مع فانيلا لدهان الوجة * سمسم للوجه (اختيارى )
الحشو: عجوة او تمر و بطريه بمعلقة سمن مع معلقة قرفة و 3 معالق سكر و ربع كوب ماء ( بيعطى طعم راائع )
الطريقة
**هندوب الاول الخميرة مع معلقة السكر فى شويه ميه دافيين
**و بعدين هنحط المقادير كلها مع بعض و نعجن كويس مش اقل من 10 دقايق
**هنسيب العجينة ترتاح حوالى نص ساعة
**بعد كده هنبتدى نشكلها بشكل بتاع كعب الغزال و هو انك تجيبى قطعة من العجين و تفرديها و تحطى بيها التمر او العجوة
**و تلفيها كويس و تقفلىحروفها و بعدين تقطعيها صوابع و نتنيها او نعملها على شكل حروف U بس هى هتفرد نفسها شويه
و بعدين نرصها فى صنية مدهونة زيت و نسيبها ترتاح كمان نص ساعة و قبل الخبز ندهن و شها
بيض و نرش السمسم و بندخلها فرن ساخن على نار فوق المتوسطة بقليل
و الله يا جماعة طعمها روعة و عجبتهم فى البيت جدا
