كـــذا تفــــارقنا انا وامــي 12 سنه ........!!!!!!!!

السلاام عليكم ورحمة الله وبركاته ..


قريت أمس موضوع للاخت نونو وبس بعنوان ( موضوع غريب شوي ) ومضمونه سؤال : ليش تحبين أمك ؟ وكان هالسؤال فتح جروح كثيره لي ..وانا رديت على الموضوع بانه تتوقعون البنت اللي ماشافت امها من 12 سنه وهي قريبه منها ليش تحب امها ؟

وان الحين حابه اكتب لكم قصتي اللي ترددت كثير قبل مااكتبها ..



كان عمري 8 سنوات واخوي اصغر مني عمره 7 سنوات لما ابوي طلق امي وانا لحد الان مااعرف ايش هي الاسباب .. المهم اني عرفت عن امي انها كانت ست بيت تحترم زوجها وتقوم ببيتها وواجباتها وعيالها بس فيها عيب واحد انها ماتلبس وتتعطر وتتزين ويمكن هو السبب اللي خلا ابوي يطلقها ..

لما ابوي طلق امي راحت امي عند اهلها وكان ابو امي - حسبي الله عليه - ظالم جدا وكانوا في مدينه تبعد عننا تقريبا 200 كيلو واحنا في المنطقه الغربيه من المملكه واحنا بقينا مع ابوي وابوي لما كان يداوم كان يخلينا عند جدتي ام ابوي اللي عوضتني عن كل امهات العالم الله يخليها ويحفظها لي ويطول عمرها ياااااااااااارب
كنت انا واخوي نبكي كل يوم نبي نشوف امنا وكنا مسببين ازعاج كبير في بيت عمي بسبب غياب امنا وبعد ابونا بسبب دوامه .. المهم لما رحنا نبي نشوف امنا اتذكر هالموقف زين ولايمكن انساه ابدا طول حياتي لانه موقف مبكي ومؤلم كل ماتذكرته ابكي وادعي على ابو امي .. لما جيت انا واخوي نبي نشوف امي رفض ابو امي اننا ندخل عنده بالبيت ورفض انه يستقبلنا ولما بكييييييييييينا قدام البيت وخالي كان معانا يحاول يسكتنا ويهدينا كنت احاول افلت من ايده ابغى ادخل البيت لاني كنت اشوف امي على بعد خطوات مني وانا اصيح وابكي وكان خالي ماسكني وابو امي رافض وكان يقول طلعوهم مانبيهم براااا ومسكني من ايدي انا واخوي ودفنا لين طحنا بالشارع نبكي وخالي وخالاتي يبكون وكان يقول لحد يجيبهم لي مره ثانيه والله لاذبحهم ويصرخ بوجه امي ادخلي وعيال انسي ان عندك عيال قسم بالله ماانسى هاللحظه وانا واخوي طايحين بالشارع نصيح اخذنا خالي ورجعنا لابوي .. حاولنا اكثر من مره نشوف امي بس للاسف نفس الشي كان الظالم رافض لين تزوجت امي من واحد ثاني وانا كان عمري 15 سنه وانا في كل يوم ادعي على الظالم اللي حرمني من وجه امي .. بعدين مات ابو امي وانا عمري 17 سنه

ابوي تزوج وانا عمري 10 سنوات وجاب لنا مرة ابو سوت فينا الهوايل انا واخوي ..
كانت تخليني وانا بنت 11 سنه اشطف وانظف واغسل وارمي الزباله واسوي شغل البيت كله فوق راسي وكانت تضربني ليل ونهار وكانت تقول لي ان ابوي مريض بالسكر لاتحاولين تخلينه يعصب لانه ممكن يموت ..فكنت مااقول لابوي اي شي يصير خايفه علي بعد قلبي ابوي اللي عوضني عن كل الناس كنت بعض المرات اروح معه للدوام والعب ... مرة ابوي كانت تملا راسي على امي وكانت تقول لي ان امي مريضه نفسيا .. كانت مرة ابوي تاخذ مني كل شي وتحرمني من كل شي .. حتى الدراسه مافلحت فيها بسبتها .. كرهتني بعماتي وبعمامي وبزوجات عمامي كنت اتهاوش مع الكل عشانها كنت اصدقها بكل شي خوف من انها تضربني .. انحرمت من طفولتي انا واخوي واكتشفت بالنهايه ان ابوي لافيه سكر ولايحزنون واكتشفت بالنهايه ان كل شي كانت تقوله لي كذب بكذب .. كانت تحرش ابوي علي انا واخوي بس ابوي يحبنا ومايسمع كلامها بس ماكان يقدر يسوي لنا شي .. حياتي كانت جحيم بجحيم .. اتصبح بعلقه واتمسى بعلقه ... تخيلوا كنت انا واخوي نخبي فلوس كان يعطينا اياها ابوي تحت الفرش بس كشفتنا واخذتهن وضربتنا وهزأتنا .. بعدين صرنا نخبي اكثر اغراضنا بالحوش منها فلوس وصور امي .. بس كشفتنا واحرقت الصور واخذت الفلوس .. ومره من المرات خذت ذفتر مذكراتي كان لي فيه ذكريات من صديقاتي ومن امي كاتبه فيه اخذته وشققته قدام عيني

حتى يوم كبرنا صارت تفرق بينا وبين عيالها .. كان ابوي يقولنا ياوليدي مهما صار ومهما حصل تأكدوا انها ماراح تفضلكم على عيالها .. لكن الحمدلله ربي عوضني بعد كل هالسنين بزوج طيب وخلوق وكبير باخلاقه وبعقله وكرمه وحنيته وشهامته الحمدلله ياربي.. رجال كريم من عائله كريمه من اصل طيب .. رجال له اسمه بين الناس وسمعته وسمعة اهله معروفه بالطيب والكرم والشهامه..وموظف وظيفه مرموقه - الحمدلله ماشاء الله ولاقوة الا بالله - .. كل عمامي واهلي يقولون لي ان الله اعطاني وعوضني لاني صبرت على الظلم .؟.. الحمدلله زوجي يحبني ويحطني فوق راسه ماعمره قصر بحقي ابد .. بعد كل سنين الحرمان اللي انحرمت من شوفة امي .. بعد ماحكيت له قصتي كله قرر يوديني اشوف امي كل سنه مرتين ... الله يااول مره اشوف فيها امي كأن الحياة عااااادت لي من جديد والله العظيم ان امي قامت تدعي لزوجي بالتوفيق وام امي وخوالي كلهم حبو زوجي من قلوبهم الحمدلله يارب .. وانا اموت بزوجي الله يخليه لي يارب .. جدتي تقول لي يابنتي اللي سواه لك زوجك قليل اللي يسوونه ولو تسوين له وش ماتسوين ماتردين معروفه ... وانا الحمدلله تحت امره وبخدمته وبأمره لو يقول لي سوي المستحيل سويته عشان ارضيه .. مايكفي انه كحل عيوني بشوفة امي وكل يومين والثاني يسألني عنها ... ابوي يقول لي يابنيتي زوجك بكفه وانا والناس والعالم كلهم بكفه ثاانيه فخليك دايم مع زوجك .. وانا باره بأمه الله يطول عمرها وبخدمتها واعتبرها مثل امي الله يطول عمرهم يااااااااااارب .. وانا عايشه ببيت لحالي بس اروح كل يوم لبيت اهل زوجي واجلس مع خالتي واشوف اذا تحتاج شي مني والا لا

وزوجة ابوي عندها بنت وولد كلهم اخواني واحبهم واموت بهم ويحبوني وعمرنا ماتفرقنا رغم انها تبغى تفرقنا عن بعض .. قبل كم شهر كانت تسولف لوحده من جيرانها بعد ماسافرت شغالتها وتقولها انها كل ماتشوف بنتها تشتغل بالمطبخ تتحسر على بنت بعمرها 15 سنه المفروض ماتدخل المطبخ بس شسوي ابوها يبي كذا )))) تخيلوا ؟؟؟؟؟؟؟؟؟؟؟وانا يوم كان عمري 10 سنين عنده كنت اشيل الزباله على راسي على شانها

والمشكله تسولف من وراي ومن قدامي انها ربتني وانها علمتني واني جحدتها .. مع اني ازورها كل يومين عشان اخواني والله وعشان ابوي ... وعشان اتطمن على اخوي اللي لحد الان وهي مسوية له قلق بالبيت واخوي اخر سنه له بالثانويه السنه هذي ان شاء الله ربي يوفقه.. تصدقون انها مره من المرات بعد ماتلاججنا بالكلام انا واياها دعت علي بايش ؟؟ (( قالت لي الله يقطع عنك الضنا انتي ورجلك .)) قمت اصييييييح وطلعت من بيتها وانا ابكي ...قلت لرجلي قالي ماعليه عاد يعطيها على قد عقلها والمفروض انك تسكتين وتحترمينه احتراما لابوك .. ولاتقولين لابوك انها قالت كذا ... ونسيت السالفه .. ولما تأخرت بالحمل تتعمد دايما تحرجني قدام الحريم ..


الحمدلله على كل حال