كلام زوجي عن خواته. ابغى رأيكم

السلام عليكم ورحمه الله.


بنات في فترات معينه كل سنه يصير حوار مع زوجي حولين خواته، هو عنده ثلاث خوات متزوجات، وحالتهم الماديه مقارنه بالناس ممتازه. طبعا كل واحده منهم في مدينه، وحنا في بلد ثانيه. وما نلتقي غير في السنه والسنتين مره. يعني لا نلتقي في اعياد ولا غيره. وكل ما يمر عيد ابقى وراه اذكره يتصل عليهم، الصراحه انا ما اكلمهم نهائي، لان مريت معهم بمواقف جدا سيئه، ولو يمر دهر ما اكلمهم ولا اسئل. وعندي اسباب كثيره وما ابغى اذكرها، حتى زوجي يحب وحده فيهم ودايما يكلمها بس، والباقي ساحب عليهم.

لكن كل ما يمر عيد ينسى يتصل، وينشغل، لكن اضل اقول بيني وبين نفسي عندي بنات، ما اتمنى اخوهم ما يكلمهم في العيد مستقبلا، مع كل اذى اخواته وطول لسانهم واسباب كثيره. ما اقدر يمر العيد من غير ما اذكره، ضميري ما يطاوعني.

الي صار انو مو بس على الكلام، هم يتوقعوا ان شفناهم انو لازم يعطيهم او يبعث الهم فلوس. لكن زوجي جدا ماسك على فلوسه، وفي السنين الي مرت كنت اجبره واضغط عليه يعطيهم، وكل ما يطلع عن ريال، اقول انا لا حرام اكثر، هذول خواتك، ما يصير. وبالاخر فقعت معاه وكلمني كلام طويل عريض. قالي خواتي مو بحاجه، وضعهم المادي احسن مننا، وانا اتعب بالفلوس واوقف طول النهار على رجولي، انتي مو تعبانه، سهل تقولي اعطي اعطي، وكمان انا افضل ان اعطيت اعطي فقير او محتاج ولا اعطيهم، يطولني اجر على محتاج، لكن هم ماهم بحاجه. وقالي تعالي شوفي الصور الي تبعثها اختي، الصور سبحان الله صور قديمه مخزنه على ذاكره التلفون وما تنمسح، قالي شوفي اختي الصغيره حياتها كيف. كلها طلعات وتمشيات، ومطاعم، واشياء حنا ما نسويها، ونبخل على نفسنا حتى نوفر لعيالنا وللمستقبل، وشفت الصور يا بنات بالسوق تتمشى وتصور كل شي، ما شاء الله الله يديم النعمه على عباده. قالي هالاشياء هيه تشتريها، انتي تشتريها؟ قلت لا والله ادور ارخص شي، وان شريت شي غالي بالسنه حسنه. قالي هم يشتروا، حتى الماركات الي عمرك ما سمعتي فيها. وهو يعرف للماركات وينتبه، وانا صراحتن ما اعرف


طبعا امه دايما يكلمها، وكل ما يمر يوم يومين ينسى واذكره، امه عندها سياره وسواق، ويجيها راتب، وتأمين صحي، وابوه عايش، وقد كذا مره قالت لزوجي فلوس ابوه هيه فلوسها ، زوجي يعطيها مبلغ رمزي جدا ان زارهم، مهما حاولت انه يعطيها اكثر ما يرضى، ويقول امي مرتاحه ماديا، وانا عندي عيال، وابغى ارتاح بحياتي في المستقبل ووراي دفع لدراسه عيالي وللجامعات وزواجهم. امي ما راح تيجي تدفع عني، وهيه طول حياتها تذكرت اخواني وساعدتهم الا انا. وان اعطوها اخواني هم ماديا مرتاحين، مو غلط. وقال لو هيه بحاجه لفلوس او اكل او علاج انا ما اكون رجل اذا ما ساعدتها. لكن هيه ما تركض ليل نهار عشان رغيف الخبز.


حتى اخر عيد، كالعاده ذكرته بخواته، واخته الصغيره قامت سوت موقف زباله معاه. قام زعل و قلي ولسه تذكريني فيها، انتي ما تتعلمي الدرس، ولما سمع كلامها قال بحياتها اذا اشوفها.


صراحتن انا اخوي يعطيني فلوس بالعيد، وان زرت يطلعني ويعزمني، حتى لما كثرت مسؤولياته، لكن ما عمري دققت وراه ورا زوجته. وورا فلوسه.
استغرب من خوات الزوج الي فيها حيل تلاحق فلوس اخوها المتزوج. وهيه متزوجه وربنا رازقها. مدري هيه فراغه عين او ايش بالضبط.


الان
مين معاه الحق انا او زوجي؟ وانتو يا بنات ايش ازواجكم يعطوا اخواتهم؟ وهل كلام زوجي طيبعي، ولا انا حقانيه بزياده؟ وهل عليه اثم على تفكيره؟