كلام من قلبي..لكم كلكم..

تدرون يابنات..

في وحده اعرفها تصير خاله صديقه لي بالجامعه..كنت لسه سنه اولى وهي تخرج..ماحملت..تخرجت انا وهي ماحملت..7 سنوات من شفتها ماحملت..

كانت قمه في الجمال..وجه مشرق وابتسامه حلوه وخفه دم عجيبه..

شفتها في الصالون..حااااااااااااااامل وشكلها على وشك ولاده..لكن صايره عجووووووووووووووووز..التجاعيد ملت

وجها..الحزن بعيونها..هامله عمرها..كأنها كانت في سجن انفرادي..

كأنها عمرها 50 سنه مع ان عمرها 32..؟؟

اول مارجعت البيت سألت عنها..

اتاريها يابنات كانت تاكل في عمرها 8 سنوات تقريبا..كل يوم تفكر..كل شهر تبكي..سيطر على تفكيرها الحمل..اليوم

يمر ..والايام تصير اسابيع..والاسابيع شهور..ولشهور صارت سنوات..والهم يزيد..وكلام الناس يكثر ..ونظراتهم

تجرح..وهي تعيش كل دقيقه..انتظار

اهملت نفسها..وحطت ايدها على خدها..واعلنت الانسحاب..واعتزلت للانتظار..عالجت وملت وردت عالجت

وتعبت..ماتلبس من نفس..ولاتاكل من خاطر..ولاتعاشر الا وتفكيرها الحمل..

وبعد سنوات الانتظار..جاء الشهر اللي ربي كاتب فيه رزقها..اللحظه الي كانت مكتوبه من ولادتها انها راح تصيبها..مهما

بكت ومهما حزنت..لم تتقدم دقيقه من دقائق القدر..

لكن بعد ايش..بعد ماصارت شبح..الهم صار حبيس عيونها..نظراتها تعودت الألم..نست شلون تضحك من قلبها..حتى

الفرحه اللي تنتظرها..ماعاشتها..فرحت ببرود..لانها ببساطه تعودت الحزن..النفسيه مولعبه بيدنا..عودي نفسج

تفرحين من قلب..وتؤمنين بالله ..

بصراحه تنهدت..وحطيت ايدي خلف راسي..ومددت جسمي ..وتخيلت العكس..رجعت 8 سنوات للخلف..وتخيلت لو

انها عطت الحزن وقت اقل..لو انها حولت الالم لطاقه تخرجها من جسمها بلعب الرياضه ..لو انها تعلمت كل يوم طبخه

جديده..لو انها انطلقت للناس بكل عفويه..باركت لهذي وباست ولد هذي..وشرت هديه لهذي..

لو انها حددت يوم لزياره طبيب الاسنان..لو انها زيتت شعرها وحطت الماسك بوجها..لو انها قامت الليل..وقرات القران

اكثر..لو انها عاشرت زوجها برومانسيه وخفه دم..

وشلون بيكون شكلها لما تحمل..اكيييييييييييييد غير..

يعني الحزن مايقربنا من الحلم..انا احزن والله يابنات اني امر بنفس اللي تمرون فيه..بس ليش مانحدد وقت معين

نزعل فيه ونراجع نفسنا وننهي السالفه..

احنا نتعالج..ومانخلي شي مانجربه..اللي علينا نسويه..والباقي على رب العالمين..خلونا نعيش كل لحظه

حلوه..ونتمتع بكل تفاصيل حياتنا..عشان لما يجي الوقت اللي ربي كاتب فيه الحمل..نفرح من قلب..

كتبت هذي الكلمات من غير تدقيق او مراجعه..لان الكلام طلع عفوي من قلبي..

الله يرزقنا جميعا..