كلام موجه لبعض البنات اوالسيدات وابغي رايكم

هلا بنات شو الاخبار موضوعي اليوم موجه لكل بنت ما اتزوجت لين احين ولكل بنت اتزوجت وما حملت

بتساألوني ليش انا اخترت هالموضوع ؟
اول شي بيكون كلامي ع البنات الي ما اتزوجي لغاية الحين حبيت اتكلم بها الموضوع لاني قريت كثير في المنتديات انه بنات كارهين حياتهم ليش انهم ما اتزوجوا لغاية الحين وغيرهم اتزوج واللي شجعني اكتب الموضوع عندي صديقه طافها قطار الزواج بس من اتشوف وحده بتتزوج اتموت من القهر والحسره واتقول انا شو فيني والله غمضني حالها وكلميتها ومن بعد ما كلميتها اقتعنت ابكلامي واتغير حالها 360 درجه والله ما كنت اعرف انه كلامي بيغيرها

بتسالوني شو قلتلها؟ بقولكم شو قتلها يمكن اطول عليكم بس في النهايه ان شاء الله اهون عن كل وحده ماره بها الازمه.

اول شي لازم اتعرفين انه الزواج قسم ونصيب الله سبحانه وتعالى خلق كل انسان ووعطاه نصيبه ورزقه في هالدنيا ابغي اسال اللي ما اتزوجوا لغاية الحين لييش تضايجون والله ما يستاهل الموضوع هذا كله لاضايجون خاطركم والله مب عشان انا ولا غيري اتزوج ما انحس فيكم شوفي حبيبتي انتي الحين تتحاسبين عن نفسج بس وعن امج وابوج بس بعد الزواج بتتحاسبين عن زوج له حقوق يعني اذا طنشتي عن حق من حقوقه بتتحاسبين والله اللي متزوجين الحين يحسدون اللي ما اتزوجوا ولازم اتعرفين انه عسى ان تكرهوا شيئا وهو خيرا لكم والله انه هذا امتحان من الله يمكن كنتي اتزوجتي واحد لاعاب يخونج من وحده لوحده او يتزوج عليج اتعرفون الوحده عقب ما تتزوج واتسلم اغلى ما عندها لريلها خلاص تتعلق فيه اكثر وما تقدر تستغنى عنه واضحي عشانه واتخيلوا في الآخر يخونها بعد ما يابت اعيال منه او يتزوج عليها ولو كانت مب امقصره والله حزتها اتقولين يا ريتني ما اتزوجت صح ولا غلط حزتها تتمنين لو قعدتي من غير زواج خاصة اذا طحيتي في ايد واحد ما يستاهلج والله بالعكس الطلاق بعدين وايد صعب ويوثر في نفسيتج فما اتعرفين حكمت الله وين شوفي يمكن الله يبالج الخير فلا تزعلين ابدا بالعكس احمدي ربج ع كل شي

بتقولين انا خاطري اتزوج ابغي انسان يحس فيني اشكيله همومي خاطري احس بالأمومه؟ وانا معاج صح هذا حلم كل البنات بس ما اتعرفين حكمت الله وين يمكن تتزوجين وما تنجبين واذا انجبتي هل انتي متاكده انه عيالج اللي بتيبنهم بيكون فيهم خير بيقفون وياج في الكبر يمكن يكون ريلج ريال والنعم فيه بس يمكن عيالج اللي بتيبنهم ما يكون فيهم خير فلازم تعرفين انه حكمت الله في انج ما اتزوجتي يمكن الله حابلج الخير وما يباج تتعرضين لها الموقف افحياتج.. واقرب مثال مروا ع دار العجزه وبتشوفون امثله والله اتعور القلب شو نهايتهم اتزوجو وخلفوا وفي النهايه اقرب الناس حقهم اللي سوا فيهم شذي بس مب كل الناس وابغي اوجه هالكلام حج اللي اتزوجت وما حملت لين احين لاتزعل اعرفي انه هالموضوع فيه خير حقج وبنفس الوقت امتحان لج وانه الله ان شاء الله بيرزقج الذريه الصالحه يمكن اتكون بعد سنه او عشر اسنين بس حزتها ان شاء الله بيرزقج بالذريه الصالحه الشاطره مب بكثرة العيال بس منو من هالعيال بيكون فيه الخير وبيوقف وياج افكبرج يمكن يكون واااااااااااحد بس ابرك من عشره صح ولا غلط كلامي يعني يامه انشوف ناس يكون الله رازق عليهم بالعيال بس ما يكونون فيهم خير لاهلهم شوفوا دار العجزه وبتعرفون والله حزتها يوم ولدج يعقج في دار العجزه حزتها بتقولين ياريتني ما يبت عيال صح بعد الواحد ما يعرف حكمت الله وين عسى ان تكرهوا شيئا وهو خيرا لكم وعسى ان تحبوا شيئا وهو شرا لكم..

والله انه الزواج مب كل ايامه عسل لازم فيه بصل يعني الزواج حلاته في بدايته اول 6 شهور هذا في راي الاكثريه بس بعد ما تبين العيال تبدا المسووليه وريلج ما بيدلعج نفس ما كان يدلعج في بداية الزواج كل شي يقل تدريجيا حتى ينعدم عن بعض الريايل الدلع ولا شنه حرمته عندها مشاعر واتحس واللي اتقولج انا من اتزوجت ما صارت لي مشكله مع زوجي اعرفي انها جذاااااااااااااااااابه واتقص عليج لانه ما في حيايه زوجيه تخلو من المشاكل..

بقولكم عن عمري انا متزوجه من 3 شهور بالضبط وعمري 23 سنه والله ما كنت ابغي اتزوج بالمره بس النصيب يوم يي شو الواحد بيسوي وزوجي انسان محترم وايد من البيت للمسجد والمسجد للبيت والله انه بنات الفريج اغلبيتهم كانوا يتمنونه زوج حجهم وانا كنت وحده منهم بس الله كتبلي نصيب وخذيته والكل يقولي يا بختج واليوم تحديدا عرفت اني حامل والله اني طايره من الفرحه ومستانسه مع ريلي وايد بس اتعرفون والله احاتي هل زوجي بيظل مثل ما هو وما بتغير بظل انا الاولى والاخيره افحياته مثل مايقول والله مب ضامنه هالشي لانه ما اعرف الله شو كاتبلي واذا ظل وياي هل البيبي اللي فرحانه فيه بيكون فيه الخير ولا بيكون اول واحد يعقني في دار العجزه او يمد ايده علي هل بقدر احسن تربيته وما بقصر وياه ولا في ابوه صدق يا بنات والله حزتها الفرحه خفت عندي كل همي انه يكون ولد بار مب اكثر لاني بتحاسب عنه اذا قصرت افشي وبتحاسب عن زوجي بعد اذا قصرت افحقه يالله يرحمنا برحمته بس والله انه الزواج مب بس فستان ابيض او شهر عسل او كلمه حلوه الزواج مسووليه كبيره وبتحاسبين عن هالشي اتمنى كل وحده اتعرف حقوقها عدل ولا تغفل عنها لانه اليوم دنيا باجر آخره وحتى لو كان زوج مايحترمج او يمد ايده عليج او يخونج اعرفي انه هذا امتحان من الله والله عمره ما بيضع صبرج كله في ميزان حسناتج



بختم هالكلام بقصه بنت خالتي متزوجه تقريبا من 7 شهور اتحب ريلها حب والله انه المصروف اللي يعطيها اياه نصه تصرفه عشان تكشخله ونصه اتوفره لانها ناويه تشتريله ساعه غاليه قبل فتره سرت وياها عشان تشتري الساعه اللي افخاطرها وتقريبا سعرها 8000 درهم فقتلها خذي ساعه 4000 درهم ووفري 4000 درهم جان اتقولي لاه والله انه هاي الساعه اشوي عليه هو يستاهل اكثر من جذي بس ما اتعرف انه زوجها ما يستاهل اريال واحد نصرفه عليه بتقولولي ليش ؟انه شفته يغازل وحده في السنتر والله شفته واستغربت انه ما خذ وحده والله بحلاتها وهو اخسف عنها وبعد يغازل عليها كنت ناويه اخبرها بس غمضتني ما ابي اخرب فرحتها خاصة انها حامل حاليا والله انه عيني دمعت يوم قالتلي كلام المدح عنه الله يهديه ويعمي عينه عن الحراام والله انا استغرب من هالظاهره يوم اشوف الريال ويه زوجته وهو عينه مب امخليه وحده ويغازل شنه مراهق ولا يخاف ع بيته مب الكل بس الاغلبيه شذي اربيعتي كشفت زوجها انه عنده مبايل ثاني في السر امخليه حج المغازل والمصخره وجدامها يبينلها انه ما في احسن منه بل بالعكس ما في اخبث منه الله يستر على امة المسلمين اجمعين آآآمين


والله اني انا خايفه ع ريلي بعد فتره يمل مني و يستوي شراتهم احاول اني ما اقصر وياه في أي شي




سوري طولت عليكم واااااااااااايد اعرف بس اتمنى موضوعي يفيد الكل ويهون عليهم واذا فيه أي تعليق خذوا راحتكم وعلقوا انا احترم كل الآراء..:26: