كلكم كلكم ادخلوا للحريم فقط

ياخواتي ياعزيزاتي 
افهموني زيييين انا ماقصدي من الموضوع ان الزوجه تقصر بواجباتها او ماترحم زوجها بالعكس
لكن لكل شي حدود والشي اذا زاد عن حده انقلب ضده
لاحظت بالوقت الحالي
 ان الزوجه اخذت جميع ادوار الزوج 
ابقولكم امثله على واقع نعيشه واتوقع اغلبكن مثلهن او على الأقل تشوفون حريم مثلهن
مثل وحده تقول من يوم جبت اول ولد وانا الي اروح للمجمعات التجاريه الي فيها حلاق الأطفال 
واحلق ولدي بنفسي ومازلت كذا وجبت ثلاث اولاد ونفس الحكايه تعود ابوهم ان شعورهم تطول انا اوديهم يا ابوهم ينزلنا ويروح ولاخلصنا اخذنا 
او احد خوالهم يودينا او اي سواق مشاوير 
المهم ابوهم ماله اي علاقه بالأهتمام بعياله لو شعورهم تغطي عيونهم مايفكر يوديهم لأنه تعود ان فيه اب سبير  لعياله للأسف
وعانت كثير وصارت مشاكل بعد ماكثرت مسئوليات البيت عليها ومو قادره تلحق على كل شي
ولو كان من البدايه عارف انه مسئوليته كان ماصارت هذي المشاكل
بس هذي غلطتها هي.....واخر شي تحط اللوم على زوجها
زوجها اكيد غلطان بس هي عودته على انه يتكل عليها
اتمنى وضحت الصوره.
ومثال ثاني 
تقول وحده اذا تعبوا عيالي انا اخذهم للمستشفى وامسك سرى وادخل على الدكتور او يحولوني على الأستشاري 
وابوهم مو موجود يوصلنا ويروح 
وانا اقوم بكل شي 
وكثروا عيالها وصار عندها اطفال صغار 
واذا تعب احد من الكبار لازم تترك الصغير بالبيت وتروح مع الكبير وتعبت هي والصغار  
وصارت مشاكل مع زوجها
لأن تعود مايروح معهم ابدآ هي تتكفل بكل شي من ناحيه علاجهم وللأسف الموظفات يمكن هي الي تدفع تكاليف علاجهم 
المفروض مايكون كل شي على الزوجه خاصة اذا كان عندها طفل صغير والمريض كبير عادي يروح مع ابوه مو بحاجة امه
ومثال
موظفه 
تقول تعودت ان لبسي ولبس عيالي والأكل كله انا اشتريه من حسابي وكرم مني وتعاون معه 
بس تحسفت بعد فوات الأوان 
صرت لو اطلب منه ريال واحد استغرب وكأني طالبه منه كل اموال الدنيا 
لأنه ماتعود احد يقوله عطني
وتقول احيانآ تكون ظروفي الماديه تعبانه ويكون بوقت الأعياد مستحيييييل يشتري لأولاده لأنه تعود مايدفع ولايدري وش يشترون وش يحتاجون.
ومثال ثاني
وحده هي الي تدرس وتذاكر  لبناتها واولادها وابوهم مايدري عنهم ولا ايش يدرسون
لييييييييش كذا الأطفال اطفاله بعد وهو مسئول عنهم 
على الأقل اذا كان مايعرف يشرح او يحب يدرسهم يمسك الكتاب بعد ماتدرسهم امهم ويسألهم ويشوف عن مستواهم 
يكون فيه تعاون بينهم عشان اطفالهم وعشان تستمر الحياه بسعاده وموده ورحمه 
يعني تخيلوا ان الزوجه تطبخ وتنظف وتدرس اولادها وتتقضى للبيت جميع الأغراض وحامل او نفاس او تعبانه

وللأسف أغلب المشاكل الزوجيه والأختلافات 
بسب ان الزوج تخلى عن بعض مهامه وجعلها من مهام الزوجه  
والزوجه للأسف  هي السبب في تعويد الزوج على الأتكاليه
اتمنى يكون موضوعي واضح وفهمتو قصدي زين 
واسأل الله ان يسعد ويوفق الجميع لما يحب ويرضى.