كلمة لكل بنت تفكر في الزواج

غاليتي
صغيرتي
أمي .. إذا في يوم فكرتي في الزاوج .. وحابة تخوضين معركة الزواج>> للأسف حقيقة الزواج معركة يا ربحانين أو خسرانين
فكري مليون مرة وقبلها كملي دراستك
خليها حلمك وهاجسك وهدفك وعلى بال ماتخلصين الجامعة تكونين في بداية العشرينات إن شاء الله .. لسى صغيرة .. لا يجي في بالك إنك كبرتي وعنستي وفاتك القطار
خليه يفوتك أفضل من زواج فاشل
أفضل من الإرتباط برجل مايقدرك ولا يحترمك
ماراح أقول يحبك لأن الإحترام عندي أهم من الحب
أساساً الإحترام بوابة كل المشاعر والأحاسيس
لا تتزوجين وتفكرين في الزواج لأن بنت عمك وعمتك تزوجوا صغيرات وصديقتك وبنات معارفكم تزوجوا صغيرات
لاتتزوجين لأن بس أمك تبغى تفرح بك
لأن أبوك شايل همك
أو أخوك
الزواج قرار .. خليه يكون قرارك بإرادتك وعن قناعة ومن غير أي ضغوط لامن أهل ولا من الناس لو بيجي في بالك إنهم ينظرون لك نظرة شفقة إنه مسكينة ماتزوجت .. محد بيتزوج غيرك.. محد بيعيش مع هالآنسان غيرك .. أمك اللي تبغى تفرح فيك ولا أبوك اللي شايل همك أو حتى نظرات الناس
كلهم ولا واحد منهم راح ينفعك ويفيدك
بالعكس ممكن يوم يشيلون هم رجعتك لهم لو ما توفقتي في زواجك
حقك قبل ماترتبيطين بالزوج تسألين عنه وعن أخلاقه وأخلاق أهله وجماعته مثل ماهو له حق يسأل عنك وعن أهلك وجماعتك والجدارن اللي حولكم .. عيشي حياتك .. ماأقول لك الزواج مش نعمة بالعكس نعمة عظيمة
بس لما تفكرين فيها خليك واعية وفاهمة حقوقك وواجباتك واللي لك واللي عليك
ترى وأنا أمك الزواج مش مسكة ورد ولا فستان أبيض ولا أغاني ورقص وحفلة توديع عزوبية ولا سفريات ولا نوم وأكل وشرب
هالأشياء كماليات بإستثناء الأكل والشرب والنوم لأنها غريزة بشرية مانقدر نفصلها عن إنسانيتنا وخلقنا
الزواج أكبر بكثير من هالشكليات والكماليات
نشوة وتنتهي وبعدها يبدا الجد
مثل الإمتحان بالضبط .. ياتنجحين يا ترسبين
عدي نفسك إعداد يليق بك كزوجة وكأم بإذن الله
حقك تختارين الإنسان اللي أنتِ توافقين عليه
حقك يكون لك سكن خاص فيك مو والله يحطك أما الأمر الواقع ويسكنك مع أهله
حقك تكملين تعليمك لو بغيتي تتزوجين في سن مبكر
حقك تتوظفين لما تتوفر لك فرصة وظيفية
مو حضرة جنابة يقول لك لا
كثيرات اندفنت أحلامهم في إكمال دراستهم ووظايفهم .. بس عشان زوجها له السلطة والأمر والنهي
خليهم يكتبون شروطك في عقد الزواج مافيها شي
حقك أمي ولا عليك من أحد
حقك تفكرين مليون مرة في الإرتباط باللي راح يتقدم لك .. كثيرات تسرعوا وكانت النهاية
زواج فاشل وأطفال ضحايا طلاق
أسأل الله يرزق بناتي وبنات المسلمين الأزواج الصالحين
ويسخر لكل زوجة زوجها ويديم على بيوت المسلمين العدوء والسكينة والألفة والمودة