كلمة نطيب خاطري تكفيني

السلام عليكم ورحمة الله وبركاته

اخباركم حبيباتي ، أنا ترددت كثير أكتب والا لا مستحية منكم وخايفه اقرا كلمة تجرحني وانا مافيني اتحمل ،،،

أنا قد كتبت من قبل قصه انفصالي عن خطيبي قبل كم شهر والحمد لله على كل حال اكيد هالشيء فيه خير وصلاح لي وله وانا مؤمنة بقضاء الله وقدره ومقتنعه بأني معاه ماعاد ننفع لبعض..

انا كنت خايفه اكتب لانه حتى اقرب صديقاتي هي الوحيده اللي اشتكي لها لاني مااحب ابين ضعيفه قدام اي حد البارح طاحت فيني صراخ وقالت لي ذبحتيني من كثر ما تتكلمين عنه وسكرت بوجهي ماتوقعت منها هالتصرف كنت افضفض عادي انا مااشتكيت لغيرها بعد الله لان انا ماعندي اخوات وجرحتني الله يسامحها .. بعد انتم لا تجرحوني رجاءا ..وسامحوني بقول كل اللي بخاطري اكيد بيطول الموضوع ..

يابنات علموني وش اسوي مو قادره انساه ولا يغيب عن عيني دقيقه على كثر ماجرحني مو قادره اكره وانساه تعبت يابنات جد تعبت كل يوم اقول معليش بكره انسى الشهر الجاي انسى مافي فايده، لا تقولون ماعندك كرامة وكفايه انه باعك اعرف هالشيء كويس .. حاولت كثير انساه شغلت نفسي باشياء كثيره تقربت من ربي اكثر واكثر ، تقربت من اهلي وصرت اروح مع اهلي بعض المحاضرات الدينية و حاولت ادفن نفسي بعملي حتى صرت اجيب بعض الاشغال البيت مافي فايده احسه عايش معاي ومتربع بداخلي.. كل يوم احوال الناس تتغير كل البنات اللي حولي وكانو مو متزوجات سبحان الله تزوجو في هالفتره واللي حامل احس كل شيء حولي يتغير الا احساس الالم اللي بداخلي ومحبتي له..

تخيلو لي شهور النوم بالنسبه لي كابوس تقريبا كل ليله انام بعد مسلسل من الدموع ولازم احلم فيه ماعدت انام زي الناس وكل ما جيت ابي اكل اي حاجة واتذكره مااقدر ، نحفت وحالتي صعبه وعلى طول منرفزة ومعصبه ، قبل ما كنت كذا كنت اقدر اضبط اعصابي الحين مااقدر اخاف اخرب علاقاتي بالعمل ..

حتى اذا غمضت عيني اشوفه .. اكلم نفسي اقول اذا رجع بقوله كذا كذا وبعدها اتذكر ايامنا وكلامنا وضحكنا واشوي اتذكر تصرفاته الجارحه واشوي ارجع ابكي ..والله ابي انسى .

اتعوذ من ابليس واذكر ربي بس مايروح من بالي وش الحل انا مره تعبانه مقهوره من نفسي انا اقوى من كذا بكثير .. الناس عندهم مصايب وانا خطبه فاشله تهدني ما يصير انا تغلبت على اشياء كثيره بحياتي ليش انا ضعيفه كذا قدامه .. صحيح انا كنت فاقده الامل اني احب بيوم من الايام لاني صعبه مره صعبه بس هالانسان دخل حياتي بعرضها وطولها وحبيته حب مو طبيعي وربي يشهد مو بس بقلبي لا بقلبي وعقلي عاد مانفعنا مع بعض .. خلاص الي متى بتعذب كذا تعبت وانا عايشه وخاطري مكسور كل ماقالو اهلي موقف القى نفسي لا شعوريا اقولهم اي هو كان يقولي كذا كذا يطالعون بعض ويسكتون وتجي امي تقولي لا تخلي شيء بخاطرك يابنتي انسي ..

يابنات حتى بدعائي وربي ماادعي انه ربي يجمعنا اقول اذا صلاح لنا نكون مع بعض ياربي تسخرنا لبعض وترجعنا احسن من قبل واذا هالشيء ماهو صلاح لنا ماعاد ابي شيء غير ينجبر خاطري .. كلما مادعيت ربي انه ينزع غلاته من قلبي اصحى ثاني يوم متعلقه فيه أكثر ..

كنت مستعده انسى الجرح واعطيه فرصه بس يرجع يحن علي ابي اهديه روحي بس اشلون وهو خلاص باع..

انا ماعاد ابي شيء بس ابي يرتاح بالي ابي ارجع اضحك مثل قبل ارجع اروح كل مكان زي قبل ماعدت اطيق اخرج من البيت اخاف اروح اي مجمع واشوفه ..


علموني اشلون انسى ..