كلمه مافي نصيب.....كم تأثر في البنت.....لكن الحمد الله

السلام عليكم و رحمه الله و بركاته


طبعا انا من اسبوع كتبت عن شخص يه يشوفني نظريه شرعيه، و كنت مرتاحه و صليت استخاره كم مره و كنت مرتاحه اللين ما ياني الرد من ساعه بانه الريال استخار و ماشي نصيب، الشي اللي ضايقني مش رفضه، اللي ضايقني انه ليش خلوني معلقه اسبوع و نص كان قلتوا من زمان، انا مابعتب على الريال لانه في النهايه نصيب و بالنسبه لي الحمد الله انا انسانه ملتزمه و مب ناقصني شي و الحمد الله ع نعمه الجمال و الطول لكن سبحان الله الرياييل انواع و كل رجل رايه يختلف عن رجل اخر، المتعب نفسيا انه في نوعيه من الناس تتاخر في الرد و هالشي يضايق انه قله ذوق و مافي مراعاه للطرف اللي ينتظر اللي هو البنت، انا اليوم انرفضت باجر باذن الله راح ايني نصيبي، مع انه هذا الشخص مطلق و يكبرني ب ٩ سنين و غيره عنده ٤ عيال، فوق هذا قبلت و قلنا لهم ماعندنا طلبات غير عرس، لكن هم الناس رفضوا.... في البدايه قلت شكله يبغيني لانه في النظره عجبته و كان ماحاب يطلع من عندي و يتم زياده لكن بعد ماشفت الرفض صرت خلاص ما اثق بلغه الجسد و الابتسامه ماعادت تغرني و تخليني اكون واثقه انه بيوافق علي، كل هذا اكتشفت انه مب مقياس، انا الحين في سن الثلاثين و كل ما اكبر افهم الدنيا و الناس اكثر، مافي غير الافعال اللي بتخليني اصدق لكن الكلام ببلاش و المجاملات، عالعموم الله يسامحهم اللي يخلون البنت في قائمه انتظار ، نحن البنات مابنزعل لو قالولنا مافي نصيب مب عيب كل انسان له حق يرفض و يوافق، لكن الشي اللي يضايق انه تخلونا لا نهارنا نهار و لا ليلنا ليل، لما البنت تتحرقص لانه تبي جواب مب شرط نعم قولولنا لا راضين ولا انكم تخلونا معلقين، الحمد الله حاسه بعبء و انزاح و الحين اقدر اقول صفحه و انتهت....الله يعوضني باحسن و يعوض كل بنت تبغي الستره و الزواج و ماتنحط في نفس الموقف اللي انحطيت في.....الحمد لله على كل حال و يكتب اللي فيه الخير يارب....