كيف حال العسولات الحوائيااااااااات ان شاء الله بخير >>>>ناويتلها مقدمه طوييييييييييله الله يعينكم
اللي شافت موضوعي عن غسالة الصحون راح تعرف ان العريس وهو مجففي بهي الطله وصل بالسلامه
يارب لك الحمد اللي قدرني اجمع راسين بالحلال والاحلى جمعتهم لخدمتي عقبال ما اجيب الطبينه الغساله الاتوماتيك
ويمكن زوجه ثالثه ورابعه بعد >>>>من قده هالعريس اتخيل زوجي يقول ياحظه مير معصي على شنباته >>تراي متاثره بالاسريه
هذا الله يسلمكم اختكم الغيد استسلمت امام كرهها للشغالات وشافت لامناص من تحمل المسئوليه لذلك استبدلت هالكائن البشري المزعج بألات العصر الحديث
تخفف عني الشغل وارتاح نفسيا وجسديا وأبو الشباب مبسوط من قراري
وكان من ضمن الحلوين هالمزيون اللي شرف بيتي واخذ مكانه في مطبخي جنب لجنب عروسته الحلوه غسالة الصحون
الحقيقه يا بنات العالم هبة في الغسالة الاتوماتيك ما اقول انها مو مهمه بس فضلت المجفف عليها وما احد عطاه حقه
المهم ندخل في الموضوع واتمنى شرحي خفيف عليكم واعذروني على بعض الصور طافي ضوها
هذي صورة المملووووح فديته على هالطول والرزه والوسااااامه >>>ذكروني عن ايش اتكلم خخ
وهنا الباب تبعه مفتوح واللي عليه العلبه الخضراء هذا ملين انسجه ويمنع الشحنات الكهربائيه
وهنا الازرار كلها فر ماعدا زر التشغيل فر وضغط ونبداء من الاول وهو زر التشغيل 000والثاني لتشغيل نظام منع التجاعيد والثالث درجة الحراره 3 درجات 00والاخير الانظمه على حسب نوع الملابس
خطوات العمل وبعدها التطبيق >>>>مدري ليش تذكرت مختبر العلوم المهم
اولا :تحطي الملابس جواة المجفف وتقفلين الباب اذا توفرت المناديل اللي تو صورتها فوق حطي واحد معاها
ثانيا :اختاري النظام اللي تبغيه على حسب نوع الملابس
ثالثا:اختاري درجة الحراره على اساس الخطوه اللي قبل
رابعا:ابرمي زر التشغيل واضغطي عليه تبداء تشتغل
هذي الصوره توضح لك 3 انظمه تختاري اللي يناسبك فيها على حسب سمك الملابس
الاول وميزته بالاحمر >>>اختاره لكل الملابس لحد الاخر عكس جهة السهم للاشياء الثقيله مثل المناشف والارواب
تختارين الدرجه اللي تبين يعني اذا احتاجت وقت بسيط لان القماش خفيف وينشف بسرعه اختار 20دقيقه وكل ما زاد السمك تختارين اكثر مثل البجايم القطنيه اختار لها 40د واحيان 50د >>>يعني انت اللي تختارين
الثاني وميزته بالاصفر تنشيف بالهواء بدون حراره ما استخدمته بس اتوقع للاقمشه الخفيفه جدا المطاطيه او البلاستيكيه
الثالث وميزته بالاخضر يبداء من الجنز ميزته هالنظام اتوماتيكي هو يشوف الملابس وش تحتاج من وقت ويشتغل ما جربت فيه غير تنشيف الجنز يعني تجفيف تلقائي بمجرد ما يستشعر جفاف الملابس يوقف من نفسه
راس السهم تحصلين كلمة OFF تفرين المؤشر الى مثلا 40 في النظام الاول راح يمشي مع السهم لحد الاوف وهنا انتهت دورته وكمان الانظمه الباقيه نفس الشي تنتهي عند الاوف
الان غسلت 3 انواع اقمشه عبايتي وثوب ولدي والجنزات >>طبعا كنت بصور المناشف بس ما يبان فيها في التصوير
الاول ثوب ولدي يالله بسم الله
اول شوفوه قبل ادخله المجفف >>>حاولت اصور التجعيد اللي فيه بس هذا اللي طلع معي
والان دخلته المجفف واخترت النظام الاول 20د لان الثوب قماشه خفيف وما يطول وبعدها اخترت درجة الحراره عالي لاني ابيه يطلع مكوي وشغلتها بمجرد ما يخلص يصفر لك تصفيره لو انك عند جيرانك تجينه يعني مالك عذر تقولين ما سمعتك
وهذي النتيجه بالنسبه للثوب من جهتين
يــــــــــــــــتــــــــــــــــــــبـــــــــــــــــــــــــــــع
وبعد المجفف >>>صرت احب اغسل عبايتي على كل خرجه من اول لو بقعه اخر العبايه اقول ما تبان اشيل هم كويها الحين كلا يشوفها >>>عشان ارتحت من الكوي خخخ
وهنا الجنزات نسيت اصورها قبل بس اكيد عارفين كيف تكون وهنا بعد مكويه وخالصه على الدولاب
ملاحظاتي :
1- الملابس تطلع ناعمه واللي ماهو مكوي بالحيل يصير سهل كويه من جدا ناعمه تهبل عكس منها على المنشره
2- اللينووووور يبقى شي بسيط منه في الملابس يعني ريحته ما تكون قويه مثل لو نشرتيها عادي
3- الانبوب اللي من ورى لتصريف البخار ماله داعي مع مجففي المهم تبعد عن الجدار 25 سم وانت مخيره لو بتحطين الانبوب بس اشوف ماله داعي شغلي الشفاط وخلي الباب مفتوح وخلاص >>>على فكره الجهاز مو على شكله تراه خفيف تحركينه بسهوله
4-الكهرباء والتوصيل لازم سلك خاص له يسحب من الطبلون <<علبة الكهرباء الاساسيه في البيت
طبعا يحتاج سلك توصيل بحجم معين ويتشبك مثل سلك المكيف والصوره توضح ماينفع فيش وتشبكين لا مايتحمل
5- تنظيف مرشح النساله >>>كذا مسمينه وهو اللي يتجمع فيه الوبر اللي يخرج من الملابس كل بعد تجفيف تنظفينه
وشوفوه في الصوره قبل وبعد التنظيف يرجع لمكانه ويتنظف عادي بدون ماء بفرشه يخرج بسهوله
6- حصلت شركات كثير بس ما كنت مقتنعه الا بجنرال وميتاج وويربول >>>كلها امريكيه جعلهم الخساره بس انهم جوده
جنرال كل محل اروح يقول ماعاد فيه منه مخلصه ولا ادري السبب بس يقولون وير بول البديل
ميتاج شفته مدري حسيته كذا جلف ماعنده احساس ههههه والله كأن مافيه نعومه واعجبني الويربول واخذته
7- اخذته بـ1800 عشره كيلو ويارب لك الحمد روعه يابنات راح عني كل الهم مريول بنتي وثوب ولدي وعبايتي على طول نلبسها الملابس الباقيه اطبق وعلى الدولاب اللهم ثياب زوجي صار كويها اسهل مية مرررره وربي ما اوفيه مدح ابن الحلال الله يخليه لعين ترجيه >>ضاعت علومها ههه
7-واخيرا اعتذر عن التاخير لكل الحلوات اللي طلبوا انزل موضوع وبالاخص 00ام رزان 21----@@ ماء الكافور@@ ---ام فراس وفارس >>>>وان شاء الله استفدتوا
8- اتحدى اذا في موضوع اطول من موضوعي هع نصه شرح والباقي هذرتي :)
المهم لا تنسوني من دعواتكم الطيبه اخــتــــكـــــم في الله الــــــغـــــــــيـــــــــد