كل الأشياء الفاشلة اللي جربتها للتسمين

بدون مقدمة
هذي حصيلة سنين طبعا

1 - عنبرية النورس علبتين
2 - عنبر خام مرتين مرة وانا طفلة ومرة دحين
3 - الأعشاب الايرانية اشتريتها من القرية العالمية في دبي
4 - عنبرية الإمارات
5 - حبوب زيت كبد الحوت من سفن سيز كنت اخد حبتين تلاتة مرات في اليوم
6 - حبوب الخميرة الكرتونة الحمرا كنت اخد حبتين تلاتة مرات في اليوم اكتشفت لما شفت صوري القديمة انها طلعتلي خدود صغيرونة
7 - فيتامين دينا ميزان
8 - فيتامين فيتريت الصيدلي قالي يتخن
9 - فيتامين ملتي- سانوستول
10 - المزيد المركز يمكن لأني كنت اعتمد عليه بدون ما اكل
11 - سوستاجين
12 - شرب مغلي الحلبة كوب واحد في اليوم وطريقتي كانت احط ملعقة من الحلبة مع موية واغليها واشربها بالسكر
13 - خلطة كل المكسرات مطحونة
14 - حب العزيز مع اللوز والحليب ملعقة وحده في اليوم
15 - الكثيراء اطحنها واخدها ملعقة وحده في اليوم مع لبن
16 - حبوب زهرة الربيع المسائية من شركة سفن سيز فقط صحبتي وقريباتها كانو نحاااف مرا واخدوها لمدة 3 شهور سته حبات في اليوم وكلهم جسمهم سار يجنن ماشا الله انا اخدتها لمدة شهر بالضبط وماشفت نتيجة فجاني احباط مع ان صحبتي قالت ماحتشوفي بداية النتيجة الا في وسط الشهر التاني تقريبا بس انا يئست, وتاخديها من شركة سفن سيز وبس لان معاها اشياء تانيه هي اللي تتخن اما حق جي ان سي مثلا سادة دي بالعكس ممكن تنحف لانها تساعد على سرعة الحرق
17 - فيتامين سترس تابس لكن قريت من دكتور انو يساعد على تثبيت الوزن ويصعب نزوله فقلت اخدو كمان ماشا الله بعد علبتين ونص احس انو وزني مانزل لانو كان ينزل بسرررررعة الحمدلله الحمد لله
18 - سوبر كيد
19 - تمر بالسمسم طلعني كيلو ووقف
20 - جربت الماش يومين بس ماقدرت على طعمو ووقفتو
21 - موية الطوب الاحمر ههههههههه ادري بتنفجعون بس وحده وانا صغيرة ضحكت عليا وقالت لي انقعي طوب واشربي الموية بتنتفخين وانا ماقصرت خخخخ الحمدلله اني لسى عايشة يمكن صادقة مدري < كمان!! هههههههههه
22 - اشتريت الحبوب الصينية بس لسى ماجربتها ,, مخليتها لوقت العازة واخر حل خخخخخ
23 - غذاء ملكات النحل رويال جيل
24 - حليب الصويا

اعذروني في اشياء كتير ناسيتها بس اول ماافتكر حقولكم
الشي التاني
انا عيبي اني اعتمد على الخلطة او الدوا وانطنش الاكل يمكن دا واحد من الاسباب برضو
في كم حاجة تخنتني لما جربتها بس مو قادرة ارجعلها نهاااائي لاني مجرد ما اتخيلها حتى كبدي تلوع
واللي هي
1 - ساندوتش محشي بشرايح زبدة وشرايح حلاوة طحينية مع شرب كاسة حليب مرة الى مرتين في اليوم
2 - ساندوتش محشي بالجبنة السايلة مع بطاطس مقلي كنت اشرب معاه عصير سن توب مرة في اليوم بس كانت نفسيتي حلوة ومحافظة على وجباتي الاربعة
3 - حليب انشور سمني بسرعة ماشا الله بس كنت مدمنة عليه يعني اشرب اربعة او خمسة مرات في اليوم وفي الكوب الواحد خمسة ملاعق عيبو انو تفشين بسرعة ودحين سرت مرررا اكررهو ويلوع كبدي

وفي دكتور طب بديل نصحني بس انا كسلانة مااسمع الكلام قال كل يوم الصباح اعصري تفاحتين فرنسية واخلطيها مع حليب المراعي واشربيها وانقعي منجا في موية حار وفي المسا اعصريها مع حليب المراعي ,,,وحتسمني ,,ولفقر الدم دايم اشربي عصير جزر مع ملعقة عسل يشيل فقر الدم بسرعة

حبوب موسيجور طول عمرها تزودني لحد الـ 39 وتوقف ليه ماعرف
حبوب برياكتين كانت تفتح شهيتي اقوى من موسيقور ومن سيبروفيتا وزاد وزني معاها بس للاسف انقطعت بس الصيدلي قالي حتلاقي نفسها في مصر اسمها ترياكتين

لازم تعرفو انو من اكتر عيوبي اني ما استمر يعني شهر اقوى شي عندي واحيانا تلاتة ايام ادا ماشفت نتيجة ابطل
تاني شي انا اكل في نفسي كتير على كل شي ومن كل شي حتى الاشياء التافهه وافكر كتيييير وكتووومة
وكمان اول ما اقرب من الاربعين كيلو اما امرض او تجيني الدورة بالام شدييييدة او يجيني اسهال مستمر الله يكرمكم او لوعة كبد مادري ليه يمكن السحر له علاقة بالموضوع الله اعلم المهم يروح وزني كللله وارجع لـ 35 بعد كل العذاب اللي فات
اخيرا مشكلتي احب الخضروات واكره الحلا والدسم :(

حاليا اخد حبوب سيبروفيتا + فيتامين فتريت + حلبة مرتين في اليوم + احاول اني انتبه للسعرات تبع الاكل وياارب اسمن واحلو
الله يخليكم افتكروني واهلي لو مرا وحده في سجودكم انو ربي يفك عننا اللي فينا ويقرب الفرج ^_^