كل الامهات ومن لديها خبره تدخل والحكيمات

الله يهديه
ويجعله من الذرية الصالحة

سولفي معه كل يوم جيبي شاي وبسكوت واجلسي انتي وإياه. تكلمي واساليه واذا تكلم اسمعي كلامه وتحمسي معه كأنه زوجك او اختك الي تتكلم. اذا قال فكرة جديدة قولي الله فمرة جديدة واذا قال شي غبي. تجاهليه. اوًناقشيه ببساطة بس لاتركزين على الموضوع.اساليه عن رأيه في أشياء مختلفة. واحترميه. يحترم نفسه ويثق فيها

هلا فيك اختي
ولدي الكبير كان هادي بس اذا تبين الثقة بنفسه لازم تتحاورين معه وتسولفين معه
لاحظت كلمتك اصرخ عليه مايبكي هدي بالك ياقلبي اكيد متأثر وبتتحطم ثقته بنفسه حتى لو غلط فهميه انه غلط بدون ضرب انتي شفتي الضرب والعصبيه ماجابت نتيجة وبالنسبة لضرب اخوه ممكن لان شاف ان اخوه تعجبك تصرفاته حتى لو ماقلتي له يمكن سمعك تسولفين مع احد عنه
الشي الاخير دام ابوه ماشاء الله الله يخليه لكم مدلعه ومهتم فيه خليه يصاحبه وياخذه معه واذا كان ياخذه قولي له يسولف معه ويفتح معاه مواضيع ويشاوره مثلاً بالسيارات حتى لو مايفهم بهن خليه يسولف لا السيارة الفلانية افضل سريعة ومدري ايش او مثلاً يسولف معه بأندية ومباريات
خوذيها مني اذا ابوه ماهو معاه ماراح يتخطى المشكلة انا قريته بمقالة وانتبهت لولدي وعلمت ابوه الله يرحمه الحمدلله صار واثق ويقول رايه مع ان يغلبه طبع الهدوء ماهو مزعج


اللهم اصلح ذرياتنا واجعلهم قرة اعيننا

صراخك وضربك والمبالغه في التهزيء والقمع هي اللي تجعل الطفل مكسور مهزوز ماعنده ثقه بنفسه ويعيش في خجل وانعزال وحساس دمعته قريبه

الحل بيدك انتي وابوه الولد محتاجكم كقدوه ومثال وللاسف بإعترافك انتي مثال سيء له بصراخك وتهزيئك له لانه يتعلم كل المهارات والاساليب منك انتي وابوه

حتى ضربه لاخوه الصغير تعلمه منكم ماجاء للدنيا حافظ الضرب

وبما انه ولد يفترض يعاشر الرجال ويدخل مجالسهم ويحتك فيهم يفترض ابوه ياخذه معاه ويعوده ويعلمه يسلم ويرحب ويقهوي بالتدريج راح يكتسب الثقه ويرسخ في عقله ان الرجال كذا يسوون
وحتى التقضي للبيت خذوه واعتمدو عليه ببعض الطلبات خلوه يجيبها ويروح يحاسب للاشياء البسيطه واذا سواها امدحوه واشكروه

ترى جلسة الولد بالبيت ضررها اكثر من نفعها بيصير حاله من حال البنات

وبخصوص الثقه بالنفس اذا سوا شي زين امدحيه واذا غلط علميه ووجهييه كيف يسوي الصح بدون صراخ وضرب

واذا طلعتو مكان امدحيه قدام الناس خليه يحس بالثقه ولا تحرجينه بأي كلمه سلبيه او تعيبين عليه اذا تلعثم بالعكس اصبري وخليك منصته

ونصيحه لا تغفلين عن عيالك ترى شغل البيت ما يخلص اجلسي مع عيالك لعبيهم ونمي مهاراتهم وسولفي معاهم افتحي أي موضوع يناسب عقله وخليه يسولف لك وانتي اسمعيه وشجعيه وامدحيه

واذا طلع مع ابوه ورجع خليه يتكلم ويسولف لك ثم امدحيه انتي وابوه تلاحقو عليه قبل لا يصير الخجل والانعزال فيه صفه دائمه

جزاك الله خير