Yasmeen2110 @yasmeen2110

عضوة جديدة

كل الصفات السيئة يحملها زوجي العزيز.. ساعدوني الله يفرج هم كل انسان

بسم الله الرحمن الرحيم

أنا أول مرة أحط موضوع في هذا المنتدى و اتمنى اني أحصل الحل المناسب عندكم أو عالأقل تدعون لي بالسعادة

قصتي

عمري 27 و قبل 8 سنوات انخطبت لشخص كنت أحبه مووووت و كل شي كان أوكي و هو كان يمووووت فيني و الكل كان يحسدني عليه بس للأسف أمه كانت تغار و دوم تحاول تخرب لين ما أنا تعبت و قلت له في لحظة غضب اني ما أبيه و رحت سكنت عند أختي في منطقة ثانية و غيرت أرقامي.. هو انصدم طبعا و أمه استغلت الفرصة و راحت زوجته و أنا عرفت بعد العرس ب يومين و كنت ناوية قبل لا أعرف عن الزواج اني اتصل فيه و اعتذر بس أنا تأخرت.. طبعا بعد ما عرفت عن زواجه تعبت كثيييييييييير و رب العالمين هو الوحيد اللي كان يعلم باللي أنا كنت أمر فيه.. نقص وزني 25 كيلو في شهرين و صرت أتعالج بمضادات الاكتئاب.. بعد الزواج ب 5 أشهر شافني شخص (زوجي الحالي) في الجامعة و تقدم لي.. أنا كنت متضايقة ذيج الفترة و قلت أحسن شي أني اتزوج و أفتك من كل هذا التعب.. و وافقت عالخطبة..

طبعا أهلي سألوا عن الشخص و أهلة و الكل مدح فيهم بس الشيء الوحيد أنه مذهبي غير مذهبه و أبوي ما وافق عالزواج بس أنا اصريت لأني كنت متضايقة و كنت أريد اتخلص من التعب النفس اللي كنت أمر فيه.. وافق أبوي على شرط اني ما الجأ له اذا صادفتني مشاكل في الزواج و أنا وافقت..

عشت فترة خطوبة رائعة بمعنى الكلمة نسيت فيها كل الحزن اللي مريت فيه و كان خطيبي يحبني و يحاول اسعادي بأي طريقة رغم أنه ما يعرف عن الأزمة النفسية اللي مريت فيها قبل لا أنخطب له .. استمرت فترة الخطوبة 3 أشهر و بعدها تزوجنا و سافرنا و عشت أيام ما أقدر أوصفها .. كانت وايد حلوة , و من يوم ما رجعنا حسيت أنه زوجي تغير علي كثييييير رغم اني ما قصرت معاه أبد كان عمري وقتها 21 و كان باقي لي كورس واحد في الجامعة بس كنت هم أطبخ و انظف و أسوي كل اللي هو يبيه و أنا حملت في الشهر الأول من الزواج بس هو أبد ما كان مستانس عااادددييي جدااا... في أول شهرين من الزواج أكتشفت انه يتكلم ويا بنات و طبعا واجهته و أنكر لما كنت في الشهر الرابع كذب علي و قال لي انه مسافر حق علاج صاحبه لأنه فيه سرطان و العياذ بالله و هو أصلا كان مسافر ل بلد ثاني عشان يدل شخص على مشعوذ !! مرت الشهور و دائما كنت اكتشف أشياء و خيانات بس كنت استحمل عشان اللي في بطني.. و و لدت الحمدلله ببنتي الله يحفظها .. أيام ما كنت بيت أهلي اكتشفت انه يكلم رقاصة أجنبية تشتغل معاه بالفندق و هم سكت.. بعدها ب فترة شفت واحد من الجنس الثالث يطلع من شقتي و زوجي ما كان يعرف اني راح أطب على الشقة بالصدفة و واجهته و هو أنكر كل شي مع اني كنت متأكدة و شايفة ب عيني..و هم صبرت

لما كبرت بنتي شوي هو راح العمرة و رجع أحسن و تغيرت أخلاقه و أنا وايد استانست و قررت أييب طفل ثاني و حملت و جبت ولد.. رابع يوم الولادة هو سافر ياخذ مشعوذ من عندنا لناس بدولة خليجية ثانية رغم اني ما كنت موافقة عالسفر و كنت أبكي و عندي اكتئاب الولادة بس هنت عليه و راح و هم سامحته عشان خاطر العيال

و طبعا هذي المواقف هي شي بسيط من اللي هو سواه فيني و أنا عمري ما اشتكيت لأي شخص من أهلي لأني ما أريد مشاكل و هو كان اختيلري و ما أريد أنزل من قيمته جدام هلي و هو في عينهم ما في أحسن منه و دوم أقول لهم اني مستانسة و مرتاحة

الحين احنا كملنا تقريبا 4 سنوات و نص عالزواج و في الفترة الأخيرة صار ما يعاملني زين و دوم يعصب علي غير كذا كله يخبي تلفونه و يخاف لا أمسه و طول الوقت عالرسايل و يحط الجهاز صامت في البيت ناقشته أكثر من مرة بس ما في أي نتيجة يقول لي أنا شكاكة

قلت أحسن أطنش و ما أساله مول انت من وين جاي أو وين رايح.. أسبوع أنا ما أكلمه و هو و لا مهتم يتأخر عالبيت و لما يرجع يقعد في السيارة ساعة أو أكثر يتكلم عالموبايل و بعدين يطلع عالبيت و ما يكلمني أبد و ما حاط لي أي اعتبار و أنا أشوف كل هذا و قلبي يتقطع بس ما قادرة أسوي شي

الخميس اللي راحت كلمته ب هدوء و قلت له اني أريد الطلاق و شرحت له الأسباب و قال لي انت متأكدة؟ قلت له أيوا بعدين قال لي يصير خير و اليوم الأحد و هو ما عطاني أي رد

أنا والله تعبت و ما أعرف شسوي و أموت كل يوم .. أنا أحبه موت بس ما أقدر أشوف كل هذا و أسكت و هو ما قاعد يتغير أبد و الحين أكثر من 10 أيام و حنا ما نتكلم بس لمل يجي ياخذ حقه الشرعي ما أقول شي و اليوم الثاني كأني حيوانة ما يهتم

أنا ما أريد امدح نفسي و أعوذبالله من كلمة أنا.. حلوة و الحمدلله بشهادة من الكل و نظيفة و متعلمة و اهتم بالبيت و العيال و هو عمرة ما اشتكى من مظهري أو من أي تقصير بس هم عينه مو مليانة و بالذات هذي المرة أحس انه متعلق ب وحدة غيري و ما أدري من هي!! عشان كذا قلت أحسن حل أني اتطلق منه عشان يحس ب قيمتي بعدين و أنا واثقة من هذا الشي

لا تقولون كلمي حد من أهلج لأنه ما عندي غير رب العالمين و لا حد من أهله لأنه ما في حد عاقل و اعتمد عليه..

عطوني الحل أنا قاعدة أبكي طول الوقت و أنا أكتب الموضوع لأني بالفعل كارهه حياتي

و يا ليت كل وحدة تقرا موضوعي تدعي و لو بالغيب أنه الله يرزقني السعادة و تدعون له بالهداية و انه يحبني مثل قبل و الله يبعد بنات الحرام عنه اللي يحبون خراب البيوت

و اسفه طولت عليكم

انتظر ردودكم و دعواتكم

يلزم عليك تسجيل الدخول أولًا لكتابة تعليق.

تسجيل دخول

الورده المكنونه • 16 سنة

والله ما ادري يا اختي بس انتي تعتبرين في ورطه ليه تاخذين شخص مذهبه غير مذهبك يعني طلعتي من مشكله لورطه

ثانيا بلا شك زوجك مصادق جنس ثالث وش معناها ؟؟؟؟؟؟؟؟؟؟؟؟؟

ثالثا وش علاقته بالمشعوذين ؟؟

الله يعينك استخيري الله واطلبي الطلاق قبل تفاقم الامور وانسحبي بهدوء

والله ولي التوفيق

SAROOONA • 16 سنة

انا استغربت من شي اشلون انتي طالبه الطلاق و تسمحين له ياخذ الحق الشرعي احس انج مو جاده لطلب الطلاق

اوقفي له وقفه جاده و خليه يطلق

بنيتـون • 16 سنة

ياكثر غلطاتك اولا طائفه غير طائفتك مانقول مذهب (لان المذاهب اربعه )

وكل ماغلط تسكتين وتكبتين مايصير مايصلح لازم تواجهينه وتصارحينه ،،

والمشعوذين اللي يجيبهم لخلق الله (عشان يفك سحر مثلا )-حــرام ومايجوز يروح لكاهن والا لمشعوذ،،

والله مشكله هذي اللي ماتطيع والديها تطيح في مشاكل انتبهوا يابنات انتي حتى مو قادره تشكين لهم بسبب

شرط ابوك اللي وافقتي عليه،،

انصحك تكلمين شيخ وتسألينه بعد مدري اخاف ياخذ بنتك بعد الطلاق وهو مو كفو تربيه اسألي شيخ عن الوضع

كيف يكون بعد الطلاق اذا قال لك تطلقي ..

الماسه حرة • 16 سنة

الله يساعدك ويرزقك السعادة

ويهدي زوجك غصب علية
اميييييييييييييييين

na3om • 16 سنة

بصراحه مشكلتك مشكله

بعدين كيف تنامي معه و انتي ما تكلميه و لا يكلمك ؟؟؟؟
انا اقصد ذيك الشغله مو قادره استوعب كيف

كيييييييييييييييييييييييييييف يطلب و انتو ما تتكلمو

اعذريني زوجك ما عنده احساس و انتي عودتيه انك مو مهتمه و هذا اللي فهمه من صبرك ما قال انك صابره قال انك مو مهتمه

علشان كذا تمادى لدرجه ياخذ حقه و هو مطنشك

بالله وين كرمتك ........!!!!!!!!!!!!!!!!!!؟؟؟؟؟؟؟؟؟؟؟؟؟؟؟؟!!!!!!!!!!!!!!!!!!

لا تزعلي مني بس بجد انقهرت عليك لاني اكره الانسان الخاين و لو زوجي لا سمح الله كشفته يخونني بيكون اخر يوم بيننا لاني عندي كرامه و كرامتي ما تسمحلي اعيش مع خاين